ەلدەگى زاماناۋي اقپاراتتىق تەحنولوگيالاردى دامىتۋ ماقساتىندا وسىدان 15 جىلداي بۇرىن قۇرىلعان «زەردە» ۇلتتىق ينفوكوممۋنيكاتسيا حولدينگى» اق باسىنان سوڭعى جىلدارى «بۇلت ارىلعان» جوق. بۇگىنگە دەيىن ەش جەردە اتى شىقپاي, ەلەۋسىز جۇمىس ىستەپ كەلگەن مەملەكەتتىك كومپانيا رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ تەكسەرىسىنەن كەيىن بىردەن اقپارات قۇرالدارىنىڭ نازارىنا ىلىكتى. بۇل ماسەلە پرەزيدەنتكە دەيىن جەتىپ, اقىر سوڭىندا حولدينگ جابىلاتىنى بەلگىلى بولدى.
ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقاەۆ «زەردە» حولدينگىنىڭ جۇمىسىنا كۇمان كەلتىرىپ, ماسەلەنى جان-جاقتى قاراستىرۋدى تاپسىرعان. ىلە تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين «زەردە» حولدينگىن تاراتىپ جىبەرۋ ۇسىنىلاتىنىن حابارلادى. ال جاقىندا مينيسترلىك حولدينگكە بايلانىستى وزدەرىنىڭ رەسمي ۇستانىمىن جاريالادى. ۆەدومستۆونىڭ ءباسپاسوز قىزمەتىنىڭ حابارلاۋىنشا, «زەردە» حولدينگى وبەكتيۆتى جانە سۋبەكتيۆتى سەبەپتەرگە بايلانىستى اقپاراتتىق كوممۋنيكاتسيالىق تەحنولوگيالار سالاسىن دامىتۋدىڭ تولىققاندى ينستيتۋتى رەتىندە قالىپتاسا الماعان. «بۇگىندە «زەردە» حولدينگى دەربەس تابىس اكەلمەيدى جانە ءوز كەزەگىندە «ەلەكتروندى ۇكىمەتتىڭ» اقپاراتتىق-كوممۋنيكاتسيالىق ين- فراقۇرىلىمى وپەراتورىنىڭ فۋنكتسيالارىن جۇزەگە اسىرۋعا مەملەكەتتەن تاپسىرىستار الاتىن «ۇلتتىق اقپاراتتىق تەحنولوگيالار» اق-نىڭ ديۆيدەندتەرى ەسەبىنەن قارجىلاندىرىلادى. مۇنى اۋديتورلىق ەسەپتەر دە راستايدى», دەلىنگەن حابارلامادا.
2021 جىلدىڭ قورىتىندىسى بويىنشا «زەردە» حولدينگىنىڭ تابىسى «ەلەكتروندى ۇكىمەتتىڭ» اقپاراتتىق كوممۋنيكاتسيا ينفراقۇرىلىمى مەن اقپاراتتاندىرۋ وبەكتىلەرىن زەرتتەۋ جۇمىستارى ەسەبىنەن ۇلعايعان. وسىلايشا, جاقسى تابىسقا قول جەتكىزگەنىمەن كومپانيا جىلدىڭ سوڭىندا قايتادان شىعىنعا ۇشىراعان. رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ەسەبىنشە حولدينگتىڭ جيناقتالعان شىعىنى 7 ملرد تەڭگەنى قۇراعان.
قازىرگى ۋاقىتتا «زەردە» حولدينگىنىڭ قۇرىلىمىندا ءۇش ەنشىلەس ۇيىم بار: Astana Hub تەحنوپاركى, «ۇلتتىق اقپاراتتىق تەحنولوگيالار» جانە Qazinnovations اكتسيونەرلىك قوعامدارى. حولدينگ تاراتىلعاننان كەيىن بۇل ەنشىلەس ۇيىمدار تسيفرلىق دامۋ مينيسترلىگىمەن جانە مەملەكەتتىك ورگاندارمەن تىكەلەي جۇمىس ىستەيدى.
