2000 جىلدىڭ تامىز ايىندا ەلدى ەلەڭدەتكەن ەلەۋلى وقيعا بولدى. وسى كەزگە دەيىن رەسپۋبليكامىزدىڭ جوعارعى سوتىنىڭ تىزگىنىن ۇستاپ كەلگەن ماقسۇت نارىكباەۆ وتستاۆكاعا كەتتى. بۇل وقيعا ءارتۇرلى الىپقاشتى اڭگىمەنىڭ وزەگىنە اينالدى. سول اڭگىمەلەردىڭ نەگىزى نارىكباەۆتىڭ قىزمەتىمەن قوشتاسۋى عانا ەمەس, ودان قالعان ورىنتاقتىڭ كىمگە بۇيىراتىنى تۋرالى بولجامدار توڭىرەگىندە ءوربىدى. دەگەنمەن, ەل اراسىنداعى توپشىلاۋلار مەن جورامالدار كوبەيگەن سايىن, سول ورىنتاقتىڭ يەسىن انىقتايتىن ءسات تە كەشىگە بەردى. سول كەزدە جۇرت اۋزىنداعى بولجامداردى ەكشەي وتىرىپ, وسى جولداردىڭ اۆتورى ءوزىنىڭ جۋرناليستىك توپشىلاۋىن جازعان بولاتىن.
سول جىلدىڭ تامىز ايىنىڭ اياعى سوت سالاسى ءۇشىن قاربالاسقا تولى بولدى. جوعارى سوت كەڭەسى ءوتىپ, وعان ەلباسىنىڭ ءوزى توراعالىق ەتتى. وسى كەڭەستە جوعارعى سوت تىزگىنىن ۇستايتىن تۇلعانىڭ ەسىمى بەلگىلى بولماق. كوپ ۇزاماي كوپتىڭ كوڭىلىن كۇپتى ەتكەن سۇراقتىڭ جاۋابى انىقتالدى. پرەزيدەنت ن.نازارباەۆتىڭ تاڭداۋى قايرات ماميگە ءتۇستى. سونىمەن, 2000 جىلدىڭ 1 قىركۇيەگى كۇنى قايرات ابدىرازاق ۇلى جوعارعى سوتتىڭ تىزگىنىن ءوز قولىنا الدى.
قاشاندا كورەگەندىك تانىتىپ وتىراتىن ەلباسى ەلىمىز تاۋەلسىزدىگىنە توعىز جىلعا شامالاس ۋاقىت بولعانىنا قاراماستان, سوت جۇيەسىندە ەشقانداي ىلگەرىلەۋشىلىكتىڭ بولماعانىن, رەفورمانىڭ اقساپ جاتقانىن ءبىلىپ, ونىڭ باسشىسىن اۋىستىردى. جاڭا توراعاعا سەنىم ارتتى, ءۇمىت ەتتى. قاشاندا ءوزى قاداعالاپ وتىراتىن سوت سالاسىنا جاڭا وي, جاڭا لەپ قاجەت ەكەنىن سەزدى. سەبەبى, ەلىمىزدە جاڭا سوت جۇيەسىن جاساقتاۋ ۋاقىت تالابى ەدى.
