تايلاند استاناسى بانگكوكتە دزيۋدودان جاسوسپىرىمدەر اراسىنداعى ازيا چەمپيوناتى ءوز مارەسىنە جەتتى. وعان 16 ەلدەن 200-گە تارتا سپورتشى قاتىستى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
ءتورت كۇنگە سوزىلعان قۇرلىق بىرىنشىلىگىنە قازاقستاننان 20 سپورتشى قاتىسىپ, باق سىنادى.
50 كەلى سالماق دارەجەسىندە ونەر كورسەتكەن جەرلەسىمىز جارىستىڭ ەكىنشى كۇنىندە الدىنا جان سالمادى. ناتيجەسىندە ەلوردالىق ەربولات سىزدىق جاسوسپىرىمدەر اراسىندا ازيا بىرىنشىلىگىنىڭ التىن مەدالىن جەڭىپ الدى.
«قارسىلاستارىم وتە مىقتى بولدى. ءبارى جاقسى دايىندالعان. ءبىرىنشى ورىن ءۇشىن ايقاستىڭ ءوزى تارتىستى بولدى. ەندى تامىز ايىندا الەم چەمپيوناتى وتەدى. سول جارىستا تەك التىن اكەلۋگە تىرىسىپ, ەلىمنىڭ نامىسىن قورعاپ, كوك تۋىمىزدى جەلبىرەتىپ, ءان ۇرانىمىزدى شىرقاتۋعا بار كۇش-جىگەرىمدى سالامىن. ءالى ۋاقىت بار, جاتتىعۋلاردى ۇزبەي جاساۋ كەرەك», دەدى ەربولات.
سپورتشى بۇعان دەيىن دە دزيۋدودان ەل چەمپيوناتتارى مەن الەمدىك جارىستاردا جۇلدەگەر اتانىپ, قالانىڭ مەرەيىن اسىرعان بولاتىن.
18-21 شىلدە ارالىعىندا وتكەن سارى قۇرلىقتاعى بۇل جارىس قازاقستان جاسوسپىرىمدەر قۇراماسى ءۇشىن جىلدىڭ باستى دوداسى الەم چەمپيوناتىنا دايىندىقتىڭ نەگىزگى كەزەڭى بولىپ سانالادى.
جالپى ازيا چەمپيوناتىنىڭ قورىتىندىسى بويىنشا قازاقستاندىق ءجاسوسپىرىم دزيۋدوشىلار 13 مەدال يەلەندى. ونىڭ تورتەۋى التىن, ۇشەۋى كۇمىس, التاۋى قولا جۇلدە.
وسىلايشا, بايراقتى باسەكەدە وتانداستارىمىز ەل نامىسىن 16 سالماق دارەجەسىندە قورعاپ, جالپى كوماندالىق ەسەپ بويىنشا ءىى ورىنمەن اياقتادى.