شىمكەنتتە كورشى ەلدەردەن اكەلىنگەن اۆتوكولىكتەردى كەدەندىك تولەم, ۋلتيالىم جانە مەملەكەتتىك باج تولەمەي تىركەۋدىڭ جولى كەسىلدى, دەپ حابارلايدى Egemen.kz Polisia.kz سايتىنا سىلتەمە جاساپ.
قالالىق پوليتسيا دەپارتامەنتى مالىمەتىنشە, پروتسەسسينگ ورتالىعىنىڭ ەكى قىزمەتكەرى سوت سانكتسياسىمەن قاماۋعا الىنعان. شىمكەنتتە وسى سحەما بويىنشا قازاقستاندىق ەسەپكە قويىلعان 53 اۆتوكولىكتەن مەملەكەتكە 320 ميلليون تەڭگەدەن اسا سوماعا زالال كەلتىرىلگەن.
«ىشكى ىستەر مينيسترلىگى قۇقىققا قارسى ءىس-ارەكەتتەر جاساۋعا ىقپال ەتكەن سەبەپ پەن جاعدايدى جويۋ بويىنشا الدىن الۋ شارالارىن ىسكە اسىرىپ جاتىر. جەدەل-ىزدەستىرۋ ءىس-شارالارى بارىسىندا شىمكەنتتەگى ءىىم ورتالىق اپپاراتىنىڭ قىزمەتكەرلەرى جاقىن شەتەلدەن كەدەندىك تولەمدەردى, كادەگە جاراتۋ الىمىن جانە مەملەكەتتىك باجدى تولەمەي اكەلىنگەن كولىك قۇرالدارىن قازاقستان رەسپۋبليكاسىندا زاڭسىز ەسەپكە قويۋ سحەماسىنىڭ جولىن كەستى», دەلىنگەن حابارلامادا.
قازىرگى ۋاقىتتا ءىىم ىشكى قاۋىپسىزدىك باسقارماسى جەتى وبلىستا سوڭعى ءۇش جىلدا ەكى مىڭنان اسا كولىك زاڭسىز تىركەلىپ, 10 ميلليارد تەڭگەدەن اسا شىعىن كەلتىرگەن دەرەكتەر بويىنشا قىلمىستىق ىستەردى تەرگەپ جاتىر.