وسى كەزگە دەيىن سوت سالاسى اتقارۋشى بيلىككە تاۋەلدى بولىپ كەلدى. ماتەريالدىق-تەحنيكالىق بازاسى ناشار, عيماراتتاردىڭ باسىم بولىگى توزعان كۇيىندە ەدى. سوتتاردىڭ جالاقىسى دا ماردىمسىز-دى. سول كەزەڭدە «ەگەمەن قازاقستاندا» الماتى وبلىستىق سوتىنىڭ توراعاسى مارات نۇربەكوۆپەن سۇحباتىمىز جاريالاندى. بىلىكتى زاڭگەر, ءپرينتسيپشىل ازامات مارات نۇربەك ۇلى «بۇل جاعدايدى بۇگىن مەن ايتپاعانمەن, ەرتەڭ ءبارىبىر باسقا بىرەۋ ايتار ەدى» دەپ سوت سالاسىنىڭ سول كەزدەگى جاعدايىن وتكىر سىن تەزىنە الدى. سوتتىڭ ماتەريالدىق-تەحنيكالىق بازاسىنىڭ ادام ايارلىقتاي جاعدايدا ەكەنىن, عيماراتتاردىڭ كوپتەن جوندەۋ كورمەي توزىپ كەتكەنىن, ءتىپتى تۇككە تۇرعىسىز مايدا-شۇيدە دەپ اتالاتىن قالامساپ پەن قاعازعا جارىماي وتىرعانىن اشىپ ايتقان, اشىنا ايتقان مارات نۇربەك ۇلىنىڭ وسى سۇحباتى قوعامنىڭ قوتىر جاراسىنىڭ اۋزىن تىرناپ جىبەرگەندەي بولدى. وسىنداي اۋىر جاعدايداعى, ءال-دارمەنى جوق اۋرۋ ادامعا مەگزەس حالدەگى جۇيەنىڭ تىزگىنىن قايرات ءمامي ءوز قولىنا الدى. ەندى قالاي بولادى؟ ول نە ىستەي الادى؟ وزىنە ارتىلعان سەنىمدى اقتاي الا ما؟ وسىلارعا ۇقساس سان سۇراقتار ونىڭ دۇشپاندارى تۇرماق, دوستارىن دا ويلاندىرماي قويمادى.
«ءبىزدىڭ نەگىزگى ماقساتىمىز, – دەپ ەدى كەزەكتى ءبىر ءباسپاسوز ءماسليحاتىندا قايرات ابدىرازاق ۇلى, – سوت جۇيەسىن دەربەستەندىرۋ, اتقارۋشى بيلىكتىڭ قۇزىرەتىنەن شىعارۋ. ءبىزدىڭ بۇل ويىمىزدى ەلباسىمىز قولداپ وتىر. سەبەبى, وركەنيەتتى دەگەن ەلدەردىڭ بارىندە بىردەي سوت تاۋەلسىز ءھام دەربەس». قانداي جاڭالىقتىڭ بولماسىن ىسكە اسۋى تەز ءارى جىلدام بولا قويمايتىنى تۇسىنىكتى. ءتۇرلى تالقىلاۋلار, پىكىرلەر الۋاندىعى, دۋالى اۋىزداردىڭ دالەلدى سوزدەرى قاجەت. ەڭ باستىسى, سولاردى ۇيىمداستىرا بىلگەن ۇتادى. مۇنداي جاعدايدا جاڭالىققا قارسىلاردىڭ دا كەزدەسەتىنى بار. كەدەرگى كەلتىرۋگە تىرىساتىندار دا تابىلادى. بىراق ۇتقىر وي, دالەلدى پىكىر جەڭبەي قويمايدى ەكەن. كوپ ۇزاماي سوت جۇيەسىندەگى ەڭ ۇلكەن جاڭالىق, العاشقى جەتىستىك جۇزەگە استى – سوت اتقارۋشى بيلىك قۇزىرەتىنەن بوساپ, ءوز الدىنا دەربەس تاۋەلسىز سوت اتاندى. ەڭ باستىسى, اكىمشىلىك, امىرشىلدىك نۇسقاۋلاردان قۇتىلدى.
