16 شىلدە كۇنى وسكەمەندەگى ءۇلبى وزەنىندە سۋعا باتىپ بارا جاتقان 6 جاسار بالانى ۇلتتىق ۇلان جاۋىنگەرى تىلەك قۇمارباەكوۆ قۇتقارىپ قالعان بولاتىن. بۇگىن بالانى قۇتقارعان جاۋىنگەر ماراپاتتالدى, دەپ حابارلايدى Egemen.kz ۇلتتىق ۇلاننىڭ ءباسپاسوز قىزمەتىنە سىلتەمە جاساپ.
ابدەن شالدىعىپ, جول-جونەكەي ءبىرشاما سۋ جۇتىپ قويسا دا, بار كۇشىن سالىپ بالانى جاعاعا الىپ شىققان تىلەك ەسىنەن تانىپ قالعان. قۋانىشقا وراي سول ماڭدا دەمالىپ جۇرگەن كىسىلەر جەدەل جاردەم شاقىرىپ, قۇماربەكوۆ دەر كەزىندە قالالىق اۋرۋحانىنىڭ رەانيماتسيا بولىمىنە جەتكىزىلگەن.
كوزسىز ەرلىگى ءۇشىن 3477 اسكەري ءبولىمىنىڭ مامانى ەفرەيتور تىلەك قۇماربەكوۆ ىشكى ىستەر ءمينيسترىنىڭ ورىناسارى – ۇلتتىق ۇلان باس قولباسشىسى گەنەرال-مايور ەركىن بوتاقانوۆتىڭ بۇيرىعىمەن «ۇلتتىق ۇلان ۇزدىگى» توسبەلگىسىمەن ماراپاتتالدى.
وسكەمەندەگى انتيكريزيستىك وقۋ ورتالىعىندا باتىردىڭ قايسارلىعىن بارشا جەكە قۇرام الدىندا ۇلىقتاۋ ءارى وزگە دە اسكەري قىزمەتشىلەرگە ۇلگى ەتۋ ماقساتىندا سالتاناتتى شارا ءوتتى. ۇلىقتاۋ كەشىنە ءبولىم باسشىلىعىمەن قاتار تىلەكتىڭ اتا-اناسى, سونداي-اق «شىعىس» وڭىرلىك قولباسشىلىعىنىڭ تاربيە جانە الەۋمەتتىك-قۇقىقتىق جۇمىستارى جونىندەگى باسقارما باسشىلىعى قاتىستى.
اسكەري ءبولىم باسشىلىعى ۇلتتىق ۇلان باس قولباسشىسى اتىنان «ۇلتتىق ۇلان قىزمەتىنىڭ ۇزدىگى» توسبەلگىسىن جانە «شىعىس» وڭىرلىك قولباسشىلىعى قولباسشىسىنىڭ قۇقىعىمەن «قوعامدىق ءتارتىپتى ساقتاعانى ءۇشىن» توسبەلگىسىن ەفرەيتور تىلەك قۇماربەكوۆكە سالتاناتتى تۇردە تابىستادى.
ۇلىنىڭ باتىرلىعىن بارشا جەكە قۇرام الدىندا ۇلىقتاۋ ساتىنە كۋا بولعان اكەسى امانتاي قاشقانوۆ تا ءوز ريزاشىلىعىن جاسىرمادى:
- قادىرمەندى وفيتسەر مىرزالار, اسكەري ءبولىمنىڭ باسشىلىعى, بۇگىن مىنە, بالامنىڭ باتىل ارەكەتىن باتىرلىققا بالاپ, جوعارى باعا بەرىپ, قۇرمەتتەپ جاتقاندارىڭىزعا ۇلكەن العىس ايتقىم كەلەدى. اسكەري ادام بولعاسىن, قىزمەتتەرىڭىزگە ادال بولىپ, وسىلاي ادام ءومىرىن اجالدان ءجيى اراشالاپ تۇرۋعا جازسىن, - دەدى كوپشىلىك الدىندا ءسوز العان امانتاي قۇماربەك ۇلى.