تاياۋدا ەرتىستە باتىپ بارا جاتقان ادامدى قۇتقارىپ قالعان سەمەيلىكتەردىڭ ەرلىگى ەسكەرۋسىز قالمادى. اتاپ ايتقاندا, اباي وبلىسىنىڭ توتەنشە جاعدايلار دەپارتامەنتى باسشىسىنىڭ مىندەتىن ۋاقىتشا اتقارۋشى الەكسەي شتىكەل بەيبىت كۇننىڭ باتىرلارىنا قۇرمەت كورسەتتى.
الدىمەن دەپارتامەنت باسشىسى جۋىردا «پونتون كوپىرى» اۋدانىندا سۋعا اعىپ كەتە جازداعان بالانىڭ جانىن ساقتاپ قالعان دارحان مۇحامەدجانوۆتى ارنايى گراموتامەن ماراپاتتادى. ول بالىق اۋلاپ جۇرگەن كەزىندە وزەندە تۇنشىعىپ جاتقان بالانى بايقاپ, دەر كەزىندە كومەككە كەلگەن. انىقتاي كەلە ءجاسوسپىرىم اعىن سۋمەن قالقىعان اياقكيىمىنە قاراي ۇمتىلعان, الايدا وزەننەن شىعا الماي قالعان. ابىروي بولعاندا, ونىڭ قاسىنان د.مۇحامەدجانوۆ تابىلا بىلگەن.
ەكىنشى وقيعاعا كەلسەك, شىلدەنىڭ 24-دە «نەفتەبازا» اۋدانىنداعى ەرتىس وزەنىنىڭ وڭ جاعالاۋىندا 1983 جىلعى ەر ادام شومىلىپ ءجۇرىپ سۋعا باتا باستاعان. ونى جاعالاۋدا دەمالىپ جاتقان سەرگەي فومينىح, ەرجان جاڭگىروۆ جانە ۆيكتور گلينسكيح بايقاپ, جانىنا اراشا تۇسكەن. زارداپ شەككەن ازاماتتى جاعاعا شىعارىپ, العاشقى مەديتسينالىق كومەك كورسەتىپ بولعان سوڭ جەدەل جاردەم دارىگەرلەرىنە تاپسىرعان.
«رەانيماتسيالىق ارەكەتتىڭ 4-ءشى مارتەسىندە ەر ازامات ەسىنە كەلىپ, ونى جەدەل جاردەم دارىگەرلەرىنە تاپسىردى. بەلگىلى بولعانداي, زارداپ شەگۋشى دوسىمەن بىرگە وزەننىڭ بەلگىلەنبەگەن جەرىندە شومىلىپ جۇرگەندە ەسىنەن تانىپ قالعان», دەلىنگەن توتەنشە جاعدايلار دەپارتامەنتى تاراتقان اقپاراتتا.
بەلگىلى بولعانداي, قالا تۇرعىنى سەرگەي فومينىح سۋدا ەشبىر قيمىلسىز قالقىپ بارا جاتقان ەر ادامدى بايقاپ, سول ساتتە كومەككە ۇمتىلادى. وعان ەر ازاماتتى وزەننەن الىپ شىعۋعا ەرجان جاڭگىروۆ كومەكتەسكەن. ولار زارداپ شەككەن ادامعا بىردەن العاشقى مەديتسينالىق كومەك كورسەتە باستاعان. قۇتقارۋشىلاردىڭ قاتارىنا ۆيكتور گلينسكي ەسىمدى قالا تۇرعىنى دا قوسىلىپ, رەانيماتسيالىق ارەكەتتەر جاساۋعا جاردەمدەسىپتى.
«ادامداردىڭ جانىن ساقتاپ قالعاندارىڭىزعا مىڭ العىس. سىزدەردىڭ ەرلىكتەرىڭىز تەك قۇرمەتكە لايىق. ناعىز باتىرسىزدار. ەرلىكتىڭ, باتىلدىقتىڭ, قايسارلىقتىڭ ايقىن ۇلگىسى وسىنداي بولسا كەرەك», دەدى ا.شتىكەل.
البەتتە, مۇنداي ازاماتتاردىڭ قارەكەتى قانشا ايتساق تا ماقتاۋعا جاراسادى. دەسە دە توتەنشە جاعدايلار قىزمەتى شومىلۋ ماۋسىمىندا سۋداعى قاۋىپسىزدىك ەرەجەلەرىن مەيلىنشە قاتاڭ ساقتاۋ كەرەكتىگىن ەسكەرتەدى. اسىرەسە ىشىمدىك ىشكەن ازاماتتارعا شومىلماۋعا, بالالاردى قاراۋسىز قالدىرماۋعا, جالعىز سۋدا جۇزبەۋگە, بەيتانىس جەرلەردە شومىلۋدان اۋلاق بولۋعا, ءجۇزۋ داعدىلارىن مەڭگەرمەگەندەرگە سۋعا جاقىنداماۋعا جانە شەكتەۋ بەلگىلەرىنەن ءارى جۇزبەۋگە كەڭەس بەرەدى. ەگەر دە قاۋىپ تونگەن جاعدايدا نەمەسە جازاتايىم وقيعانىڭ كۋاگەرى بولساڭىز 112 نومىرىنە دەرەۋ قوڭىراۋ شالعان ءجون. قۇتقارۋشىلار ءوزىڭىزدىڭ جانە وزگەنىڭ ومىرىنە بەيجاي قاراماۋعا شاقىرادى. «ساقتانساڭ عانا ساقتايدى», دەگەن قاعيدانى ەستەن شىعارماعان ابزال.
اباي وبلىسى