راسىندا دا, وسى كەزەڭدە وراسان شارۋا تىندىرىلدى. سۋديالاردى ازىرلەيتىن سوت اكادەمياسى ەسىگىن اشتى, القابيلەر ينستيتۋتى قۇرىلدى, قاماۋعا سانكتسيا بەرۋ پروكۋراتۋرادان سوتقا اۋىستى, ارتىق سوت ينستانتسيالارى قىسقارتىلدى, ىستەردى ءبىرىنشى ينستانتسيا رەتىندە قاراۋ اۋداندىق جانە وعان تەڭەستىرىلگەن سوتتاردىڭ ايرىقشا قۇزىرەتىنە جاتقىزىلدى, سوت اكتىلەرىنە شاعىمدانۋ ساتىلارى جونگە كەلتىرىلدى. الەمدىك تاجىريبەگە سۇيەنە وتىرىپ, قاداعالاۋ ينستانتسيالارىنىڭ وكىلەتتىلىگى ەداۋىر قىسقارتىلدى. پروكۋراتۋرانىڭ ازاماتتىق پروتسەسكە ىقپالى شەكتەلدى. قىلمىستىق جانە ازاماتتىق ىستەر بويىنشا تولىققاندى اپەللياتسيانى ەنگىزۋ قوعام ومىرىندەگى ماڭىزدى وقيعاعا اينالدى. اپەللياتسيالىق ينستانتسيالار ءداستۇرلى تەكسەرۋشىلىك وكىلەتتىكتەردەن الاستاتىلدى, اۋداندىق سوتتاردىڭ جىبەرگەن قاتەلىكتەرى مەن كەمشىلىكتەرىن ءىستى قايتا قاراۋعا جىبەرمەي-اق بەلسەندى تۇردە تىكەلەي تۇزەتە باستادى. بۇل ءىس قاراۋداعى ورىنسىز سوزبالاۋعا توسقاۋىل قويىپ, ونى تۇبەگەيلى شەشۋدى تەزدەتتى. اپەللياتسيالىق سوتقا اۋداندىق سوتتىڭ دالەلدەمەلەردى زەردەلەۋ مەن باعالاۋ كەزىندەگى بارلىق وكىلەتتىگىن بەرۋگە, سوت اكتىسىنىڭ ساپاسىن اپەللياتسيا ينستانتسيالارىمەن قامتاماسىز ەتۋگە جول اشتى. ناتيجەسىندە, سۋديالاردى كونكۋرس ارقىلى اشىق تاڭداۋ ءراسىمى ەنگىزىلدى. ەلىمىزدە سوتتار ازاماتتاردىڭ قۇقىقتارى مەن زاڭدى ءمۇددەلەرىن قورعاۋدىڭ شىنايى ينستيتۋتىنا اينالدى.
بەلگىلى زاڭگەر سانسىزبەك رايىمباەۆ وسى كەزەڭدەردە سوت جۇيەسىندە اتقارىلعان قوماقتى شارۋالار تۋرالى بىلاي دەيدى: «2000 جىلعى كادرلار سالاسىنداعى جانە باسقا دا بىرقاتار وكىلەتتىكتەردى ادىلەت مينيسترلىگىنەن جوعارعى سوت پەن جاڭادان قۇرىلعان سوتتاردى ۇيىمدىق جانە ماتەريالدىق-تەحنيكالىق قامتاماسىز ەتۋ كوميتەتىنە بەرۋ ارقىلى سوت بيلىگىن اتقارۋشى بيلىكتەن ءبولۋ جونىندەگى شەشىم سۋديالاردىڭ تاۋەلسىزدىگىن قورعاۋ قاجەتتىلىگىنەن تۋىندادى. وسى امال ارقىلى كەيبىر شەندىلەردىڭ سوت تورەلىگىن جۇرگىزۋ پروتسەسىنە پروتسەسسۋالدىق ەمەس اسەر ەتۋگە دەگەن تالپىنىستارىنا توسقاۋىل قويىلدى. بۇل تۇرعىدان العاندا جوعارعى سوت پەن ونىڭ توراعاسى ق.ءماميدىڭ سوت بيلىگىن نىعايتۋعا قوسقان ۇلەسى ەلەۋلى بولدى».
