تاياۋدا مەملەكەت باسشىسى قاسىم-جومارت توقاەۆ «قر كەيبىر زاڭنامالىق اكتىلەرىنە يننوۆاتسيالاردى ىنتالاندىرۋ, تسيفرلاندىرۋدى, اقپاراتتىق قاۋىپسىزدىكتى دامىتۋ جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. وسىعان سايكەس, ەندى ەلەكتروندى قۇجاتتار زاڭ جۇزىندە ونىڭ قاعاز تۇپنۇسقاسىمەن تەڭ دارەجەدە قولدانىلادى. ال اۋىلدىق جەرلەردە ۇيالى بايلانىستىڭ ساپاسى ناشار بولعانى ءۇشىن وپەراتورلار جاۋاپقا تارتىلادى.
بۇل قۇجات قازاقستاندى تسيفرلاندىرۋ ماقساتىندا قابىلدانعانى بەلگىلى. ءماجىلىس دەپۋتاتى, Amanat پارتياسىنىڭ IT-كوميتەتىنىڭ ءتورايىمى ەكاتەرينا سمىشلياەۆانىڭ ايتۋىنشا, زاڭنىڭ ماڭىزدى تارماقتارىنىڭ ءبىرى اۋىلدىق ەلدى مەكەندەردەگى بايلانىس ساپاسىن جاقسارتۋ بولىپ وتىر.
«ەنەرگەتيكالىق ينفراقۇرىلىمعا سۇيەنە وتىرىپ, وپتيكالىق-تالشىقتى بايلانىس جەلىسىن اۋەدەن تارتۋ جونىندەگى پارتيالىق باستامانى بارلىق مۇددەلى مەملەكەتتىك ورگاندار قولدادى. ەلىمىزدە ەلەكتر جەلىسى قارقىندى دامىعان. ءتىپتى شالعاي اۋىلدىق ەلدى مەكەندەردە دە قۋات كوزى بار. بايلانىس جەلىسىن اۋە ارقىلى تارتۋ – ارزان ءارى جىلدام. تسيفرلاندىرۋ تۋرالى زاڭ اۋىلدارعا ساپالى ينتەرنەتتى تەزىرەك جەتكىزۋگە كومەكتەسەدى. بۇل رەتتە, جاۋاپسىز وپەراتورلارعا قاتىستى ايىپپۇل سانكتسيالارى قولدانىلادى», دەدى دەپۋتات.
سونداي-اق جاڭا قۇجاتتا ەGovMobile ءموبيلدى قوسىمشاسىن قولدانۋ اياسىن كەڭەيتۋ كوزدەلگەن. بۇل قوسىمشاعا ەندى 20-عا جۋىق قۇجات جيناقتالماق. سوعان سايكەس, ازاماتتاردان قۇجاتتاردىڭ تۇپنۇسقاسى تالاپ ەتىلمەيدى. قۇجاتتاردىڭ تسيفرلىق نۇسقاسى قاعاز نۇسقامەن تەڭ دەپ تانىلدى. سونىمەن قاتار قۇجاتتى تۇرعىلىقتى جەرگە قاراماستان, ەلىمىزدىڭ كەز كەلگەن حالىققا قىزمەت كورسەتۋ ورتالىعىنان الۋعا بولادى.
تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى تسيفرلىق ترانسفورماتسيا دەپارتامەنتىنىڭ ديرەكتورى نازگۇل باجاەۆانىڭ ايتۋىنشا, «قازپوشتا» اق بازاسىندا مەملەكەتتىك قىزمەتكە قولجەتىمدىلىگىن كەڭەيتۋگە مۇمكىندىك بەرەتىن تسيفرلىق ورىندار قۇرۋ جوسپارلانعان.
«بۇگىندە اۋىل تۇرعىندارىنا مەملەكەتتىك قىزمەتتەردى الۋ ءۇشىن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ بولىمشەلەرى ورنالاسقان اۋدان ورتالىقتارىنا نەمەسە قالالارعا بارىپ, ۋاقىت پەن قاراجات شىعىنداۋعا تۋرا كەلەدى. تسيفرلىق ورىندار – كومپيۋتەرمەن جانە ۇيىمداستىرۋ تەحنيكاسىمەن جابدىقتالعان, ينتەرنەتكە قولجەتىمدى, ازاماتتارعا قىزمەتتەردى ءوز بەتىنشە الۋعا مۇمكىندىك بەرەتىن جۇمىس ورنى. وسىعان ۇقساس تسيفرلىق ورىندار قازپوشتانىڭ 2 مىڭ اۋىلدىق بولىمشەسىندە اشىلادى. بۇل كۇندەرى مۇنداي تسيفرلىق ورىندار شىعىس قازاقستان وبلىسىندا قاناتقاقتى رەجىمدە جۇمىس ىستەپ جاتىر», دەيدى ن.باجاەۆا.
سونداي-اق سالاداعى بىلىكتى كادرلاردىڭ تاپشىلىعى ماسەلەسىن شەشۋ بويىنشا بىرقاتار شارا قابىلدانىپ جاتىر. ماسەلەن, جاس مامانداردى تارتۋ ماقساتىندا باعدارلامالاۋ مەكتەپتەرىندە ءبىلىم الۋعا ارنالعان ارنايى گرانتتار قاراستىرىلدى. بۇل جوبا Astana Hub جانە IT-مەكتەپتەرمەن بىرلەسىپ ىسكە اسىرىلادى. 2025 جىلدىڭ سوڭىنا دەيىن كەمىندە 20 مىڭ بىلىكتى IT-مامانىن دايىنداۋ جوسپارلانىپ وتىر.
ايتا كەتەرلىگى, زاڭدا العاش رەت تسيفرلىق ترانسفورماتسيا تەرمينى قولدانىلدى. مۇنداعى ماقسات – ازامات پەن مەملەكەت اراسىنداعى اراقاشىقتىقتى بارىنشا قىسقارتۋ. ازامات مەملەكەت ءۇشىن كليەنت سانالادى. تسيفرلىق ترانسفورماتسيانىڭ ناقتى مىسالى وسى. كوپ ادام اۆتوكولىكتى قايتا رەسىمدەۋ ءۇشىن Kaspi.kz قوسىمشاسىن پايدالانادى. بۇگىندە 2 ميلليونعا جۋىق ادام مامانداندىرىلعان حالىققا قىزمەت كورسەتۋ ورتالىقتارىنا بارمايدى. بۇل جەكە سەكتور مەن مەملەكەت كووپەراتسياسىنىڭ بىرەگەي ۇلگىسى سانالىپ وتىر.