تاۋارلاردى ءوندىرۋ جانە قىزمەت كورسەتۋ سالاسىندا بەلگىلى ءبىر تالاپتار مەن ەرەجەلەر بار. سولاردىڭ ساقتالۋىن ساۋدا جانە ينتەگراتسيا مينيسترلىگىنە قاراستى تەحنيكالىق رەتتەۋ جانە مەترولوگيا كوميتەتى قاداعالايدى. كۇنى كەشە كوميتەت ءبىرىنشى جارتىجىلدىقتاعى جۇمىسىن قورىتىندىلاپ, اتقارعان جۇمىستارىنىڭ ەسەبىن شىعاردى.
كوميتەتتىڭ حابارلاۋىنشا, ماماندار جارتى جىلدىڭ ىشىندە مەملەكەتتىك باقىلاۋ جانە قاداعالاۋ جۇرگىزۋ بولىگىندە 731 تەكسەرۋ جۇرگىزگەن. سونىڭ ىشىندە 64-ءى – جوسپاردان تىس بولسا, 85-ءى – پروفيلاكتيكالىق باقىلاۋ. وزگە مەملەكەتتىك ورگاندارمەن بىرگە جۇرگىزىلگەن تەكسەرۋلەر سانى – 119. ال مەكەمەلەرگە بارماي, سىرتتان باقىلاۋ سانى 464-كە جەتكەن.
تەكسەرۋ كەزىندە 507 جاعدايدا بۇزۋشىلىقتار انىقتالعان. بۇل بارلىق تەكسەرۋدىڭ – 70%-ى. «تەكسەرۋ ناتيجەسى كورسەتكەندەي, 14 مىڭ 300 قۇجات نەگىزسىز جانە دايەكسىز بەرىلگەن. سونىڭ ىشىندە 57-ءسى سايكەستىك سەرتيفيكاتى بولسا, 50-ءى – سايكەستىك تۋرالى دەكلاراتسيالار. بۇعان قوسا, 162 جەكە تۇلعاعا ارنالعان اۆتوموبيل كۋالىگى مەن 14 031 ولشەۋ قۇرالىن تەكسەرۋ تۋرالى سەرتيفيكاتتار (وق) نەگىزسىز بەرىلگەنى انىقتالدى. مەملەكەتتىك تىزىلىمگە ەنگىزىلمەگەن 1 572 سەرتيفيكات تا بار, 821 وق جارامسىز دەپ تانىلدى. مىنە, وسىنداي زاڭ بۇزۋشىلىقتار شەڭبەرىندە 81 قاۋلى شىعارىلدى. ولارعا سالىنعان ايىپپۇل سوماسى 65 ملن تەڭگەنى قۇرادى. بۇل بىلتىرعىمەن سالىستىرعاندا ەكى ەسە كوپ», دەيدى كوميتەت ماماندارى.
ەۋرازيالىق ەكونوميكالىق وداق شەڭبەرىندە دە ءبىراز جۇمىس قولعا الىنىپ, سونىڭ اياسىندا كولىكتەرگە «SOS» باتىرماسىن ورناتۋ مىندەتتەمەسى الىنىپ تاستالعان. «بۇل ەل ازاماتتارىنا مۇنداي قۇرىلعىلاردى ورناتۋعا كەتەتىن شىعىنداردى قىسقارتۋعا مۇمكىندىك بەردى», دەيدى تەحنيكالىق رەتتەۋ جانە مەترولوگيا كوميتەتىنىڭ ءباسپاسوز قىزمەتى.
سونداي-اق قۇزىرلى ورگان ەلەكتر قۇرىلعىلارىنىڭ ەنەرگيا تيىمدىلىگى تۋرالى تەحنيكالىق رەگلامەنتىن ەنگىزۋ ۋاقىتى ۇزارعانىن حابارلادى. ەگەر مۇنداي شەشىم قابىلدانسا, تۇرمىستىق تەحنيكانىڭ باعاسى كۇرت قىمباتتاۋى مۇمكىن. سوندىقتان ازىرشە قۇجاتتىڭ كۇشىنە ەنۋى كەيىنگە شەگەرىلىپ وتىر.