ق.ءماميدىڭ تاعى ءبىر ماقساتى سوتتاردىڭ ماتەريالدىق-تەحنيكالىق بازاسىن جاقسارتۋ ەدى. سەبەبى, سوت ادىلدىگىن تالاپ ەتۋ ءۇشىن ەڭ الدىمەن ولاردىڭ جۇمىس ىستەۋىنە قولايلى مۇمكىندىكتىڭ قاجەتتىگىن ۇنەمى ايتىپ وتىراتىن. سول ايتقاندارىن ورىنداۋعا بار كۇش-جىگەرىن جۇمسادى. وبلىستىق, اۋداندىق, قالالىق سوتتار جايلى, جوندەۋدەن وتكەن, جاڭا زامانعا لايىق عيماراتتارعا كوشىرىلدى نەمەسە ولار وتىرعان عيماراتتار جاڭا زامانعا لايىق جوندەۋدەن وتكىزىلدى. بۇل ايتۋعا وڭاي, ال شىن مانىندە ۇلكەن ابىروي, بيىك بەدەلدىڭ ارقاسىندا عانا جۇزەگە اساتىن شارۋالار ەدى. سوندىقتان بۇل مىندەتتەردى ورىنداۋ ءۇشىن قايرات ابدىرازاق ۇلى ابىرويىن دا, بەدەلىن دە سالىپ كىرىستى.
قوعامنىڭ قاي سالاسىندا بولماسىن سىبايلاس جەمقورلىق سياقتى جەگى قۇرت كەزدەسپەي قويمايدى. مۇنداي دەرتتەن سوت جۇيەسى دە ادا ەمەس ەدى. بۇل دەرتپەن كۇرەسۋدىڭ ءبىر جولى – سۋديالاردىڭ سول كەزدەگى ماردىمسىز جالاقىسىن كوبەيتىپ, جاۋاپكەرشىلىگىن ارتتىرۋ دەپ تۇسىنگەن توراعا ەلباسى قولداۋىمەن بۇل ماسەلەنى دە شەشتى. سۋديالاردىڭ جالاقىسى كوتەرىلىپ, كوڭىلدەرى مارقايىپ قالدى.
قايرات ابدىرازاق ۇلى سوتتاردىڭ تۇرمىستىق-شارۋاشىلىق جاعدايىنا ۇنەمى كوڭىل بولە وتىرىپ, ءوزىنىڭ نەگىزگى جۇمىسىن دا شىعارماشىلىقپەن اتقارا ءبىلدى. ونىڭ جەتەكشىلىگىمەن «قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋتسيالىق زاڭى, «قازاقستان رەسپۋبليكاسىنىڭ جوعارى سوت كەڭەسى تۋرالى», «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى», «ارالىق سوتتار تۋرالى», «پروكۋراتۋرا تۋرالى», «قۇقىق قورعاۋ قىزمەتى تۋرالى» زاڭدارى جانە سوتتاردىڭ قۇقىق قولدانۋ تاجىريبەسىندەگى وزەكتى ماسەلەلەر جونىندەگى جوعارعى سوتتىڭ نورماتيۆتىك قاۋلىلارى ازىرلەندى. سوت سانكتسياسى بويىنشا قاماۋعا الۋ, سونداي-اق, ارناۋلى ەكونوميكالىق جانە يۋۆەنالدى سوتتار مەن القابيلەر سوتىن قۇرۋعا بايلانىستى زاڭ اكتىلەرىن ازىرلەۋگە جانە تاجىريبەگە ەنگىزۋگە تىكەلەي قاتىستى. قازاقستان رەسپۋبليكاسى جوعارعى سوتىنىڭ 2009-2011 جىلدارعا ارنالعان ستراتەگيالىق جوسپارى, سوتتى قالىپتاستىرۋ ستراتەگياسى ونىڭ جەتەكشىلىگىمەن ازىرلەندى. قازاقستان رەسپۋبليكاسىنىڭ سۋديالار وداعىن قۇرۋ تۋرالى باستاما كوتەرىپ, ونى حالىقارالىق سۋديالار اسسوتسياتسياسىنا مۇشە ەتۋدە قايرات ابدىرازاق ۇلىنىڭ ەڭبەگى زور.
