تۇركىستان وبلىسىندا ايەلىن بالارىنىڭ كوزىنشە ۇرىپ ولتىرگەن كۇدىكتىگە قاتىستى سوت ۇكىمى شىقتى, دەپ حابارلايدى Egemen.kz.
جاعا ۇستاتارلىق جاعداي بيىلعى جىلدىڭ 28 ساۋىرىندە بولعان. ءوز ۇيىندە الكوگول ءىشىپ وتىرعان م ەسىمدى تۇرعىن 5 جىل بۇرىنعى ايەلىنىڭ تەرىس قىلىعىن ەسىنە الىپ, قىزعانىشتان جۇبايىن قولىمەن ۇرىپ, اياعىمەن تەپكەن.
جاس بالالارىنىڭ كوزىنشە بولعان وقيعادان جابىرلەنۋشى جاراقات الىپ, وقيعا ورنىندا كوز جۇمدى. تۇركىستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ەرەكشە قاتىگەزدىكپەن قاساقانا كىسى ولتىرگەنى ءۇشىن م. - عا قاتىستى قىلمىستىق ءىس قارالدى.
سوت ۇكىمىمەن م. قك-ءنىڭ 99-بابىنىڭ 2-بولىگى, 5-تارماعى بويىنشا قىلمىس جاساعانى ءۇشىن كىنالى دەپ تانىلىپ, وعان 17 جىلعا باس بوستاندىعىنان ايىرۋ جازاسى تاعايىندالدى.
«قاۋىپسىزدىگى ەڭ جوعارى قىلمىستىق-اتقارۋ جۇيەسى مەكەمەسىندە جازاسىن وتەۋ بەلگىلەندى. ۇكىم زاڭدى كۇشىنە ەنگەن جوق», دەلىنگەن تۇركىستان وبلىستىق سوتىنىڭ ءباسپاسوز قىزمەتى تاراتقان حابارلامادا.