بۇگىن قر پرەمەر-ءمينيسترىنىڭ ورىنباسارى - قارجى ءمينيسترى ەرۇلان جاماۋباەۆ الماتى وبلىسى, بالقاش اۋدانىنىڭ تۇرعىندارىمەن كەزدەستى, دەپ حابارلايدى Egemen.kz.
قارجى مينيسترلىگىنىڭ مالىمەتىنشە, كەزدەسۋگە الماتى وبلىسىنىڭ اكىمى مارات سۇلتانعازيەۆ پەن بالقاش اۋدانىنىڭ اكىمى عالىم توقپەيىسوۆ قاتىستى. باستى نازاردا جاڭا جۇمىس ورىندارىن قۇرۋ, نەسيە بەرۋ ارقىلى شاعىن جانە ورتا بيزنەس سۋبەكتىلەرىن مەملەكەتتىك قولداۋ شارالارى, سونداي-اق حالىقتىڭ تابىسىن ارتتىرۋ باعدارلاماسى جانە باسقا دا ماسەلەلەر بولدى.
اتاپ ايتقاندا, وسى جىلدىڭ 6 ايىندا وڭدەۋ ونەركاسىبىنىڭ كولەمى تيىسىنشە 5,8, جالپى ىشكى ءونىم 3,4, قۇرىلىس 9,2, ساۋدا مەن كولىك سالالارى 6,2 پايىزعا ۇلعايدى. بيىل وڭىرلەردىڭ دامۋىنا رەسپۋبليكالىق بيۋدجەتتەن 5,5 ترلن تەڭگە ءبولىندى. بۇل جالپى شىعىنداردىڭ 30 پايىزىن قۇرايدى.
قازىرگى ۋاقىتتا جەرگىلىكتى بيۋدجەتتەردىڭ كىرىس بازاسى نىعايتىلۋدا. بۇل رەتتە, شاعىن جانە ورتا بيزنەستەن تۇسەتىن كورپوراتيۆتىك تابىس سالىعىن جەرگىلىكتى دەڭگەيگە بەرۋ وڭ اسەر ەتەدى. «اۋىل – ەل بەسىگى» جوباسىن ىسكە اسىرۋعا 128 ملرد تەڭگە ءبولىندى. ولار 580 اۋىلدا 1 100 جوبانى ىسكە اسىرۋعا باعىتتالعان.
سونداي-اق «ديپلوممەن اۋىلعا» باعدارلاماسىن ىسكە اسىرۋ اياسىندا 4,3 مىڭ مامانعا تۇرعىن ءۇي ساتىپ الۋ ءۇشىن بيۋدجەتتىك كرەديتتەر بەرۋگە 20 ملرد تەڭگە ءبولىندى. وسى كەشەندى جوسپارلار اۋقىمىندا 170 مىڭنان استام جۇمىس ورنى اشىلادى.
«مەملەكەت باسشىسىنىڭ «جاڭا قازاقستان» تۇجىرىمداماسى ادال باسەكەلەستىكتى كۇشەيتۋ, جەكە مەنشىكتى قورعاۋ, ەكونوميكانى مونوپوليادان ارىلتۋ ارقىلى ەلىمىزدىڭ جاڭا ەكونوميكالىق باعىتىن ىسكە اسىرۋعا باعىتتالعان. وسى شارالاردىڭ بارلىعى ساياسي تۇراقتىلىقتى, بيزنەستىڭ مۇددەلەرى مەن قۇقىقتارىن قورعاۋ جۇيەسىن ايتارلىقتاي نىعايتادى, بارلىق قازاقستاندىقتار ءۇشىن كەڭ ەكونوميكالىق مۇمكىندىكتەر تۋعىزادى», دەپ اتاپ ءوتتى ەرۇلان جاماۋباەۆ.