سوت سالاسىنداعى ەلەۋلى تابىستار ونىڭ حالىقارالىق دارەجەدەگى بەدەلىن ارتتىرا ءتۇستى. 2003 جىلدىڭ كۇزىندە رەسەي استاناسى ماسكەۋدە رەسەي جانە قازاقستان سۋديالارىنىڭ بىرلەسكەن كونفەرەنتسياسى بولدى. بۇل ساپار ءماميدىڭ مارتەبەسىن كوتەرىپ, ابىرويىن اسقاقتاتىپ جىبەردى. حالىقارالىق كونفەرەنتسيانىڭ نەگىزگى ماقساتى – قازاقستان جانە رەسەيدەگى سوت-قۇقىقتىق جۇيەسى دامۋىنىڭ جاعدايى مەن كەلەشەگىن تالقىلاۋ بولاتىن. باسقوسۋ قازاقستان رەسپۋبليكاسى جوعارعى سوتى مەن ادىلەت مينيسترلىگىنىڭ, رەسەي جوعارعى سوتى, جوعارعى تورەلىك سوتى, سونداي-اق, حالىقارالىق زاڭگەرلەر وداعىنىڭ ۇيىمداستىرۋىمەن ءوتتى. بۇل كونفەرەنتسياعا جۋرناليست رەتىندە وسى جولداردىڭ اۆتورى دا قاتىسىپ, بىرنەشە مارتەبەلى مىرزالاردىڭ وي-پىكىرلەرىن تاسپاعا ءتۇسىرىپ العان بولاتىنبىز. «وسى كونفەرەنتسيادان تۇيگەنىم, – دەيدى رەسەي فەدەراتسياسى كونستيتۋتسيالىق سوتىنىڭ سۋدياسى بوريس ەبزەەۆ, – ەكى ەلدەگى ادىلەت سالاسىنىڭ پروبلەمالارى جالپى العاندا ۇقساس. مەنىڭشە, سوت رەفورماسىنا قاتىستى ماسەلەلەردە رەسەي الدىڭعى قاتاردا كەلە جاتقان سياقتى, بىراق سوت-قۇقىقتىق پوزيتسياسى تۇرعىسىنان كەلگەندە بىرقاتار ماسەلەلەر بويىنشا قازاقستان بىزدەن كوپ ىلگەرى تۇر». بۇل پىكىردى ەلىمىزدەگى ەلباسىنىڭ باسشىلىعىمەن جۇرگىزىلىپ جاتقان سوت-قۇقىقتىق رەفورماعا بەرىلگەن باعا دەپ تۇسىندىك. وسى كونفەرەنتسياعا قاتىسقان سول كەزدەگى گرۋزيا جوعارعى سوتىنىڭ توراعاسى لادو سانتۋريا «جۇرگىزىلىپ جاتقان سوت-قۇقىقتىق رەفورما بويىنشا قازاقستان بۇكىل تمد ەلدەرىنىڭ الدىندا تۇر. وعان البەتتە, پرەزيدەنت ن.نازارباەۆتىڭ قامقورلىعى سەپتىگىن تيگىزىپ وتىرعانىنان حابارىمىز بار. سونداي-اق, جوعارعى سوتتىڭ توراعاسى, حالىقارالىق زاڭگەرلەر وداعى توراعاسىنىڭ ورىنباسارى قايرات ءماميدىڭ ۇلكەن ۇلەس قوسىپ وتىرعانىنا سەنىمىم مول» دەگەن بولاتىن.
