قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن كەشەگى بريفينگتە مەملەكەتتىك قىزمەت ىستەرى اگەنتتىگىنىڭ توراعاسى ءاليحان بايمەنوۆ مەملەكەتتىك قىزمەتتىڭ جاڭا مودەلىنىڭ نەگىزگى اسپەكتىلەرى مەن «ا» كورپۋسىنا ىرىكتەۋدىڭ ارالىق قورىتىندىلارى تۋرالى جان-جاقتى ايتىپ بەردى.
اگەنتتىك توراعاسىنىڭ مالىمەتىنشە, قازىرگى تاڭدا قازاقستاندا 97 مىڭ مەملەكەتتىك قىزمەتشى بولسا, سونىڭ 54 مىڭى اۋدان جانە اۋىلدىق دەڭگەيدە جۇمىس جاسايدى. سوڭعىلارىنىڭ 33 مىڭى اۋدان اكىمىنە باعىنىشتى بولسا, ال قالعانى ورتالىق ورگانداردىڭ اۋداندىق بولىمشەلەرىندە ءوز قىزمەتتەرىن اتقارىپ كەلەدى. سول اۋدان نەمەسە اۋىلدىق جەردە جۇرگەن مەملەكەتتىك قىزمەتشىلەردىڭ 5 مىڭى «كادر قىزمەتىن» قوسا اتقارسا, ال 2013 جىلدىڭ ناۋرىزىنان باستاپ جالپى سانى 500 ادامنان تۇراتىن 191 پەرسونالدى باسقارۋدىڭ بىرىڭعاي قىزمەتى قۇرىلىپ, ولارعا كاسىبي دەڭگەيدە كادر ساياساتىن جۇرگىزۋ جۇكتەلىپ وتىر.
بۇدان باسقا, جەرگىلىكتى جەرلەردە كونكۋرستىق كوميسسيا, اتتەستاتسيالىق كوميسسيا جانە تارتىپتىك كوميسسيا جۇمىس ىستەپ كەلسە, بىلتىردان باستاپ اۋدان, وبلىس اكىمدەرىنە اۋداندىق جانە وبلىستىق دەڭگەيدە بىرىڭعاي كونكۋرستىق كوميسسيا قۇرۋ مۇمكىندىگى زاڭ جۇزىندە بەرىلگەن ەكەن. سونىمەن قاتار, بىرىڭعاي كادر ماسەلەسىن شەشۋ مۇمكىندىگى دە نازاردان تىس قالماعان.
اگەنتتىك توراعاسى ەندى پەرسونالمەن جۇمىس ىستەيتىن 500 ادامنىڭ شەشىم قابىلداۋداعى ءرولى ارتادى جانە سول بولىمدەگى ازاماتتاردى جۇيەلى وقىتۋعا مۇمكىندىك تۋىپ وتىر دەگەندى باسا ايتىپ كەتتى. ونىڭ سوزىنشە, بۇرىن ءفورمالدى وتكىزىلىپ كەلگەن اۋداندىق جانە وبلىستىق كونكۋرستار ورتالىقتاندىرىلعاننان كەيىن ولار جاڭاشا سيپات العان. بۇعان دەيىن كوزگە تۇسپەي جۇرگەن, ەلەنبەي كەلگەن اۋىل ازاماتتارى, ءتىپتى, اۋدان مەن وبلىستىق دەڭگەيگە دە لايىقتى دەپ باعالانىپتى. ەندەشە, «الەۋمەتتىك ليفت» جۇمىسىن جاڭاشا باستاپتى. ءارى قاراي بۇل مامانداردىڭ جۇمىسىن وڭتايلاندىرۋ ءۇشىن كەلەسى جىلى «ە-قىزمەت» جۇيەسى ىسكە قوسىلاتىن بولادى. ونىڭ جۇمىس ىستەۋىمەن كۇندەلىكتى شارۋالار ەلەكتروندىق فورماتقا اۋىستىرىلىپ, قىزمەتكەرلەردىڭ قولى بوسايدى. بۇل ولاردىڭ شىعارماشىلىق ىزدەنىسىنە نەگىزدەلەتىن جۇمىسىنا كوپ ءمان بەرىلەرىن بىلدىرەدى.