«بۇگىندە ءبىزدىڭ الدىمىزدا جاڭا ستراتەگيالىق مىندەتتەر مەن تسيفرلاندىرۋ قارقىنىن جەدەلدەتۋ ماسەلەسى تۇر. سونىمەن قاتار اقپاراتتىق كوممۋنيكاتسيالىق تەحنولوگيالار سالاسىن باسقارۋدىڭ ساپالى جاڭا تەتىگىن قۇرۋىمىز قاجەت. بۇل رەتتە الداعى ترانسفورماتسيا كورپوراتيۆتىك باسقارۋدىڭ حولدينگتىك قۇرىلىمىن تاراتۋعا قاتىستى ەكەنىن اتاپ وتەمىز جانە بۇل وزگەرىستەر «زەردە» حولدينگىنىڭ وندىرىستىك پەرسونالىنا اسەر ەتپەيدى», دەيدى مينيسترلىك وكىلدەرى.
اتالعان مەملەكەتتىك ورگان «زەردەنىڭ» قولىندا بولعان «سەرۆيستىك ينتەگراتور» فۋنكتسيالارىن «تسيفرلى ۇكىمەتتى قولداۋ ورتالىعى» رمك-عا بەرۋ تۋرالى شەشىم قابىلداعان. ونىڭ نەگىزگى مىندەتتەرى – مەملەكەتتىك باسقارۋدى تسيفرلى ترانسفورماتسيالاۋ پروتسەستەرىن ادىستەمەلىك جانە ۇيىمداستىرۋشىلىق سۇيەمەلدەۋ جانە بارلىق ۇلتتىق جوبا مەن باعدارلامالىق قۇجاتتىڭ ىسكە اسىرىلۋىنا مونيتورينگ جاساۋ. سول سەبەپتى مەملەكەت باسشىسىنىڭ تىكەلەي تاپسىرماسى بويىنشا تسيفرلى ۇكىمەتتى قولداۋ ورتالىعى مەملەكەتتىك ورگاندار ءۇشىن جەتەكشى تالداۋ ورتالىعى رەتىندە قۇرىلىپ وتىر جانە وسى ورتالىقتىڭ قۇرامىندا تسيفرلى ترانسفورماتسيا ورتالىعى دا جۇمىس ىستەمەك. حولدينگتىڭ بۇرىنعى قىزمەتكەرلەرى دە تسيفرلى ۇكىمەتتى قولداۋ ورتالىعىنا جۇمىسقا اۋىسادى جانە وزدەرىنە تيەسىلى بارلىق تولەمدى تولىق كولەمدە الادى دەپ ۋادە بەرەدى مينيسترلىك. «بۇگىنگى تاڭدا كادرلىق الەۋەتتى ساقتاي وتىرىپ, مەملەكەتتىك IT-سەكتورىن باسقارۋدى رەفورمالاۋ – ءبىزدىڭ نەگىزگى باسىمدىعىمىز. بۇل مينيسترلىكتىڭ, «زەردە» حولدينگىنىڭ جانە ونداعى ەنشىلەس ۇيىمداردىڭ ورتاق مىندەتى. مينيسترلىك قىزمەتكەرلەردىڭ ەڭ جوعارى الەۋمەتتىك قورعالۋىن قامتاماسىز ەتۋ قاجەتتىگىن جانە كەيىننەن ولاردىڭ ماماندىعى مەن بىلىكتىلىگىنە سايكەس جۇمىسقا ورنالاسۋىن ەسكەرە وتىرىپ, ولاردىڭ مۇددەلەرىن نەگىزگە الاتىن بولادى. حولدينگتى تاراتۋ كەزىندە قىزمەتكەرلەر وزدەرىنىڭ الداعى ەڭبەك قىزمەتىنىڭ پەرسپەكتيۆالارىنا قاتىستى دۇرىس شەشىم قابىلداۋى ءۇشىن بۇكىل پروتسەسس اشىق جانە ايقىن وتەدى», دەلىنگەن ءباسپاسوز حابارلاماسىندا.
20 شىلدە كۇنى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى ب.مۋسين حولدينگ ۇجىمىمەن ارنايى كەزدەسىپ قايتتى. بۇل جۇزدەسۋدە الداعى جوسپارلار تالقىلانىپ, حولدينگتى تاراتۋ پروتسەسى جان-جاقتى ايتىلعان. «تاراتىلىپ جاتقان حولدينگ قىزمەتكەرلەرىنىڭ باسىم كوپشىلىگى جاڭا جوبالارمەن بىرلەسىپ جۇمىس ىستەۋدى جالعاستىراتىنىن جانە تسيفرلى ۆەدومستۆو جۇيەسىندە قالادى دەپ ۇمىتتەنەمىز», دەيدى مينيسترلىك ماماندارى.