«كاسپي» اكك ءتيىمسىز جوبالاردى قارجىلاندىرعانى انىقتالدى. بۇل تۋرالى ماڭعىستاۋ وبلىسى بويىنشا سىبايلاس جەمقورلىققا قارسى قىزمەت دەپارتامەنتى حابارلادى, دەپ جازادى Egemen.kz.
ء«بىز وسىمەن ەكىنشى رەت «كاسپي» اكك قىزمەتىنە سىرتقى تالداۋ جۇمىستارىن جۇرگىزدىك. اكك ءتيىمسىز جوبالاردى قارجىلاندىرىپ كەلگەن. ماسەلەن, 2020 جىلى اكك «پوليمەرلىك قاپتاما شىعارۋ» جوباسىن قارجىلاندىرۋ تۋرالى شەشىم قابىلداعان. تالداۋ بارىسىندا جوبانىڭ قۇرىلىسىن اياقتاۋ مەن ىسكە قوسۋدان بۇرىن, قۇزىرلى ورگاندار تاراپىنان قۇرىلىس-مونتاجداۋ جۇمىستارىن باستاۋعا رۇقسات بەرىلمەگەنى انىقتالدى. اتالعان پروبلەمالارعا قاراماستان, اكك «پوليمەرلىك قاپتاما شىعارۋ» جوباسى ءۇشىن 2 رەت 6%-بەن شيكىزات وندىرىسىنە – 12 ملن تەڭگە جانە اينالىم قاراجاتىن ۇلعايتۋ ءۇشىن - 13,9 ملن تەڭگە قارجى بولگەن. الايدا, 2021 جىلى اياقتالۋى ءتيىس زاۋىت وسى كۇنگە دەيىن پايدالانۋعا بەرىلمەگەن, شارتتا كوزدەلگەن تاۋارلار كولەمى شىعارىلماعان, تابىس تۇسپەگەن», دەدى قۋانىش مىرزاعالي.
سپيكەردىڭ ايتۋىنا قاراعاندا, «اقتاۋ قالاسىنىڭ اۆتوبۋس پاركىن جاڭارتۋ» جوباسى كەزىندە دە تاۋەكەلدەر انىقتالعان. اكك جوبانى ىسكە اسىرۋ ءۇشىن 18 اۆتوبۋسقا اۆانستىق تولەم جاساۋ ارقىلى ساتىپ الۋدى جوسپارلاعان. كەيىن 40 ملن تەڭگەگە اۆتوبۋستار ساتىپ الىنىپ, تاسىمالداۋشىلار اراسىندا بولىنبەي, باسقا جشس-عا نەگىزسىز بەرگەن.
«قوعامنىڭ بۇرىنعى باسقارما توراعاسى ق.بەرىشباەۆ وسى لاۋازىمعا تاعايىندالۋ كەزىندە سىبايلاس جەمقورلىققا قارسى ءىس-قيمىل زاڭناماسىمەن كوزدەلگەن ءوز اكتيۆتەرى مەن مىندەتتەمەلەرى تۋرالى دەكلاراتسيانى تابىس ەتپەگەنى ءۇشىن اكىمشىلىك جاۋاپكەرشىلىككە تارتىلدى. سونداي-اق, وسى بۇزۋشىلىققا جول بەرگەن قارجى باسقارماسى باسشىسىنىڭ مىندەتىن اتقارۋشى د.ەرپانوۆا دا اكىمشىلىك جاۋاپكەرشىلىككە تارتىلدى. وعان سىبايلاس جەمقورلىق قۇقىق بۇزۋشىلىعى ءۇشىن 153 150 تەڭگە ايىپپۇل سالىندى», دەدى وبلىستىق سىبايلاس جەمقورلىققا قارسى قىزمەت دەپارتامەنتى.
بۇدان بولەك, كاسىپكەرلىك كورپوراتسيا ينۆەستيتسيالىق جوبالارعا ارنالعان جەر تەلىمدەرىن كوممەرتسيالىق ماقساتتا پايدالانۋعا بەرگەن.