الماتىدا كونكۋرستىق كوميسسيانىڭ شەشىمىمەن قوعامدىق دەنساۋلىق ساقتاۋ باسقارماسىنا جاڭا باسشى تاعايىندالدى, دەپ حابارلايدى Egemen.kz.
قالا اكىمدىگىنەن حابارلاعانداي, قوعامدىق دەنساۋلىق ساقتاۋ باسقارماسىنىڭ باسشىسى بولىپ يران شامەتەكوۆ كەلدى.
يران شامەتەكوۆ 2000 جىلى اقتوبە مەملەكەتتىك مەديتسينا اكادەمياسىن «ەمدەۋ ءىسى» ماماندىعى بويىنشا بىتىرگەن. 2000-2001 جىلدارى باتىس قازاقستان مەديتسينا اكادەمياسىندا «حيرۋرگيا» ماماندىعىمەن ينتەرناتۋرادان ءوتتى. 2006 جىلى د.ا. قوناەۆ ۋنيۆەرسيتەتىن «قۇقىقتانۋ» ماماندىعى بويىنشا اياقتادى. فيلوسوفيا جانە قوعامدىق دەنساۋلىق ساقتاۋ دوكتورى عىلىمي اتاعى بار.
ءار جىلدارى قىزىلوردا وبلىسىنىڭ دەنساۋلىق ساقتاۋ باسقارماسىنىڭ باستىعى, نۇر-سۇلتان قالاسى دەنساۋلىق ساقتاۋ باسقارماسى باستىعىنىڭ ورىنباسارى بولىپ ەڭبەك ەتتى. جامبىل وبلىسى بويىنشا كوميتەت دەپارتامەنتىن باسقاردى. سوڭعى ەڭبەك ەتكەن ورنى – ەلورداداعى №3 كوپبەيىندى بالالار اۋرۋحاناسىندا باس دارىگەر.