شەتەل ارحيۆتەرىنەن احمەت بايتۇرسىن ۇلى مەن «الاش» قايراتكەرلەرى تۋرالى دەرەكتەر ىزدەيتىن 10 عالىمنان تۇراتىن توپ قۇرىلىپ, جۇمىسقا كىرىستى, دەپ حابارلايدى Egemen.kz.
بۇل تۋرالى ءتىل ساياساتى كوميتەتىنىڭ توراعاسى ادىلبەك قابا ءوزىنىڭ Facebook-تەگى پاراقشاسىندا جازدى.
«ۇلت ۇستازى احمەت بايتۇرسىن ۇلى مەن «الاش» قوزعالىسىنىڭ باسقا دا كورنەكتى قايراتكەرلەرى تۋرالى شەتەل ارحيۆتەرىندە ساقتالعان دەرەكتەردى ىزدەستىرىپ, تابىلعان جاعدايدا ولاردى عىلىمي اينالىمعا ەنگىزۋ ءۇشىن ءتىل ءبىلىمى, ادەبيەت جانە تاريح سالاسى عالىمدارىنان قۇرالعان جۇمىس توبى جاساقتالدى.
10 ادامنان تۇراتىن ەكسپەديتسيانىڭ العاشقى لەگى جوسپارعا سايكەس جانە الاشتانۋشى, احمەتتانۋشى عالىمداردىڭ ۇسىنىستارى بويىنشا رەسەيدىڭ ماسكەۋ, سانكت-پەتەربۋرگ قالالارىنداعى, تاتارستاننىڭ قازان قالاسىنداعى مەملەكەتتىك ارحيۆتەرىنە بارىپ, قازاق اعارتۋشىلارىنىڭ ەڭبەكتەرىن ىزدەستىرىپ قايتتى.
بۇگىنگى كۇنى بۇل جۇمىستار ورىنبور وبلىسىنىڭ مەملەكەتتىك ءارحيۆى مەن ومبى وبلىسىنىڭ تاريحي ارحيۆىندە جۇرگىزىلۋدە», دەپ جازدى كوميتەت باسشىسى.
ونىڭ ايتۋىنشا, الدا تاشكەنت, ترويتسك, حەلسينكي قالالارىنداعى ارحيۆتەردى ارالاۋ جوسپارلانعان.
«بۇرىن ەشبىر جەردە جاريالانباعان تىڭ دەرەكتەر تابىلىپ جاتسا, جوسپارلانعان جيناققا ەنىپ, كوپشىلىك كوزايىمىنا اينالادى. جوبا اياسىنداعى العاشقى ەكى اي تەك قانا ۇيىمداستىرۋشىلىق جۇمىستارعا ارنالسا, قالعان ءتورت اي ىشىندە ارحيۆتەردەن ءتيىستى ماتەريالدار ىزدەستىرۋ, تەحنيكالىق وڭدەۋ, ساراپتاۋ جانە جيناقتى ازىرلەۋ جۇمىستارى جۇرگىزىلەدى», دەيدى ادىلبەك قابا.