استانا. 30 ءساۋىر. بۇگىن تۇندە ماگنيتوگورسكىنىڭ «مەتاللۋرگ» كومانداسى 2013/2014 ماۋسىمنىڭ گاگارين كۋبوگىنا قول جەتكىزدى. ول چەحيانىڭ «لەۆ» (پراگا) كومانداسىمەن ءوز الاڭىندا وتكىزىلگەن جەتىنشى فينالدىق ماتچتا 7:4 (1:1, 3:1, 3:2) ەتىپ ەتىپ, سەريادا ءبىرىنشى بولىپ ءتورتىنشى جەڭىسىنە جەتتى – 4:3! بۇل تۋرالى يتار-تاسس حابارلادى.
ورال تاۋىنىڭ ەتەگىندەگى جۇرتتىڭ جاساعى ءوزىنىڭ تاريحىندا اتالمىش كۋبوكتى ءبىرىنشى رەت ەنشىلەپ وتىر. سونداي-اق ينتەرناتسيونالدىق تۋرنير بولىپ تابىلاتىن قۇرلىقتىق حوككەي ليگاسىنىڭ فينالدىق كەزدەسۋىنە دە ءبىرىنشى رەت شەتەلدىك كوماندا قاتىستى.
ماتچتا الاڭ يەلەرىنەن فرانسيس پارە (5-مينۋت), ەۆگەني بيريۋكوۆ (24), ياروسلاۆ كوسوۆ (37), يان كوۆارج (38), سەرگەي موزياكين (44), دانيس زاريپوۆ (53) جانە ميحايل يۋنكوۆ (60) شايبا سالسا, مەيماندار كومانداسىنان داۆيد ۋللسترەم (14), رايان و'برين (35), مارتين تەرنبەرگ (54) جانە دجاستين ازەۆەدو (59) كوزگە ءتۇستى.
وسىلايشا «مەتاللۋرگ» جاساعى وسى جەڭىسىمەن سەريادا 4:3 ەسەبىمەن سوڭعى نۇكتەنى قويدى. ال ەكى كوماندانىڭ اراسىنداعى بۇعان دەيىنگى فينالدىق كەزدەسۋلەر مىناداي ناتيجەلەرمەن اياقتالدى: «مەتاللۋرگ» – «لەۆ» 0:3, 4:1, 2:3, 5:3, 2:1 وت, 4:5 وت, 7:4.
كوماندانىڭ سەرگەي موزياكين ەسىمدى حوككەيشىسى گاگارين كۋبوگىنىڭ ەڭ قۇندى ويىنشىسى اتاندى. وعان ماتچ سوڭىندا باعالى سىيلىق تابىس ەتىلدى. مۇنداي قۇرمەتكە ول 21 ماتچتا 13 شايبا سالىپ, 20 ناتيجەلى پاس بەرگەنى ءۇشىن جەتتى.
بۇعان دەيىن گاگارين كۋبوگىن قازاننىڭ «اق بارس» (2009, 2010), ۋفانىڭ «سالاۆات يۋلاەۆ» (2011) جانە ماسكەۋدىڭ «دينامو» (2012, 2013) كوماندالارى جەڭىپ العان بولاتىن.
قۇرلىقتىق حوككەي ليگاسىندا سونداي-اق رەسەي چەمپيونى دا انىقتالدى. ونى دا جارتىلاي فينالدىق باسەكە سەرياسىندا ۋفانىڭ «سالاۆات يۋلاەۆ» جاماعاتىنان 4:1 دەگەن جالپى ەسەپپەن باسىم تۇسكەن ماگنيتوگورسكىلىكتەر الدى.
دامير قوجامقۇل.
دەرەككوز: يتار-تاسس.
فوتو: يتار-تاسس/ارتەم كوروتاەۆ.