بۇل ىندەت قايتا اينالىپ سوققان داۋىلداي بولدى عوي. ادام تاڭدامايدى, جاسى بار, جاسامىسى بار الدىن الا جاراقتانباسا جىعىلۋى مۇمكىن. مەديتسينا سالاسى قانشا دامىدى دەسەك تە, ساقتىقتا قورلىق جوق. بۇگىندە جاھاندىق ىندەت جەتىسۋلىق دارىگەرلەردى ابىگەرگە سالۋدا.
جەتىسۋ وبلىسىنىڭ 28 مىڭنان استام تۇرعىنىنا Pfizer-ءدىڭ ۆاكتسيناسى قايتا ەگىلدى. بۇگىندە وڭىردە ۆاكتسينانىڭ العاشقى دوزاسىن العاندار سانى 316 671 ادامعا جەتتى, بۇل يممۋنداۋعا جاتاتىن ەرەسەك تۇرعىنداردىڭ 82,3 پايىزىن قۇرايدى. ال ەكىنشى كومپونەنتتى – 305 181 ازامات نەمەسە 79,3 پايىز تۇرعىن الدى. سونىمەن قاتار وبلىستا رەۆاكتسينالاۋ بويىنشا بەلسەندى جۇمىستار جۇرگىزىلۋدە. 27 شىلدەدەگى ستاتيستيكا بويىنشا وڭىردە رەۆاكتسينالاۋ كۋرسىنان 131 596 ادام ءوتتى, ياعني 60,2 پايىز. ونىڭ ىشىندە 28 933 ادام Pfizer-ءدىڭ كوميرناتي ۆاكتسيناسىمەن قايتا ۆاكتسينالاندى.
ساراپشىلاردىڭ پىكىرىنشە, ۆاكتسينا كوروناۆيرۋستان قىسقا ۋاقىتقا قورعايدى, سوندىقتان بۇگىندە يممۋنيتەتتى كۇشەيتۋ ءۇشىن قايتا رەۆاكتسينالاۋ كۋرسىنان ءوتۋ ۇسىنىلادى. قايتا ەگۋ باستاپقى ۆاكتسينالاۋ سياقتى يممۋندىق جۇيەگە ۆيرۋستىڭ كورىنىسىن «ەستە ساقتاۋعا» كومەكتەسەدى, ياعني ۆيرۋس شابۋىل جاساسا, يممۋندىق رەاكتسيانى جۇمىلدىرۋ تەزىرەك جۇرەدى جانە اۋرۋ اعىمى مەن ءولىم قاۋپى تومەندەيدى.
قايتا رەۆاكتسينالاۋ كۋرسىنا ءبىرىنشى كەزەكتە حالىقتىڭ وسال توپتارى: مەديتسينالىق-الەۋمەتتىك مەكەمەلەردىڭ پەرسونالى مەن كونتينگەنتى, جابىق بالالار مەكەمەلەرىنىڭ مەديتسينا قىزمەتكەرلەرى, پەداگوگتەر, الەۋەتتى قۇرىلىمداردىڭ قىزمەتكەرلەرى, 50 جاستان اسقان ادامدار جانە يممۋنيتەتى ءالسىز ادامدار جاتادى.
وسى ۆاكتسينامەن يممۋنداۋ جۇمىستارى جاسوسپىرىمدەر, جۇكتى جانە بالا ەمىزەتىن ايەلدەر اراسىندا دا جالعاسۋدا. قازىرگى ۋاقىتتا ۆاكتسينالانعان حالىق سانى 34 948 ادامدى قۇرايدى, ونىڭ ىشىندە 24 677 ءجاسوسپىرىم, 1 073 جۇكتى ايەل جانە لاكتاتسيا كەزەڭىندەگى 5 269 ايەل بار. ۆاكتسينانىڭ ەكىنشى كومپونەنتىن 32 689 ازامات الدى. ونىڭ ىشىندە 12-17 جاس ارالىعىنداعى جاسوسپىرىمدەر – 23 430 بولسا, 971-ءى – جۇكتى جانە 4 955-ءى – بالا ەمىزەتىن كەلىنشەكتەر.
جەتىسۋ وبلىسى