نۇر-سۇلتاندا «وميكرون» شتامىنا بايلانىستى ەپيدەميولوگيالىق احۋال ناشارلادى. جاعداي كۇننەن كۇنگە ۋشىعىپ بارادى. بۇل تۋرالى ەلوردانىڭ باس مەملەكەتتىك سانيتارلىق دارىگەرى سارحات بەيسەنوۆا ونلاين بريفينگتە مالىمدەدى, دەپ حابارلايدى Egemen.kz قالالىق اكىمدىكتىڭ رەسمي سايتىنا سىلتەمە جاساپ.
«ەلوردادا Sars-Cov-2 ۆيرۋسىنىڭ «وميكرون» شتامى اينالىمىنىڭ جالعاسۋىنا بايلانىستى ەپيدەميولوگيالىق جاعداي ناشارلاپ, قيىنداي ءتۇستى. 22 ماۋسىمنان 5 شىلدەگە دەيىن (2 اپتادا) 414 جاعداي تىركەلگەن بولسا, سوڭعى 2 اپتانىڭ ىشىندە (6 شىلدەدەن 19 شىلدەگە دەيىن) 3970 كۆي جاعدايى تىركەلدى, وسىلايشا اۋرۋ دەڭگەيى 9,5 ەسەگە ارتتى», دەدى سانيتارلىق دارىگەر.سوڭعى تاۋلىكتە 586 ادامنان كۆي انىقتالدى. ەپيدەميولوگيالىق جاعدايدى باعالاۋدىڭ جاڭارتىلعان ماتريتساسى بويىنشا قالا «سارى» ايماققا جاقىنداپ كەلەدى.ماۋسىم ايىندا ەلوردادا كۆي-ءدىڭ 30 وڭ سىناماسىنا مولەكۋليارلىق-گەنەتيكالىق زەرتتەۋ جۇرگىزىلدى, بۇل ستەلس-وميكرون شتامىمەن اۋىرۋ جاعدايلارىنىڭ باسىم بولعانىن كورسەتتى.«كىشى تۇرلەرى بار «وميكرون» شتامى وتە جۇقپالى بولىپ كەلەدى, بارلىق جاستاعى ادامعا تەز جۇعادى. الايدا, 20-دان 30 جاسقا دەيىنگى ادامدار اراسىندا كوبىرەك جۇعادى. ول سونداي-اق «دەلتا» نۇسقاسىنا قاراعاندا جۇقپالى. كلينيكالىق بەلگىلەرى – شارشاۋ, باس اۋرۋى جانە دەنە تەمپەراتۋراسىنىڭ جوعارىلاۋى. وكىنىشكە وراي, ەكپە العانداردا, سونداي-اق كۆي-مەن اۋىرعاندار سياقتى ۋاقىت وتە كەلە اعزانىڭ ينفەكتسيادان قورعالۋ دەڭگەيى تومەندەيدى, سونىڭ سالدارىنان ادام قايتادان ينفەكتسياعا بەيىم بولادى», دەپ اتاپ ءوتتى سارحات بەيسەنوۆا.وسىعان بايلانىستى ول ەلوردا تۇرعىندارىنا ۆاكتسيناتسيانىڭ العاشقى كۋرسىن العاننان كەيىن 6 ايدان سوڭ كۆي-گە قارسى رەۆاكتسيناتسيادان ءوتۋدى ۇسىندى. سوندىقتان دارىگەرلەر ەلوردا تۇرعىندارىن ۆاكتسيناتسيادان وتۋگە, ال ۋاقىتى كەلگەندەردى رەۆاكتسيناتسيادان وتۋگە شاقىرادى.