وسكەمەن قالاسىندا سوقتىعىسقان ەكى جۇك كولىگىندەگى ءبىر ادام كوز جۇمىپ, ەكەۋى جاراقات الدى, دەپ حابارلايدى Egemen.kz.
شقو پوليتسيا دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, جول-كولىك وقيعاسى قالا ىرگەسىندەگى اينالما جولدا بولعان.
«گاز 330210» ماركالى جۇك كولىگىنىڭ 62 جاستاعى جۇرگىزۋشىسى رۋلگە يە بولا الماي قالىپ, الدىندا كەلە جاتقان «گاز 53ب» كولىگىمەن سوقتىعىسقان. سونىڭ سالدارىنان «گاز 330210» كولىگىندەگى 36 جاستاعى جولاۋشى جادەل جاردەم كولىگىندە كوز جۇمدى. سول كولىكتەگى جۇرگىزۋشى مەن 15 جاستاعى ەكىنشى جولاۋشى ءتۇرلى دەڭگەيدەگى دەنە جاراقاتتارىمەن مەديتسينالىق مەكەمەگە جەتكىزىلدى», دەلىنگەن اقپاراتتا.
قازىرگى ۋاقىتتا اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 345-بابى 3-بولىگىنە سايكەس سوتقا دەيىنگى تەرگەۋ امالدارى باستالدى.