ۇلكەن قۇبىر جارىلىپ, جەر ءۇيدى سۋ باسقاندىقتان پاۆلودارلىق وتباسى جاۋاپتى كاسىپورىندى سوتقا بەرگەن بولاتىن, دەپ حابارلايدى Egemen.kz Pavlodarnews.kz-كە سىلتەمە جاساپ.
ەسكە سالساق, بىلتىر قىستا قالاداعى ءىرى كاسىپورىننىڭ بىرىنە سۋ جەتكىزەتىن قۇبىر جارىلىپ, شاشكين كوشەسى, 31/1 مەكەنجايىنداعى ءۇيدى سۋ باسقان. ۇيلەرى تۇرۋعا جاراماي قالعاندىقتان, وتباسى باسقا پاتەر جالداۋعا ءماجبۇر بولعان.
16 جاسقا تولماعان 4 بالانىڭ اناسى نۇرجان كامەسحانقىزى وتباسىمەن «پاۆلودار» قالالىق سۋ ارناسى جشس-ءىن سوتقا بەردى.
«سوت 7 ايعا سوزىلدى. قالالىق سوت 2 وتىرىس وتكىزىپ, كاسىپورىندى كىنالى دەپ تانىدى. سۋعا جاۋاپتى كاسىپورىن شەشىممەن كەلىسپەي, وبلىستىق سوتقا بەردى. وبلىستىق سوتتا دا ءبىز جەڭىپ شىقتىق», دەدى نۇرجان كامەسحانقىزى.
سوت شەشىمىمەن «پاۆلودار» قالالىق سۋ ارناسى جشس ءۇيىن سۋ باسقان وتباسىنىڭ پاتەر جالداۋ شىعىنىن وتەيتىن بولدى.
كوپبالالى وتباسى كەلىسىمشارتپەن 1 ماۋسىمعا دەيىن پاتەر جالداعان. ەندى كەلىسىمدى ۇزارتىپ, 1 جەلتوقسانعا دەيىن سوزباق.
«وسىنداي ءبىز سەكىلدى جاعدايعا قالعان ادامدارعا شىندىقتى دالەلدەپ شىعۋعا بولاتىنىن كورسەتكىم كەلەدى. كۇردەلى ماسەلە بولعان سوڭ ءۇنسىز قالىپ جاتاتىندار دا بار», دەدى نۇرجان كامەسحانقىزى.
سوتتا جەڭىپ شىققان وتباسى 1 جەلتوقسانعا دەيىن ۇيلەرىن جوندەپ الۋدى كوزدەپ وتىر. ەندىگى جوسپار كاسىپورىننان ۇيگە كەلگەن شىعىندى تالاپ ەتۋ.