پارلامەنت ماجىلىسىندە تۇركى تىلدەس مەملەكەتتەر پارلامەنتتىك اسسامبلەياسى قۇقىقتىق ماسەلەلەر كوميسسياسىنىڭ كەزەكتى ءۇشىنشى وتىرىسى ءوتتى, دەپ حابارلادى وسى پالاتانىڭ ءباسپاسوز قىزمەتى.
ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ماۋلەن اشىمباەۆ وتىرىسقا قاتىسىپ, تۇركىتىلدەس مەملەكەتتەرمەن ىنتىماقتاستىقتى ودان ءارى دامىتۋ, ونى جاڭا دەڭگەيگە كوتەرۋ قازاقستاننىڭ سىرتقى ساياساتىنىڭ نەگىزگى باسىمدىعى ەكەنىن ايتتى. «تۇركيا, ازەربايجان, قىرعىزستان جانە باسقا دا تۇركى تىلدەس مەملەكەتتەر قازاقستان ءۇشىن ەڭ جاقىن باۋىرلاس ەلدەر بولىپ تابىلادى. ءبىزدىڭ تەگىمىز, ءدىنىمىز, ءتىلىمىز ءبىر, ءداستۇرىمىز ورتاق. سوندىقتان دا, ءبىزدىڭ ارامىزداعى قارىم-قاتىناستىڭ تىعىز بولۋى زاڭدى», دەدى كوميتەت توراعاسى.
جيىندى ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ مۇشەسى, تۇركپا كوميسسياسىنىڭ قۇقىقتىق ماسەلەلەر بويىنشا توراعا ورىنباسارى نۇرلان ءابدىروۆ جۇرگىزدى.
ول بۇگىنگى كۇن تارتىبىندە تۇركپا جۇمىسىن جەتىلدىرۋ ماسەلەسى وزەكتى بولىپ وتىرعانىن اتاپ ءوتتى. كۇن ءتارتىبىنىڭ نەگىزگى بولىگى – «تۇركپا-عا مۇشە ەلدەردىڭ ۇلتتىق زاڭنامانى ۇيلەستىرۋدەگى ارەكەتى» اتتى تاقىرىپ بولدى. «تۇركپا-نىڭ ءىس باسىنداعى توراعاسى – تۇركيا پارلامەنتى ەكسپەرتتىك جيىندار وتكىزۋ ءداستۇرىن باستادى. اتاپ ايتقاندا, ناۋرىز ايىندا انكارادا ەكسپەرتتەرىمىز كوررۋپتسيامەن كۇرەس جانە مەملەكەتتىك باسقارۋدى جەتىلدىرۋ سالاسىندا زاڭنامانى جاقسارتۋعا قاتىستى سەمينار وتكىزدى. بۇدان باسقا, 9 ساۋىردە تۇركپا-عا مۇشە ەلدەر پارلامەنتتەرىندەگى الەۋمەتتىك جانە دەنساۋلىق ماسەلەلەرىمەن اينالىساتىن كوميتەتتەر مۇشەلەرى باس قوسىپ, وتە پايدالى كەزدەسۋ وتكىزدى جانە دە اتالعان كەزدەسۋدى جىل سايىن وتكىزىپ تۇرۋ ۇسىنىلۋدا. 18 ناۋرىزدا ەكسپەرتتەرىمىز كەزدەسىپ, تۇركپا اياسىندا ۇلتتىق زاڭنامالاردى ۇيلەستىرۋ ماسەلەسىن تالقىلادى.
تۇركپا-عا مۇشە كەيبىر ەلدەردىڭ تمد ينستيتۋتتارى اياسىنداعى جۇمىس تاجىريبەسى بار, ال تۇركيا بولسا, ەۋرووداقپەن ىنتىماقتاستىق اياسىندا زاڭداردى ۇيلەستىرۋدە مول تاجىريبەگە يە. سوندىقتان دا, تۇركپا اياسىندا ەكسپەرتتەردىڭ قاتىسۋىمەن ءىس-شارالار وتكىزۋ ءبىزدىڭ ۇيىمنىڭ ەكسپەرتتىك الەۋەتىن ۇلعايتا تۇسپەك.
باسقوسۋدا «تۇركپا-عا مۇشە ەلدەردىڭ زاڭنامانى ۇيلەستىرۋدەگى ارەكەتى» اتتى تاقىرىپتا ءماجىلىس دەپۋتاتى نۇرلان ءابدىروۆتىڭ بايانداماسى تىڭدالىپ, تۇركپا-نىڭ زاڭدىق-قۇقىقتىق بازاسىن جەتىلدىرۋ تۋرالى ماسەلە قارالدى. سونداي-اق, تۇركپا كوميسسيالارى جۇمىسىن قايتا قۇرۋ جونىندە تۇركيا ۇلى ۇلتتىق جينالىسىنىڭ دەپۋتاتى گيۋزەل ۋلكەردىڭ ۇسىنىسى تالقىلاندى.
قىرعىز رەسپۋبليكاسىنىڭ تۇركپا حاتشىلىعى تۋرالى ەرەجەلەرگە قاتىستى قىرعىز رەسپۋبليكاسى جوكوركۋ كەنەشىنىڭ دەپۋتاتى قۇرمانبەك دىيقانباەۆتىڭ ۇسىنىسىن تىڭداپ, ول جونىندە دەلەگاتسيالاردىڭ پىكىرىن ءبىلدى.
تۇركپا حاتشىلىعىنىڭ باس حاتشىسى جاندوس اسانوۆ كوميسسيانىڭ 4-ءشى وتىرىسىنىڭ مەرزىمى مەن وتەتىن جەرىن جانە كۇن ءتارتىبى جايىندا ءمالىمدەدى.