تۇركىستان قالاسىنىڭ ماڭىندا «KEGOC» اق قۇرىلىسىن جۇرگىزگەن كەرنەۋى 220 كۆ «ورتالىق» جاڭا قوسالقى ستانتسياسى پايدالانۋعا بەرىلدى. ول ترانسفورماتور قۋاتىن 250 مۆا-عا ارتتىرۋعا مۇمكىندىك بەرەدى.
«ورتالىق» قوسالقى ستانتسياسى «KEGOC» اق-نىڭ «تۇركىستان قالاسىنىڭ سىرتقى ەلەكترمەن جابدىقتاۋ سحەماسىن كۇشەيتۋ. ەلەكتر جەلىلىك وبەكتىلەر سالۋ» جوباسىنىڭ اياسىندا ساۋران اۋدانى اۋماعىندا, تۇركىستان حالىقارالىق اۋەجايىنا جاقىن ماڭايدا سالىندى. جالپى قۇنى 9,93 ملرد تەڭگەنى قۇرايتىن جوبا كومپانيانىڭ مەنشىكتى قاراجاتى ەسەبىنەن ىسكە اسىرىلدى.
جاڭا قوسالقى ستانتسيانى ىسكە قوسۋ راسىمىنە تۇركىستان وبلىسىنىڭ اكىمى ومىرزاق شوكەەۆ, «سامۇرىق-قازىنا» اق باسقارما توراعاسى الماسادام ساتقاليەۆ, «KEGOC» اق باسقارما توراعاسى قانىش مولداباەۆ, سونداي-اق مەردىگەرلىك ۇيىمدار مەن جەرگىلىكتى اتقارۋشى ورگانداردىڭ وكىلدەرى قاتىستى.
– جاڭا قوسالقى ستانتسيا تۇركىستان ەنەرگيا تورابىن ەلەكترمەن جابدىقتاۋدىڭ قوسىمشا ورتالىعىنا اينالادى. سونىڭ ناتيجەسىندە, جەرگىلىكتى ەلەكتر تاراتۋ جەلىسىن دامىتۋ ءۇشىن ءتيىستى جاعدايلار جاسالاتىن بولادى. سونداي-اق وڭىرلىك جەلىنىڭ قاجەتتى وتكىزۋ قابىلەتى قامتاماسىز ەتىلەدى. جاڭا ەنەرگەتيكالىق وبەكتىنىڭ ىسكە قوسىلۋى ءوڭىردىڭ يندۋستريالىق-يننوۆاتسيالىق دامۋىنا سونى سەرپىن بەرەدى. سونىمەن بىرگە ايماقتىڭ 300 مىڭعا جۋىق تۇرعىنى ساپالى ەلەكتر ەنەرگياسىنا قول جەتكىزەدى. وسىلايشا, «ورتالىق» قوسالقى ستانتسياسى قۇرىلىسىنىڭ جوباسى بىرنەشە ماڭىزدى ماسەلەنىڭ وڭ شەشىمىن تابۋعا مۇمكىندىك بەرىپ وتىر, – دەپ اتاپ ءوتتى «KEGOC» كومپانياسىنىڭ باسشىسى قانىش مولداباەۆ. – تۇركىستان وبلىسى, اسىرەسە تۇركىستان قالاسى قارقىندى دامىپ وتىرعاندىقتان, ساپالى ەلەكتر قۋاتىمەن جابدىقتاۋدى قاجەت ەتەدى. جوبا شەڭبەرىندە 220 كۆ جانە 110 كۆ اشىق تاراتۋ قۇرىلعىلارى, 10 كۆ جابىق تاراتۋ قۇرىلعىلارى, جالپى قوسالقى ستانتسيالىق باسقارۋ پۋنكتى, ءورت ءسوندىرۋ سورعى ستانتسياسى, قوسالقى عيماراتتار (كولىكجاي, ءبوپ), كىرمە اۆتوموبيل جولى سالىندى.
