اق ساۋىتىن كيىنىپ, اتا-بابانىڭ اق تۋىن كوتەرىپ, قازاق دالاسىنىڭ اۋماقتىق تۇتاستىعى مەن شەكارا شەبىنىڭ بۇتىندىگىن قاس قاقپاي كۇزەتىپ, قاسىق قانى قالعانشا جوڭعارلارمەن ايقاسىپ, قاسيەتتى اتامەكەننىڭ سىنىق سۇيەم توپىراعىن جاۋعا تاپتاتپاي ازات ەتكەن ارۋاقتى باتىر, قاھارمان حاندار, اقىلمان بيلەر بۇگىنگى الەۋەتتى دە ساۋلەتتى قازاق ەلىنىڭ تەرەڭ تامىرىنا ءنار بەرەتىن سارقىلماس قۋات دەسەك بولادى. سونداي تۇلعالاردىڭ ءبىرى – بيىل تۋعانىنا 300 جىل تولىپ وتىرعان جاۋجۇرەك ساردار, قابىرعالى بي, كورەگەن قولباسى ەر جانىبەك بەرداۋلەت ۇلى. وسىعان وراي شىعىس قازاقستان وبلىسى اكىمدىگى «ەل قورعانى – ەر جانىبەك» اتتى رەسپۋبليكالىق اشىق ءمۇشايرا جاريالايدى.
ءمۇشايرانىڭ ماقساتى – ەرەگەسكەن جاۋىن جەر جاستاندىرعان, ەلىنىڭ شەكاراسىن كەۋدەسىمەن قورعاعان باتىر بابا ەر جانىبەكتىڭ جەڭىمپازدىق جولىن جىر جولىمەن ورنەكتەۋ. سونىمەن قاتار, ەر جانىبەكپەن بىرگە ەل نامىسىن قورعاعان كوسەم, ءسوز باستاعان شەشەن حان ابىلاي, قاراكەرەي قابانباي, قانجىعالى بوگەنبەي, شاپىراشتى ناۋرىزباي, تولە, ايتەكە, قازىبەك بيلەر سەكىلدى كوپتەگەن تاريحي تۇلعالاردىڭ ىنتىماعى مەن ەلدى بىرىكتىرۋ جولىندا اتقارعان ولشەۋسىز ەڭبەگىن ولەڭمەن دارىپتەپ, جاستارعا ۇلگى ەتۋ. ەر جانىبەكتىڭ سوڭىندا قالعان مۇراعاتتاعى اڭىز-ءاپسانالار, شەشەندىك سوزدەر, مۋزەيدەگى جورىق ساپتىاياعى, قحر-داعى قازاقتار اراسىنان تابىلعان تۋى سالىنعان ساندىق, كەزدىك سەكىلدى مۇرالارىن ولەڭ جىرعا وزەك ەتە وتىرىپ, باتىردىڭ داڭقتى جولى بۇگىنگى ۇرپاققا جالعاسقانىن ماداق ەتۋ. ەر جانىبەكتىڭ ەلىنىڭ بىرلىگى مەن ىنتىماعى, جەرىنىڭ اۋماقتىق تۇتاستىعى, حالقىنىڭ ىرىس-بەرەكەسى جولىندا ءومىرىن سارپ ەتكەن قابىرعالى بي, كورەگەن قولباسشى رەتىندەگى تۇلعاسىن سومداپ, ولەڭمەن ورنەكتەۋ. ەڭ نەگىزى – ەل باسىنا كۇن تۋعان القاكول سۇلاما, اقتابان شۇبىرىندىدان حالقىن قۇتقارىپ, ۇرپاعىن بۇگىنگى كۇنگە امان-ەسەن جەتكىزۋگە نەگىز قالاعان قاھارمان تۇلعالاردىڭ جيىنتىق بەينەسىن, زامانا بەدەرىن توپتاستىرا سومداۋ.
باتىر بابانىڭ كەسكىن-كەلبەتىن جىر تىلىمەن ايشىقتى سومداپ, وقىرماننىڭ پاتريوتتىق سەزىمىنە اسەر ەتىپ, جۇرەگىن تەربەتە الاتىن كوركەم تۋىندىعا جۇلدە بەرىلەدى. مۇشايراعا ەش جەردە جارىق كورمەگەن ولەڭدەر, تولعاۋلار, پوەمالار قابىلدانادى.
باس جۇلدە – جەڭىل اۆتوكولىك; ءبىرىنشى ورىن – بىرەۋ; ەكىنشى ورىن – ەكەۋ; ءۇشىنشى ورىن – ۇشەۋ; ىنتالاندىرۋ سىيلىقتارى – بەسەۋ.
مۇشايراعا قاتىسۋشىلاردىڭ شىعارمالارى كومپيۋتەرگە باسىلعان بەس دانادان كەم ەمەس جانە ەلەكتروندى نۇسقاسىمەن 2014 جىلدىڭ 1 تامىزىنا دەيىن مىنا مەكەنجايعا كەلىپ ءتۇسۋى كەرەك: يندەكس: 010000, استانا قالاسى, اۋەزوۆ كوشەسى, 20 «ا», ساكەن سەيفۋللين مۇراجايى. تەل: 32-84-67, 53-34-03, e-mail:astanakalamger@mail.ru.
ءمۇشايرا قورىتىندىسى 2014 جىلدىڭ 15 تامىز كۇنى شىعارىلادى. جۇلدەگەرلەردىڭ وسكەمەن قالاسىنا كەلىپ-كەتۋ جول شىعىنى مەن جاتار ورنى ماسەلەسىن ۇيىمداستىرۋ كوميتەتى موينىنا المايدى. قازىلار القاسىنىڭ شەشىمى قايتا قارالمايدى دەپ حابارلادى ۇيىمداستىرۋ كوميتەتى.