ۆەدومستۆونىڭ دەرەگىنشە, بيىل ستاندارتتاۋ جوسپارى شەڭبەرىندە 340 ستاندارت ازىرلەنىپ جاتىر, ونىڭ 140-ى – مەملەكەتارالىق ستاندارتتار. «قازىردىڭ وزىندە بىرقاتار الەۋمەتتىك ماڭىزى بار ستاندارتتار قابىلداندى. سونىڭ ءبىرى – ەلەكترساموكاتتارعا قاتىستى ستاندارت. جالپى ستاندارتتار لەگى العاش رەت عىلىمي-ەكسپەريمەنتتىك زەرتتەۋلەرگە سۇيەنە وتىرىپ ازىرلەندى», دەپ مالىمدەيدى ماماندار.
مەملەكەت باسشىسىنىڭ تاپسىرماسى بويىنشا زەرتحانالىق بازانى جاڭعىرتۋ جۇمىستارىن دا قولعا العان ۆەدومستۆو ۇلتتىق جوبانى ىسكە اسىرۋ قورىتىندىسى بويىنشا 2025 جىلعا قاراي زەرتحانالىق بازانىڭ 30%-ىن جاڭعىرتۋدى جوسپارلاپ وتىرعانىن حابارلادى. ول ءۇشىن جول كارتاسى قابىلدانىپ, مەملەكەتتىك ورگاندارمەن بىرلەسە جۇمىستار اتقارىلىپ جاتىر.
سايكەستىكتى راستاۋ جونىندەگى قۇجاتتار «بىرىڭعاي تەرەزە» اقپاراتتىق جۇيەسىنىڭ پلاتفورماسى ارقىلى جۇزەگە اسىرىلىپ, بيىلعى 19 شىلدەدەگى جاعداي بويىنشا 68 649 قۇجات بەرىلگەن.
كوميتەت تاڭبالاۋ جۇيەسىن ۇيلەستىرۋ بويىنشا جۇمىستار جۇيەلى جۇرگىزىلىپ جاتقانىن اتاي كەلە, بۇگىندە ەل بويىنشا تەرى, تەمەكى بۇيىمدارى, اياقكيىم جانە ءدارى-دارمەكتەر توبى بويىنشا مىندەتتى تاڭبالاۋ ەنگىزىلگەنىن مالىمدەدى. سونىڭ ناتيجەسىندە قازىناعا تۇسكەن تۇسىمدەر كولەمى دە ارتقان. ايتالىق, تەرى بۇيىمدارىن تاڭبالاۋ كەزىندە يمپورت بويىنشا كەدەندىك باجدار مەن سالىقتاردىڭ ءتۇسىمى 40%-عا – 372,3 ملن تەڭگەدەن 516,2 ملن تەڭگەگە دەيىن وسكەن. وسى قىزمەت بويىنشا ىشكى سالىقتار ءتۇسىمى 1,5 ەسەگە ارتقان.
ەندى ۆەدومستۆو جىلدىڭ سوڭىنا دەيىن تەحنيكالىق رەتتەۋ سالاسىنداعى اقپاراتتىق جۇيەنى ونەركاسىپكە ەنگىزۋ, ونىڭ ىشىندە ادامي فاكتوردى بارىنشا ازايتا وتىرىپ, مەملەكەتتىك باقىلاۋدىڭ بيزنەس-پروتسەستەرىن تسيفرلاندىرۋدى رەتكە كەلتىرمەك. سونىمەن قاتار تەحنيكالىق رەتتەۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر ەنگىزۋ تۋرالى زاڭ جوباسىن ازىرلەپ, ۇلتتىق زەرتحانالىق بازانى جاڭعىرتۋ جۇمىستارىن ءارى قاراي جالعاستىرۋدى جوسپارلاپ وتىر.