جابايى قۇستىڭ ۋ-شۋى كوپ قالاعا كىرگەنىن كورىپ پە ەدىڭىز؟ الايدا مۇنايلى شاھارداعى تۇرعىن ءۇي الابىندا جايباراقات جۇرگەن كوكقۇتان تۇرعىنداردى تاڭداندىرعانى داۋسىز. قۇستىڭ تۇرعىن ءۇي الابىنا كەلۋىنە ۇشا الماعانى سەبەپ بولۋى مۇمكىن.
وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باس مامانى نۇرلان يمانعاليەۆتىڭ ايتۋىنشا, جابايى قۇستى قالاداعى «اۆانگارد-3» شاعىن اۋدانى تۇرعىنىنىڭ ءبىرى – ناتاليا ەسىمدى ايەل ۇستاپ العان. ول جابايى قۇستى تابيعي مەكەنىنە جىبەرۋ ءۇشىن ەرىكتىلەردەن كومەك سۇراعان.
ال ەرىكتىلەر جابايى قۇس تۋرالى دەرەكتى ينسپەكتسياعا حابارلاعان. ينسپەكتسيا ماماندارى تۇرعىننىڭ ۇيىندەگى جابايى قۇستىڭ كوكقۇتان ەكەنىن انىقتادى.
– تۇرعىننىڭ جابايى قۇستى ۇيىنە الىپ كەتكەنى دۇرىس بولدى. ايتپەسە, كوشەدە جۇرگەن قاڭعىباس يتتەر كوكقۇتاندى تالاپ تاستاۋى مۇمكىن ەدى. قازىر جابايى قۇستاردىڭ تۇلەيتىن كەزەڭى ءوتىپ جاتىر. سول سەبەپتەن, قۇستاردىڭ ۇشۋى قيىنعا سوعادى. ءبىزدىڭ ماماندار كوكقۇتاندى تەكسەرۋدەن وتكىزدى. جابايى قۇس جاراقات الماعان, – دەيدى نۇرلان يمانعاليەۆ.
جابايى قۇس كانالعا جىبەرىلدى. ينسپەكتورلاردىڭ ايتۋىنشا, تابيعي مەكەندەۋ ورتاسىنا ۇقساس كانالدا كوكقۇتاننىڭ ءال جيناۋىنا مۇمكىندىك بار.
اتىراۋ وبلىسى