سولتۇستىك قازاقستان وبلىسىندا 600-گە جۋىق ۇستاز جەتىسپەيدى. اسىرەسە ماتەماتيكا, ورىس جانە شەت تىلدەرى, ينفورماتيكا مەن فيزيكا پاندەرىنىڭ مۇعالىمدەرى تاپشى, دەپ حابارلايدى Egemen.kz.
سقو ءبىلىم باسقارماسىنىڭ مالىمەتىنشە, جاڭا وقۋ جىلىندا پەداگوگ كادرلاردىڭ جەتىسپەۋشىلىگىنە زەينەت جاسىنداعى ۇستازداردىڭ قىزمەتتەن كەتىپ, ورىندارىن بوساتۋى سەبەپ بولعان. وقۋ جىلىنىڭ سوڭىندا وبلىس مەكتەپتەرىندە 418 زەينەتكەر ۇستاز جۇمىس ىستەگەن. سونداي-اق, كەي مۇعالىمدەردىڭ دەكرەتتىك دەمالىسقا كەتۋى جانە باسقا ەلدى مەكەندەرگە قونىس اۋدارۋى دا مۇعالىم تاپشىلىعىن تۋدىرعان.
جالپى, بيىل وبلىس مەكتەپتەرىنە 400-دەن استام جاس ماماندى جۇمىسقا الۋ جوسپارلانعان. سونىڭ 75%-ى اۋىل مەكتەپتەرىنە قابىلدانادى.
پەداگوگتەردىڭ جەتىسپەۋشىلىگى ماسەلەسىن شەشۋ ءۇشىن سقو اكىمى مۇعالىم ماماندىقتارىنا گرانت تاعايىنداعان ەدى. بيىل بيۋدجەت ەسەبىنەن ءبىلىم العان 46 مامان ديپلومىن قولىنا الدى. 1 قىركۇيەك كۇنى جۇمىسقا كىرىسپەك. ولار شارت بويىنشا وقۋ وردالارىندا 3 جىل جۇمىس ىستەۋى ءتيىس.
«ەلدى مەكەندەرگە جۇمىس ىستەۋگە بارعان جاس ماماندارعا «ديپلوممەن اۋىلعا» باعدارلاماسى ارقىلى 100 اەك مولشەرىندە كوتەرمەاقى بار. سونداي-اق, 1500 اەك مولشەرىندە باسپانا الۋعا بيۋدجەتتىك نەسيە بەرىلەدى. ۇستازدىق قىزمەتكە ەندى كىرىسكەن جاس ماماندار ۇلتتىق بىلىكتىلىك سىناعىن تاپسىرۋى ءتيىس. بيىلدان باستاپ, مينيسترلىكتىڭ №57 بۇيرىعىنا سايكەس, ءبىلىم وردالارىنا ورنالاسىپ جاتقان ۇستازدار كونكۋرستان ءوتۋى قاجەت. ال شاعىن جيناقتى مەكتەپتەرگە پەداگوگتەر ءوتىنىش بويىنشا قابىلدانا بەرەدى», دەيدى سقو ءبىلىم باسقارماسىنىڭ ءبولىم باسشىسى گۇلشات شايمەردەنوۆا.
سقو-دا قازىرگى ۋاقىتتا 472 مەكتەپ بولسا, سونىڭ 75%-ى – شاعىن جيناقتى. سوندىقتان ولارعا حيميا-بيولوگيا, فيزيكا-ماتەماتيكا سەكىلدى قوس پاننەن ساباق بەرە الاتىن ۇستازدار قاجەت.