قازاقستاندىق وقۋشىلار گەوگرافيادان حالىقارالىق وليمپيادادا 1 التىن, 1 قولا مەدال جەڭىپ الدى. بۇل تۋرالى وقۋ-اعارتۋ ءمينيسترى اسحات ايماعامبەتوۆ Facebook پاراقشاسىندا جازدى, دەپ حابارلايدى Egemen.kz.
«وقۋشىلارىمىز حالىقارالىق وليمپيادالارداعى جەتىستىكتەرىمەن ءبىزدى قۋانتۋدى جالعاستىرىپ كەلەدى. ولار گەوگرافيادان حالىقارالىق وليمپيادادا (IGeO-2022) 1 التىن, 1 قولا مەدال جەڭىپ الدى. ۇلتتىق قۇراما قورجىنىنا التىن مەدالدى سانجار حاميتوۆ (اقتوبە ق.) اكەلسە, ەركەبۇلان تازابەك (شىمكەنت ق.) قولا جۇلدەنى ەنشىلەدى», دەپ جازدى ا.ايماعامبەتوۆ.
ونىڭ ايتۋىنشا, بۇل ەلىمىزدىڭ بەدەلدى وليمپياداعا قاتىسۋ تاريحىنداعى قازاقستاندىقتاردىڭ ەكىنشى التىن مەدالى.
«بيىل زياتكەرلىك جارىستاردى فرانتسيا ۇيىمداستىردى. بۇل سايىستارعا الەمنىڭ 54 ەلىنەن 216 وقۋشى قاتىستى. بالالارىمىزدىڭ ماتەماتيكا, فيزيكا جانە ەندى گەوگرافيا پاندەرىنەن وليمپيادالارداعى جوعارى جەتىستىكتەرى ولاردىڭ باسەكەگە قابىلەتتىلىگىن كورسەتەدى», دەي كەلە مينيستر وقۋشىلاردى جەڭىسىمەن قۇتتىقتادى.
سونداي-اق ول بيىل وسىنداي وليمپيادالاردىڭ جەڭىمپازدارى بۇرىن-سوڭدى بولماعان قولداۋ شارالارىنا يە بولاتىنىن ءسوز ەتتى.
«پرەزيدەنتتىڭ تاپسىرماسى بويىنشا قوماقتى اقشالاي سىياقى تولەۋ جانە وتاندىق جوو-لارعا ۇبت تاپسىرماي-اق قابىلداۋ قاراستىرىلىپ وتىر. التىن مەدال العان وقۋشىعا شامامەن 4,5 ملن تەڭگە, كۇمىس مەدالعا 3 ملن-نان اسا تەڭگە, قولا مەدالعا 1,5 ملن-نان اسا تەڭگە كولەمىندە اقشالاي سىيلىق بەرىلەدى. وقۋشىلاردى جارىسقا دايىنداعان ۇستازدار دا تولەماقى الادى», دەلىنگەن مينيستر جازباسىندا.