نۇر-سۇلتان قالاسىندا قۇجاتسىز ادام تاسىمالداعان 26 تاكسي جۇرگىزۋشىسى ۇستالدى. بۇل تۋرالى قالالىق پد ءباسپاسوز قىزمەتى ءمالىم ەتتى, دەپ حابارلايدى Egemen.kz.
ولاردىڭ ىشىندە وزبەكستان مەن تاجىكستاننىڭ 3 ازاماتى بار. شەتەلدىكتەردىڭ زاڭسىز ارەكەتتەرىنەن سوڭ اكىمشىلىك حاتتاما تولتىرىلىپ, اۆتوكولىكتەر تۇراققا قويىلعان.
ايتا كەتۋ كەرەك, قازىر نۇر-سۇلتاندا «قاۋىپسىز جول» ايلىعى ءوتىپ جاتىر. شارا باستالعالى 3 مىڭعا جۋىق جول ەرەجەسىن بۇزۋ فاكتىسى انىقتالىپتى. ونىڭ 39-ىن قوعامدىق كولىك جۇرگىزۋشىلەرى جاساعان.
«قاۋىپسىزدىك بەلدىگىن تاقپاعانى ءۇشىن 500-دەن استام جۇرگىزۋشى, مانەۆر جاساۋ ەرەجەسىن بۇزعانى ءۇشىن 100-دەن استام, باعدارشامنىڭ تىيىم سالىنعان سيگنالىنا وتكەنى ءۇشىن 168 جانە قارسى جولاققا شىققانى ءۇشىن 22 جۇرگىزۋشىگە ايىپپۇل سالىندى. سونداي-اق بەينەباقىلاۋ كامەرالارى جول ەرەجەسىن ورەسكەل بۇزۋ فاكتىسىن تىركەدى. جۇرگىزۋشىگە قاتىستى قر اقبتك-ءنىڭ 593-بابىنىڭ 3-بولىگى بويىنشا اكىمشىلىك ءىس قوزعالدى, ماتەريالدار سوتقا جولداندى», دەدى قالالىق پد رەسمي وكىلى ەلميرا شاۋلەنوۆا.