بۇرىن مەكەنجاي مەن جىلجىمايتىن م ۇلىك مالىمەتتەرىن وزگەرتۋ ءۇشىن تۇرعىندار ءبىراز اۋرە-سارساڭعا تۇسەتىن. جاقىندا «ۇلتتىق اقپاراتتىق تەحنولوگيالار» اق eGov.kz پورتالىندا جانە eGov mobile ءموبيلدى قوسىمشاسىندا جاڭا قىزمەت ىسكە قوسىلعانىن حابارلادى. وسى تسيفرلى جۇيەنىڭ ارقاسىندا جۇرتشىلىق ەندى ۇيدەن شىقپاي-اق مەكەنجاي تۋرالى دەرەكتەردى وزدەرى وزگەرتە الاتىن بولدى.
بۇگىنگە دەيىن كوشەنىڭ اتاۋى نەمەسە ۇيلەردىڭ نومىرلەنۋى وزگەرىپ كەتسە, تۇرعىندار دا ءوز قۇجاتتارىنا وزگەرىستەر ەنگىزۋگە تۋرا كەلەتىن. ويتكەنى ءۇيدىڭ ورنالاسقان جەرى تۋرالى دەرەكتەر اۋىسسا, ونداي قۇجاتتى بانك تە, نوتاريۋس تا قابىلدامايدى. بۇعان كەمىندە 10 جۇمىس كۇنى قاجەت بولدى. بۇرىن ءتىپتى جۇرتشىلىق الدىمەن حالىققا قىزمەت كورسەتۋ ورتالىعىنان مەكەنجايدىڭ وزگەرگەنى تۋرالى انىقتاما الىپ, ودان كەيىن مەكەنجايدى انىقتاتۋ ءۇشىن ساۋلەت باسقارماسىنا جۇگىنەتىن.
كوپشىلىك مەكەنجاي دەرەگى وزگەرگەندە ونى دەر كەزىندە اۋىستىرماي, ۋاقىت سوزىپ ءجۇرىپ الادى. ال بۇل قۇجات جىلجىمايتىن م ۇلىكتى ساتقان كەزدە, كەپىلزاتتى تىركەۋ كەزىندە, تۇرعىن ءۇي-كوممۋنالدىق قىزمەتتەر ماماندارى مەن كوشى-قون قىزمەتى بولىمدەرى تالاپ ەتكەندە جانە ايماقتىڭ, وبلىستىڭ, قالانىڭ اتاۋى وزگەرگەن كەزدە قاجەت بولادى. ەندى جاڭا قىزمەتتىڭ ارقاسىندا تۇرعىندار مەكەمەلەرگە بارىپ, ۋاقىتىن سارپ ەتپەيدى. جاڭادان ىسكە قوسىلعان مەملەكەتتىك سەرۆيستى پايدالانا وتىرىپ, م ۇلىكتىڭ ناقتى مەكەنجايىن وزدىگىنەن راستاي الادى. ايتا كەتۋ كەرەك, ەگەر جىلجىمايتىن م ۇلىك تۋرالى دەرەكتەر بولماسا, وندا سەرۆيستە تەك مەكەنجايدىڭ وزگەرۋ تاريحى عانا كورسەتىلەدى.
«مەكەنجايدىڭ وزگەرۋ دەرەگى تۋرالى انىقتامانى الۋ – ەل تۇرعىندارىنىڭ اراسىنداعى ەڭ تانىمال قىزمەت ءتۇرى. مۇنداي قۇجات حالىققا قىزمەت كورسەتۋ ورتالىقتارى ارقىلى جىلىنا 3 ملن رەت بەرىلەتىن. اسىرەسە باسپاناسىن ساتۋعا قويعان قازاقستاندىقتار بۇل قىزمەتكە كوبىرەك جۇگىنەدى. ال ولاردىڭ مەكەنجاي نەمەسە جىلجىمايتىن م ۇلىك دەرەگىندە قانداي دا ءبىر وزگەرىستەر بولسا, نوتاريۋستار مەن بانكتەر حالىققا قىزمەت كورسەتۋ ورتالىعىنا جىبەرۋگە ءماجبۇر. ەندى, مىنە, ادامدارعا وتە قاجەتتى قۇجات ەكەنىن ەسكەرە وتىرىپ, ونىڭ تسيفرلى نۇسقاسىن ىسكە قوستىق», دەيدى «ۇلتتىق اقپاراتتىق تەحنولوگيالار» اق باسقارما توراعاسى روستيسلاۆ كونياشكين.
جاڭا سەرۆيس مەكەنجايدىڭ تىركەۋ كودىن (متك) قولدانا وتىرىپ, نوتاريۋستار مەن بانكتەرگە, باسقا دا مەكەمەلەرگە جىلجىمايتىن م ۇلىك مەكەنجايىنىڭ وزگەرگەنى تۋرالى مالىمەتتەردى قاراۋعا مۇمكىندىك بەرەدى. بۇدان بىلاي ولار مۇنداي قۇجاتتى ازاماتتاردان تالاپ ەتە المايدى.
«متك بويىنشا مەكەنجايلاردىڭ مۇراعاتتىق مالىمەتتەرى» سەرۆيسىن پايدالانۋ ءۇشىن eGov.kz پورتالىنا كىرۋ قاجەت. باستى بەتتەگى «سەرۆيستەر» بولىمىندە «متك بويىنشا مەكەنجايلاردىڭ مۇراعاتتىق مالىمەتتەرى» دەگەن ءبولىم بار. ءارى قاراي پايدالانۋشى پورتالدا تىركەۋدەن ءوتىپ, ونلاين قىزمەتكە تاپسىرىس بەرەدى. مەكەنجايدىڭ تىركەۋ كودىن تولتىرعاننان كەيىن «تەكسەرۋ» باتىرماسىن باسادى.
«سۇراتۋدى ءساتتى وڭدەگەن كەزدە EGov.kz پورتالى ەكرانىندا مەكەنجايدىڭ وزگەرۋ تاريحى تۋرالى مالىمەتتەر كورسەتىلەدى. ال متك دۇرىس ەنگىزىلمەگەن جاعدايدا «ەنگىزىلگەن مەكەنجاي كودىن (متك) تەكسەرۋدى سۇرايمىز» دەگەن حابارلاما شىعادى, سوندىقتان كودتى قاتەلەسپەي, دۇرىس ەنگىزۋ كەرەك», دەيدى «ۇاو» اق ءباسپاسوز قىزمەتى.