كونفەرەنتسيالار ليگاسىنىڭ ەكىنشى ىرىكتەۋ كەزەڭىندەگى ماتچتا «استانا» پولشالىق «راكۋۆتان» تاعى دا جەڭىلىپ قالدى دەپ حابارلادى Egemen.kz Prosports.kz-كە سىلتەمە جاساپ.
«استانا ارەناداعى» قارىمتا كەزدەسۋ ەشتەڭە شەشپەيتىن ەدى. سەبەبى پولشادا وتكەن العاشقى ماتچتا «راكۋۆ» 5:0 ەسەبىمەن جەڭگەن بولاتىن.
دەگەنمەن, جانكۇيەرلەر استانالىق كوماندا قارىمتا كەزدەسۋدە جەڭىپ, ۋەفا كلۋبتارىنىڭ رەيتينگىندە قازاقستانعا ۇپاي سىيلايدى دەپ سەنگەن. بىراق پولشالىقتار «استانا ارەنادان» جەڭىسپەن قايتتى. كەزدەسۋدىڭ 16-مينۋتىندا ۋكراينالىق فۋتبولشى ۆلاديسلاۆ كوچەرگين الىستان ءدال سوققى جاساپ, ەسەپ اشتى. بۇل ويىنداعى جالعىز گول بولدى. كەزدەسۋ بارىسىندا ەلوردالىقتاردىڭ ەسەپتى تەڭەستىرەتىن مۇمكىندىگى بولا قويعان جوق.
وسىلايشا, «استانا» بيىلعى ەۋروكۋبوكپەن قوشتاسقان العاشقى قازاقستاندىق كلۋب بولىپ وتىر. كوماندا قاتارىنان ءۇشىنشى ەۋروماۋسىمدا جارىس جولىن ەرتە اياقتادى.