ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا جامبىل وبلىسىنا جۇمىس ساپارى بارىسىندا ۇكىمەتتىك ەمەس ۇيىم وكىلدەرىمەن, كوپبالالى انالارمەن جانە زەينەتكەرلەرمەن كەزدەستى, دەپ حابارلايدى Egemen.kz.
مينيستر بالالى وتباسىلاردى جانە مۇگەدەكتىگى بار ادامداردى الەۋمەتتىك قولداۋ شارالارى تۋرالى ايتتى.
ءسوزىنىڭ باسىندا تامارا دۇيسەنوۆا 2021 جىلى مەملەكەتتىك بيۋدجەتتەن تولەنەتىن زەينەتاقىلار مەن الەۋمەتتىك جاردەماقىلارعا شامامەن 4 تريلليون تەڭگە بولىنگەنىن اتاپ ءوتتى. بۇل قاراجات 5,6 ميلليون ازاماتقا تولەندى. مينيستر بارلىق تولەمدەردىڭ جىل سايىن ارتاتىنىن ايتتى.
بيىل 1-ءشى قاڭتاردان باستاپ بازالىق زەينەتاقى مەن جاردەماقى 5%-عا, ىنتىماقتى زەينەتاقى 7%-عا يندەكستەلدى. ال 1-ءشى ساۋىردەن باستاپ يننفلياتسيا ءدالىزىن قايتا قاراۋعا بايلانىستى بارلىق زەينەتاقى مەن جاردەماقى تاعى 4%-عا كوبەيدى. جامبىل وبلىسىندا 355,8 مىڭ ادام زەينەتاقى مەن جاردەماقى الادى.
«مەملەكەت بالالى وتباسىلاردى الەۋمەتتىك قولداۋعا ەرەكشە كوڭىل بولەدى. الەۋمەتتىك قولداۋ بيۋدجەتتەن تولەنەتىن جاردەماقىلاردىڭ 5 ءتۇرىن جانە مەملەكەتتىك الەۋمەتتىك ساقتاندىرۋ قورىنان تولەنەتىن تولەمدەردىڭ 2 ءتۇرىن قامتيدى. جامبىل وبلىسى بويىنشا 126 مىڭنان استام بالالى وتباسى جاردەماقى مەن تولەم تۇرلەرىن الدى. تولەمدەردىڭ جالپى سوماسى 30,7 ميلليارد تەڭگەنى قۇرادى», دەدى مينيستر.
بۇدان بولەك كەزدەسۋدە قازاقستاندىقتاردى لايىقتى زەينەتاقىمەن قامتۋ, مۇگەدەكتىگى بار ادامداردىڭ ءومىر ساپاسىن جاقسارتۋ ماسەلەلەرى, الەۋمەتتىك قىزمەتتەر پورتالىن جەتىلدىرۋ, ازىرلەنىپ جاتقان الەۋمەتتىك كودەكستەگى قازاقستاندىقتاردى قولداۋ شارالارى تالقىلاندى. كەزدەسۋگە قاتىسۋشىلار وزدەرىنىڭ سۇراقتارىنا جاۋاپ الىپ, ۇسىنىستارىن ءبىلدىردى.