جاڭا قوسالقى ستانتسيا 220كۆ قۇرايتىن ەكى ەنەرگەتيكالىق جەلى بايلانىسىمەن قامتاماسىز ەتىلگەن. ارقايسىسىنىڭ قۋاتى 125 مۆا-عا تەڭ ەكى ترانسفورماتور ورناتىلعان. ال ەنەرگيا وبەكتىسىنىڭ جالپى نومينالدىق قۋاتى – 250 مۆا. وسىنىڭ ناتيجەسىندە, جەرگىلىكتى ەلەكتر تاراتۋ جەلىسىنىڭ, وڭىرلىك جەلىنىڭ قاجەتتى وتكىزۋ قابىلەتىنىڭ دامۋىنا ءتيىستى جاعدايلار جاسالىپ وتىر. جاز كەزىندە تۇركىستان 50-60 مەگاۆاتت ەلەكتر قۋاتىن تۇتىنادى. ەندىگى جەردە جاڭا ەنەرگيالىق قۋاتتى شامامەن 180 مەگاۆاتقا كوتەرۋگە مۇمكىندىك بار. ياعني بۇرىنعى تۇتىنۋ كورسەتكىشىنەن ءۇش ەسەگە ارتادى.
وبلىس اكىمى ومىرزاق شوكەەۆ تۇركىستان قالاسىن دامىتۋدىڭ ءبىرىنشى كەزەڭى اياقتالعانىن, ءتورت جىلدىڭ ىشىندە حالىقارالىق اۋەجاي, اكىمشىلىك-ىسكەرلىك جانە مادەني-رۋحاني ورتالىقتار, ياعني قالانىڭ نەگىزگى الەۋمەتتىك ينفراقۇرىلىمى سالىنعانىن اتاپ ءوتتى. قالا اۋماعىندا بيىك عيماراتتار, مادەنيەت جانە سپورت عيماراتتارى, الەۋمەتتىك وبەكتىلەر پايدا بولدى. ال وڭىردە بيزنەستى وركەندەتۋ, قالانىڭ ينفراقۇرىلىمىن دامىتۋ ساپالى ءارى تۇراقتى ەنەرگيامەن جابدىقتاۋدى تالاپ ەتەدى.
«KEGOC» اق كۇردەلى قۇرىلىس جانە پايدالانۋ جونىندەگى باسقارۋشى ديرەكتورى ەرماحانبەت اتاقۇلوۆ جوبانىڭ الەۋمەتتىك ماڭىزدىلىعىنا توقتالىپ ءوتتى.
– قۇرىلىس كەزىندە 114 جۇمىس ورنى قۇرىلعان ەدى, ال پايدالانۋعا بەرىلگەننەن كەيىن قوسالقى ستانتسيادا 10 ادام تۇراقتى جۇمىس ىستەيتىن بولادى. بۇدان باسقا, جوبانى ىسكە اسىرۋ كەزىندە وتاندىق ءوندىرىس ماتەريالدارى مەن جابدىقتارى پايدالانىلدى, – دەدى ە.اتاقۇلوۆ.
«KEGOC» اق-عا قاراستى «وڭتۇستىكتىڭ جۇيەارالىق ەلەكتر جەلىلەرى» فيليالىنىڭ باسشىسى سەرگەي گولدشتەيننىڭ ايتۋىنا قاراعاندا, جۋىردا جىلىجاي شارۋاشىلىقتارىن قوسىمشا 30 مۆا-عا قوسۋعا ءوتىنىش كەلىپ تۇسكەن. جاڭا ەنەرگەتيكالىق وبەكتىنىڭ جاردەمىمەن قالالىق جىلۋ-ەلەكتر ورتالىعى, «ياسسى», «سەۆەر», «كوممۋنالنايا», «ساۋران» جانە «سولتۇستىك» قوسالقى ستانتسيالارى قۋاتتارىن ارتتىرىپ, وسى ارقىلى تۇركىستاننىڭ يندۋستريالىق ايماعىندا ورنالاسقان كاسىپورىندار قاجەتتى ەلەكتر ەنەرگياسىنا قول جەتكىزەدى. بۇل – جەرگىلىكتى ءوندىرىس ورىندارى ەلەكتر قۋاتىن «وڭتۇستىك جارىقتان» ەمەس, تىكەلەي KEGOC-تىڭ جەلىلەرىنەن الاتىن بولادى دەگەن ءسوز.
