قىرعىزستاندا جول اپاتىنان قازاقستاندىق جاتتىقتىرۋشى قازا بولدى

16 شىلدەدە ىستىقكولدەگى بۇلان-سوگەتى (كومسومول) اۋىلىندا قازاقستان جەڭىل اتلەتيكا جاتتىقتىرۋشىسى مۇرات جۇزگەنباەۆتى كولىك قاعىپ كەتكەن.

وقيعا كۋاگەرلەرىنىڭ ايتۋىنشا, ەر ادام جۇگىرۋ كەزىندە تاربيەلەنۋشىسىنىڭ جانىندا ۆەلوسيپەدپەن ىلەسىپ جۇرگەن. قىز بالا امان قالدى.

ىستىقكول وبلىستىق ءىىب ءباسپاسوز قىزمەتى جول اپاتى تاڭعى ساعات 7:40 شاماسىندا بولعانىن حابارلادى. كەزەكشى بولىمگە بۇلان-سوگوتۋ جانە بوستەري اۋىلدارى اراسىندا جول اپاتى بولعانى تۋرالى تەلەفون حابارلاماسى كەلىپ ءتۇستى.   «وقيعا ورنىنا شىققان جەدەل تەرگەۋ توبى بىشكەكتىڭ 41 جاستاعى تۇرعىنى مىنگەن Lexus-330 اۆتوكولىگى بالىقچى-انانەۆو-كاراكول اۆتوجولىنىڭ 97-ءشى شاقىرىمىندا گريگورەۆكا اۋىلىنىڭ 40 جاستاعى تۇرعىنى رولدە وتىرعان «نيسسان - ميكرا» اۆتوكولىگىمەن بۇيىردەن سوقتىعىسقانىن انىقتادى. ودان كەيىن جول جيەگىندە كەلە جاتقان 58 جاستاعى قازاقستاندىق ۆەلوسيپەدشى مۇرات جۇزگەنباەۆتى قاعىپ كەتكەن. جول اپاتىنىڭ سالدارىنان قازاقستان ازاماتى وقيعا ورنىندا كوز جۇمدى», دەپ حابارلادى ايماق پوليتسياسى.   بارلىق جينالعان ماتەريالدار قۇقىقتىق باعا بەرۋ ءۇشىن تەرگەۋ قىزمەتىنە جىبەرىلدى. جۇرگىزۋشىلەردىڭ ىشىمدىك ىشكەن-ىشپەگەنىن انىقتاۋ ءۇشىن ءتيىستى ساراپتامالار جۇرگىزىلەدى.   ايتا كەتەيىك, مۇرات جۇزگەنباەۆ الماتى وبلىسىندا جەڭىل اتلەتيكادان اعا جاتتىقتىرۋشى بولدى. 2012 جىلى ول جەڭىل اتلەتيكا فەدەراتسياسىنىڭ ۇزدىك وندىعىنا كىردى.