پەرسونالدى باعالاپ ىرىكتەۋدە شەشۋشى ءرول اتقاراتىن تەتىك – تەستىلەۋ. بىلتىردان بەرى كەز كەلگەن ازامات ورتالىقتاردا تەستىلەۋدەن ءوتىپ, سەرتيفيكات الا الاتىن. بيىل تەست تاپسىرۋشىلار «e-gov» سايتىنا كىرىپ, ەلەكتروندىق بيلەت الاتىن سەكىلدى ءوز ۋاقىتى مەن وتىراتىن جەرىن تاڭداي الادى. 2012 جىلى اي سايىن تەستتەن 2300 ادام وتەتىن بولسا, بىلتىر بۇل كورسەتكىش 4700 ادامعا جەتكەن ەكەن. تەست قورىتىندىسىنا تىستان اسەر ەتۋدى شەكتەپ, قاۋىپسىزدىك ماسەلەسى كۇشەيتىلىپتى. ون بالل الاتىنداردىڭ سانى 66 پايىزدان 44 پايىزعا دەيىن تومەندەگەن. قوعامدا تەستىلەۋدى «بارماق باستى, كوز قىستى» ەمەس, تەك ءبىلىمى ارقىلى الۋعا دەگەن سەنىم كۇشەيىپ كەلە جاتىر, دەگەن ءا.بايمەنوۆ مەملەكەتتىك ورگاندار ءۇشىن كونكۋرس وتكىزۋ راسىمدەرى ءۇش ەسەگە جۋىق ازايعاندىعىن دا ورتاعا سالا كەتتى. بۇگىنگى تاڭدا ەلىمىز بويىنشا 25 مىڭ ادامنىڭ قولىندا تەستىلەۋدەن وتكەنى تۋرالى سەرتيفيكات بار كورىنەدى.
2015 جىلدان باستاپ مەملەكەتتىك قىزمەتشىلەردەن ءبىلۋدى تالاپ ەتەتىن زاڭدار سانىن كەزەڭ-كەزەڭىمەن قىسقارتىپ, اتالعان تەستتەردى «ا» كورپۋسىنا ىرىكتەۋدىڭ باستى قۇرالى رەتىندە ايقىنداۋعا مۇمكىندىك بەرۋ كوزدەلىپتى. ىرىكتەۋدىڭ وسىنداي ءتاسىلىن «ب» كورپۋسى ءۇشىن دە قولدانۋ كوزدەلۋدە ەكەن.
«مەملەكەتتىك قىزمەت تۋرالى» زاڭعا ەنگىزىلگەن تۇزەتۋلەرگە سايكەس كوماندالىق اۋىس-تۇيىستەر كۇرت ازايعان. كونكۋرسپەن ىرىكتەپ تاعايىنداۋلاردىڭ ۇلەسى 2012 جىلى 3,5 ەسەگە وسكەن. بۇل كونكۋرستىق تاعايىنداۋدىڭ 28-دەن 82 پايىزعا دەيىن ارتقاندىعىن كورسەتەدى. مەملەكەتتىك ورگاندار اراسىنداعى اۋىسۋ تارتىبىمەن تاعايىنداۋلاردىڭ ۇلەسى 20 ەسەگە قىسقارىپتى (60 پايىزدان 3 پايىزعا دەيىن). اگەنتتىك توراعاسى, سونىمەن بىرگە, «ا» كورپۋسىنا ىرىكتەۋدىڭ ارالىق قورىتىندىلارى تۋرالى دا ايتا كەتتى. ونىڭ ايتۋىنشا, «ا» كورپۋسىنىڭ كادر رەزەرۆىندە 400 ادام بولسا, ولاردىڭ ىشىندە جاۋاپتى حاتشىلار مەن اپپارات باسشىلارى لاۋازىمدارىنا – 79 ادام, ال قالالار مەن اۋداندار اكىمدەرى, كوميتەت توراعالارى لاۋازىمدارىنا 296 ادام ۇمىتكەر رەتىندە تىركەۋدە تۇر ەكەن.
ناقتى ىرىكتەۋ ءۇشىن قۇجاتتار قابىلداۋ ۇستىمىزدەگى جىلدىڭ 13-28 ناۋرىزى ارالىعىندا جۇرگىزىلگەندىگىن دە ايتا كەتۋ كەرەك. 873 كانديداتتى ىرىكتەۋ شەڭبەرىندە بارلىعى 1029 ءوتىنىش بەرىلسە, بۇل – ءبىر ورىنعا كونكۋرس 10,3 ادامدى قۇراعان دەگەن ءسوز. «وتكەن جىلمەن سالىستىرعاندا ء(بىر ورىنعا 2,4 ادام) كونكۋرس 4 ەسەگە ءوستى, بۇل ازاماتتار تاراپىنان «ا» كورپۋسىنىڭ كادر رەزەرۆىنە ىرىكتەۋ پروتسەسىنە دەگەن جوعارى سەنىمدىلىكتى بىلدىرەدى», دەدى ءاليحان مۇحامەديا ۇلى. ونىڭ مالىمدەۋىنشە, تەستكە جىبەرىلگەن 792 كانديداتتىڭ ىشىنەن 381-ءى (51 پايىزى) تەستىلەۋدىڭ شەكتى ءمانىن ەڭسەرە الماعان.
ءسوزىنىڭ سوڭىندا اگەنتتىك توراعاسى VII استانا ەكونوميكالىق فورۋمى اياسىندا تانىمال حالىقارالىق ساراپشىلاردىڭ قاتىسۋىمەن ءۇشىنشى رەت «مەملەكەتتىك قىزمەت پەرسونالىن باسقارۋ: جاعدايى مەن پەرسپەكتيۆالارى» دەگەن تاقىرىپتا جاھاندىق كونفەرەنتسيانىڭ وتەتىنىنەن دە حاباردار ەتە كەتتى.
اسقار تۇراپباي ۇلى,
«ەگەمەن قازاقستان».