ورال قالاسىنىڭ اۋەجايىندا جوندەۋ جۇمىستارىنىڭ جۇرگىزىلۋىنە بايلانىستى 1 تامىزدان باستاپ FlyArystan اۋەكومپانياسى ىشكى باعىتتار بويىنشا ورالعا ورىندالاتىن رەيستەردى توقتاتۋعا ءماجبۇر, - دەپ حابارلايدى Egemen.kz اتالعان تاسىمالداۋشى كومپانيانىڭ ءباسپاسوز قىزمەتىنە سىلتەمە جاساپ.
«شەكتەۋدىڭ سەبەبى ورال اۋەجايىنىڭ حابارلاماسىندا, ۇشىپ/قونۋ جولاعى مەن پەرروننىڭ جاساندى توسەمىنە تۇسەتىن سالماق پەن قارقىندىلىعىنا قويىلاتىن تالاپتاردىڭ ساقتالۋىن قامتاماسىز ەتۋ ماقساتىندا ورناتىلدى دەپ كورسەتىلگەن», دەلىنگەن حابارلامادا.
اۋەكومپانيا جولاۋشىلارعا بيلەت قۇنىن تولىقتاي قايتارۋعا نەمەسە باسقا ىشكى باعىتتار بويىنشا تەگىن قايتا برونداۋدى ۇسىنادى. بارلىق جولاۋشىلارعا بيلەت ساتىپ الۋ كەزىندە كورسەتىلگەن sms پەن ەلەكتروندى پوشتالارعا جەكە حابارلامالار جىبەرىلەدى.