قوسالقى ستانتسيا تەحنولوگيالىق پروتسەستەردى باقىلايتىن اۆتوماتتى جۇيەمەن, ەلەكتر ەنەرگياسىنىڭ كوممەرتسيالىق ەسەبىن جۇرگىزەتىن اۆتوماتتى ولشەۋ قۇرىلعىسىمەن جانە تەحنيكالىق قاۋىپسىزدىك ماقساتىندا وبەكتىنى باقىلايتىن قۇرالدارمەن جابدىقتالعان. ديسپەتچەرلىك كەڭسەنىڭ كومپيۋتەر مونيتورىنا قوسالقى ستانتسيا جۇمىسىنىڭ بارلىق مالىمەتى ءتۇسىپ وتىرادى. بۇل ءوز كەزەگىندە ديسپەتچەرگە تەز ارەكەت ەتىپ, شۇعىل شەشىم قابىلداۋعا, جەلىدەگى اۆاريالىق ءوشۋدى بولدىرماۋعا, وسىلايشا, ءتيىمدى ءارى سەنىمدى قىزمەتتى قامتاماسىز ەتۋگە مۇمكىندىك بەرەدى.
– بۇل – زاماناۋي قوسالقى ستانتسيا, مۇندا تەك جاڭا قوندىرعىلار ورناتىلعان. مۇنداي ورىندا جۇمىس ىستەۋ مەن ءۇشىن ماڭىزدى ءارى قىزىقتى, – دەدى نۇر-سۇلتان قالاسىنان تۇركىستانعا جاڭا جۇمىسقا اۋىسىپ, كوشىپ كەلگەن كەزەكشى ەلەكترومونتەر نىعمەتالى سۇلتان. – مەن ءوزىم سارىاعاشتان بولامىن. KEGOC-تىڭ كونكۋرس جاريالاعانىن ەستىپ, قالاي دا قاتىسۋىم كەرەك دەپ شەشتىم. بايقاۋدان وتكەنىمە قۋانىشتىمىن. كومپانيادا جۇمىس ىستەۋ – مەن ءۇشىن زور مارتەبە, كاسىپورىننىڭ كەلەشەگىنەن دە مول ءۇمىت كۇتۋگە بولادى.
تاۋەلسىزدىك جىلدارى ىشىندە ەلىمىزدىڭ وڭتۇستىگىندە وسىنداي 220 كۆ قۋاتتى قوسالقى ستانتسيا العاش سالىنىپ وتىر.
– ەگەمەن ەل بولعالى تۇركىستان وبلىسىندا مۇنداي اۋقىمدى ەنەرگەتيكالىق جوبا بولماعان ەدى. وڭىردەگى ەلەكتر ەنەرگياسىنا قاجەتتىلىكتى ەسكەرىپ, تاعى وسىنداي بىرقاتار وبەكتىنى سالۋدى جوسپارلاپ وتىرمىز. وڭتۇستىك ايماقتى تۇراقتى ءارى سەنىمدى ەلەكتر قۋاتىمەن قامتاماسىز ەتۋ وتە ماڭىزدى. سول سەبەپتى ءبىزدىڭ كومپانيا بۇل باعىتتاعى ءتيىستى جۇمىستاردى جالعاستىراتىن بولادى, – دەدى «KEGOC» كومپانياسىنىڭ باسشىسى قانىش مولداباەۆ.