بۇل تۋرالى نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ايتتى, دەپ حابارلايدى Egemen.kz.
«ەلوردادا ستاتسيونارلاردىڭ قۋاتتىلىعى 634 توسەك-ورىنعا جەتەدى. ونىڭ ىشىندە 75-ءى – رەانيماتسيالىق توسەك-ورىن. قازىرگى تاڭدا كوروناۆيرۋسقا شالدىققان ناۋقاستاردى ەمدەۋ ءۇشىن 7 ينفەكتسيالىق ستاتسيونار جۇمىلدىرىلعان. ينفەكتسيالىق ستاتسيونارلاردا 260 ناۋقاس جاتىر. 238 ادامنان كوروناۆيرۋس انىقتالسا, 22 پاتسيەنت پنەۆمونيادان ەمدەلۋدە. وسىلايشا جۇكتەمە 41% بولىپ تۇر. 17 پاتسيەنت جانساقتاۋ بولىمىندە, 2 ادام وكپەگە جاساندى دەم بەرەتىن اپپاراتقا جالعانعان», دەدى ت.مۇراتوۆ.
ونىڭ ايتۋىنشا, ناۋقاستاردىڭ اراسىندا كۆي-عا قارسى ەكپە العاندار دا الماعاندار دا ىندەت جۇقتىرعان.
«پاندەميا باستالعاننان بەرى قالامىزدا 3.3 ميلليوننان استام كوروناۆيرۋس ينفەكتسياسىنىڭ پتر دياگنوستيكاسى جۇرگىزىلگەن. وتكەن تاۋلىك ىشىندە 586 جاڭا جاعداي انىقتالدى. سوڭعى 3 اپتادا ورتاشا ەسەپپەن تاۋلىگىنە 150-گە جۋىق جاعداي تىركەلىپ, 20 ادام اۋرۋحاناعا جاتقىزىلۋدا», دەدى ول.