قايرات ءمامي كەشەگى «تۋعانى جوق تۋرا بيلەردىڭ» بۇگىنگى سارقىتى ىسپەتتەس. ول بۇگىنگى زامانعا لايىق ءبىلىم مەن بىلىك يەسى بولا تۇرا, «بيلىك ايتۋ – وڭاي, ءبىلىپ ايتۋ – قيىن» دەگەن ءپرينتسيپتى ۇستاناتىن ازامات. وسىدان ءبىراز جىل بۇرىن قازاقتىڭ ەكى بىردەي قابىرعالى قالامگەرلەرى ايتىسىپ قالىپ, ولاردىڭ تەكەتىرەستەرى جوعارعى سوتقا كەلىپ تىرەلگەن. سوندا قايرەكەڭ ءوز تورەلىگىن ايتىپ, ەكەۋىن ءبىر توقتامعا كەلتىرگەن.
ەلباسى ماميگە تاعى دا سەنىم ءبىلدىردى. 2009 جىلدىڭ ءساۋىر ايىندا ونى ءوزىنىڭ جارلىعىمەن قازاقستان رەسپۋبليكاسىنىڭ باس پروكۋرورى قىزمەتىنە تاعايىندادى. سوت سالاسىنداعى توعىز جىلدىق ەڭبەك, سول توعىز جىلدا اتقارىلعان قىرۋار شارۋا, ۇلكەن جەتىستىك ەلباسىنىڭ كوڭىلىنەن شىققان بولار, بالكىم. پروكۋراتۋرانى دا بيىك بەلەستەرگە كوتەرەدى دەگەن سەنىمى دە بولعان شىعار. سول لاۋازىمدا 2 جىل 12 كۇن قىزمەت ەتكەن قايرات ءمامي بۇل جەردە دە ءوزىنىڭ ىسكەرلىك قاسيەتىمەن كورىنە ءبىلدى. قۇقىق قورعاۋ جۇيەسى قىزمەتىنىڭ ساپاسىن ارتتىرۋدى, قۇقىق قورعاۋ ورگاندارىنىڭ ءوزارا ءىس-قيمىلىن ۇيلەستىرۋدى جاقسارتۋدى قامتاماسىز ەتتى, تەرگەۋ قۇقىعى ارنايى پروكۋرورلارعا قايتارىلدى. قازاقستان پروكۋرورلارى اسسوتسياتسياسىن قۇرۋ تۋرالى باستاما كوتەرگەن دە ءوزى ەدى. بۇل قۇرىلىم قازىرگى كەزدە حالىقارالىق پروكۋرورلار اسسوتسياتسياسىنىڭ تولىق قۇقىقتى مۇشەسى بولدى. پروكۋراتۋرا قىزمەتكەرلەرىنىڭ جالاقىسىن اسكەريلەرمەن تەڭەستىرۋگە, سونداي-اق, زەينەتكەرلىككە شىققان پروكۋراتۋرا قىزمەتكەرلەرىنىڭ زەينەتاقىسىنىڭ كوبەيۋىنە ىقپال جاسادى.
ەلباسى ق.ماميگە جانە سەنىم ءبىلدىردى. اتىنا سىن, زاتىنا ءمىن تۇسىرمەي توعىز جىل سوت سالاسىن باسقارىپ, ەكى جىل باس پروكۋرور بولعان ونى پرەزيدەنت ن.نازارباەۆ ءوز جارلىعىمەن 2011 جىلى 15 ساۋىردە سەناتقا دەپۋتات قىلىپ تاعايىندادى دا, سول كۇنى ەلباسىنىڭ ۇسىنىسىمەن قايرات ابدىرازاق ۇلى قازاقستان رەسپۋبليكاسى سەناتىنىڭ توراعاسى بولىپ سايلاندى. سەنات دەپۋتاتتارى قابىلداعان قاۋلىعا سايكەس, پارلامەنت سەناتىنىڭ توراعاسى قايرات ءمامي ەقىۇ پارلامەنتتىك اسسامبلەياسىنا دەلەگاتسيا باسشىسى, تمد-عا مۇشە مەملەكەتتەردىڭ پارلامەنتارالىق اسسامبلەياسىنا كەڭەس مۇشەسى, دەلەگاتسيا باسشىسى, ەۋرازيالىق ەكونوميكالىق قوعامداستىقتىڭ پارلامەنتارالىق اسسامبلەياسىنا بيۋرو مۇشەسى, دەلەگاتسيا باسشىسى, ۇجىمدىق قاۋىپسىزدىك شارت ۇيىمىنىڭ پارلامەنتتىك اسسامبلەياسىنا كەڭەس مۇشەسى, دەلەگاتسيا باسشىسى, سونداي-اق, تۇركىتىلدەس ەلدەردىڭ پارلامەنتتىك اسسامبلەياسىنا كەڭەس مۇشەسى بولىپ سايلاندى. وزىنە سەنىپ تاپسىرىلعان سەنات سپيكەرلىگىن ابىرويمەن, بەدەلمەن اتقاردى.
