قۇرمانعازى اۋدانىنداعى «سۇيىندىك اسىل تۇقىمدى قوي زاۋىتى» جشس يەلىگىندەگى ءبىر مىڭنان اسا قوي دالا ءورتىنىڭ قۇربانىنا اينالدى. وبلىستىق اۋىل شارۋاشىلىعى باسقارماسى باسشىسىنىڭ ورىنباسارى ازامات ايتقاليەۆتىڭ ايتۋىنشا, جالىن ورتاسىندا ەدىلباي تۇقىمدى 619 ساۋلىق, 414 قوزى قالعانى انىقتالعان. اۋلاداعى 516 قوي, 1 ىنگەن, 1 بوتا تۇگى قالماي ورتەنىپ كەتكەن. تاعى 13 قوي جوعالعان.
– قازىر شارۋاشىلىققا كەلتىرىلگەن شىعىننىڭ كولەمى انىقتالىپ جاتىر. بىراق اتالعان سەرىكتەستىك باسشىلارى ءتورت ت ۇلىك مالدى ساقتاندىرماعان. سول سەبەپتەن كاسىپكەرگە مەملەكەت تاراپىنان وتەماقى تولەنبەيدى, – دەيدى ازامات ايتقاليەۆ.
ونىڭ دەرەگىنە قاراعاندا, ورتەنگەن قويدىڭ 500-دەن استامى كورشىلەس باتىس قازاقستان وبلىسىنىڭ جاڭاقالا اۋدانىندا ورنالاسقان ەت كومبيناتىنا جىبەرىلگەن. تەرميالىق وڭدەۋدەن وتكەن سوڭ ودان ەت ونىمدەرىن دايىنداۋ كوزدەلگەن.
قۇرمانعازى اۋدانى اكىمدىگىنىڭ ءباسپاسوز قىزمەتىنەن ءمالىم ەتكەندەي, دالا ءورتى جالعىزاپان اۋىلىنا تاياۋ ورنالاسقان اسقار, بەسوبا, اپاندىكول قىستاقتارىنىڭ اۋماعىنا جايىلعان. ءورتتى سوندىرۋگە سۇيىندىك اۋىلدىق وكرۋگىنىڭ 30 تۇرعىنى, ازعىر ايماعىندا گەولوگيالىق بارلاۋ جۇمىستارىن جۇرگىزىپ جاتقان «تات اركا» جش تاراپىنان 10 تەحنيكا تارتىلعان. اۋىلدىق وكرۋگ اكىمى قانات قۇلشاروۆتىڭ ايتۋىنشا, سوڭعى اپتادا ءۇش ءورت تىركەلگەن. ال سەرىكتەستىك باسشىلارى تاراپىنان مال شىعىنى جونىندە ءتيىستى ورگاندارعا شاعىم تۇسپەگەن.
– سۇيىندىك اۋىلىندا ءورت ءسوندىرۋ قىزمەتىنىڭ ارنايى جاساعى جوق. اۋىل مەن اۋدان ورتالىعىنىڭ اراقاشىقتىعى – 270 شاقىرىم. ءورتتىڭ بولعانى تۋرالى وبلىستىق توتەنشە جاعدايلار دەپارتامەنتىنە حابارلانبادى. باتىس قازاقستان وبلىسىندا باستالعان ءورتتىڭ كورشىلەس استراحان وبلىسىنا دەيىن جالعاسقانى بەلگىلى بولدى. كەيىن ءورت اتىراۋ وبلىسىنىڭ اۋماعىنا وتكەن. جالىن شارپىعان جەردىڭ جالپى اۋماعى – 100 گەكتار, – دەپ ءمالىم ەتتى وبلىستىق توتەنشە جاعدايلار دەپارتامەنتىنىڭ مەملەكەتتىك ءورت باقىلاۋ باسقارماسى باستىعىنىڭ مىندەتىن اتقارۋشى داۋرەن بەردەنوۆ.
اتىراۋ وبلىسى