قازاقستاننىڭ جەتى وبلىسىندا اۆتوكولىكتەر ۋتيلالىم مەن باجدى تولەمەي, زاڭسىز ەسەپكە قويىلعان. بۇل تۋرالى ءىىم ءمالىم ەتتى, دەپ حابارلايدى Egemen.kz.
ىشكى ىستەر مينيسترلىگى زاڭسىز ارەكەتتەرگە بارعان پوليتسەيلەردى انىقتاۋ ءۇشىن تۇبەگەيلى شارالار قولدانىپ جاتقانىن مالىمدەدى.
«قازىرگى ۋاقىتتا ءىىم ىشكى قاۋىپسىزدىك باسقارماسى ەلىمىزدىڭ جەتى وبلىسىندا كورشىلەس ەلدەردەن اكەلىنگەن كولىكتەردىڭ قازاقستانعا زاڭسىز تىركەلۋى بويىنشا قىلمىستىق ىستەردى تەرگەپ جاتىر», دەدى ءىىم كريمينال پوليتسيا دەپارتامەنتىنىڭ اعا جەدەل ۋاكىلى ساعىندىق جانتەمىروۆ.
ءتارتىپ ساقشىلارىنىڭ ايتۋىنشا, سوڭعى ءۇش جىلدا ەكى مىڭنان اسا كولىك زاڭسىز تىركەلىپ, مەملەكەتكە 10 ميلليارد تەڭگەدەن استام شىعىن كەلگەن.
«ارنايى وپەراتسيانىڭ قورىتىندىسى بويىنشا, ءىىم ورتالىق اپپاراتىنىڭ قىزمەتكەرلەرى جەدەل-ىزدەستىرۋ ءىس-شارالارىن وتكىزۋ كەزىندە شىمكەنتتە جاقىن شەت ەلدەردەن كەدەندىك تولەمدەردى, كادەگە جاراتۋ الىمىن جانە مەملەكەتتىك باجدى تولەمەي اكەلىنگەن كولىك قۇرالدارىن زاڭسىز ەسەپكە قويۋ سحەماسىنىڭ جولىن كەستى. قالالىق پوليتسيا دەپارتامەنتى پروتسەسسينگ ورتالىعىنىڭ ەكى قىزمەتكەرى سوت سانكتسياسىمەن قاماۋعا الىندى», دەدى ءىىم وكىلى.
ىشكى ىستەر مينيسترلىگى شىمكەنتتە زاڭسىز تىركەلگەن 53 كولىك مەملەكەتكە 320 ميلليون تەڭگەدەن اسا شىعىن كەلتىرىلگەنىن اتاپ ءوتتى.
«قىلمىستىق توپتىڭ قۇرامىنا دەلدالدار, حالىققا قىزمەت كورسەتۋ ورتالىقتارىنداعى كومەكشىلەر, جالعان سەنىمحات بەرگەن نوتاريۋستار بولدى. قىلمىستىق سحەماعا قاتىسۋشىلاردىڭ بارلىعى جەدەل-ىزدەستىرۋ شارالارى بارىسىندا انىقتالادى», دەپ مالىمدەدى ساعىندىق جانتەمىروۆ.