2013 جىلدىڭ 16 قازانىندا قايرات ءمامي قازاقستان رەسپۋبليكاسى جوعارعى سوتىنىڭ تىزگىنىن قولىنا قايتا الدى. وسى سالاعا تىكەلەي دە, جاناما دا قاتىسى بار دەيتىن جۇرت جاڭا توراعانىڭ كىم بولاتىنى جونىندە الىپقاشتى اڭگىمەنىڭ تيەگىن اعىتتى. ءتۇرلى جورامالداردىڭ اراسىندا سول كەزدەگى سەنات توراعاسى قايرات ءماميدىڭ اتى جيىرەك اتالاتىنىن بايقادىق. «سەبەبى, – دەيدى وسى پىكىردى قولداۋشىلار, – ءمامي سوت سالاسىندا ءوزىن مويىنداتقان تۇلعا». وسىلاي ايتقان جۇرتتىڭ ءسوزى راسقا شىقتى. ەلباسى قايرات ابدىرازاق ۇلىنا جوعارعى سوتتىڭ تىزگىنىن قايتا تابىستادى. بۇل – پرەزيدەنتتىڭ قايرات ماميگە دەگەن كەزەكتى سەنىمى ەدى.
2004 جىلعى جازعان ماقالامىزدا «ەلىمىزدە, قۇدايعا شۇكىر, وقىمىستى كوپ, بىراق ونىڭ ءبارى بىردەي زيالى ەمەس. تاعى ءبىر شۇكىرشىلىك – ەلىمىزدە زيالىلار دا از ەمەس. بىراق ولاردىڭ ءبارى بىردەي تۇلعا ەمەس. تۇلعا ساناۋلى-اق. سول ساناۋلىنىڭ ءبىرى – قايرات ءمامي. ونىڭ تۇلعالىلىعى – ونىڭ زاڭ عىلىمدارىنىڭ دوكتورى بولعاندىعىندا ەمەس. ونىڭ تۇلعالىلىعى – حالىقارالىق زاڭگەرلەر وداعى توراعاسىنىڭ ورىنباسارى بولعاندىعىندا ەمەس. ءتىپتى, ونىڭ تۇلعالىلىعى بۇكىل شەن-شەكپەن, اتاق ابىرويىندا دا ەمەس. ونىڭ تۇلعالىلىعى – ەلىنە سىڭىرگەن ەڭبەگى, سوعان لايىق حالقىنىڭ الدىنداعى قادىر-قاسيەتىندە, ەلىنىڭ ءوز ازاماتىنا دەگەن قۇرمەتىندە. اقىرىن ءجۇرىپ, انىق باسىپ كەلە جاتقان قايرات ابدىرازاق ۇلى سول حالقىنىڭ, سول ەلىنىڭ الدىندا ءالى دە قىزمەت ەتە بەرەدى دەپ سەنەمىز» دەپ جازعان ەكەنبىز.
سول لەبىزىمىزدى بۇگىن ون جىل وتكەن سوڭ تاعى ءبىر مارتە قايتالاعانىمىزدىڭ ابەستىگى جوق شىعار...
شارافاددين ءامىر,
«ەگەمەن قازاقستان».