جوعارى وقۋ ورنىنىڭ ىرگەتاسى قالاندى

مەملەكەت باسشىسى قاسىم-جومارت توقاەۆ جىل باسىندا 2025 جىلعا قاراي قازاقستاندا كەم دەگەندە 5 وزىق شەتەلدىك جوعارى وقۋ ورىندارىنىڭ فيليالىن اشۋدى تاپسىرعان بولاتىن. وسىعان وراي ەلىمىزدە جاڭا ۋنيۆەرسيتەت بوي كوتەرمەك. جوبانى جۇزەگە اسىرۋعا QS 2022 پاندىك رەيتينگى جانە شانحاي ARWU بويىنشا اقش-تىڭ ۇزدىك 10 ءبىلىم بەرۋ ۇيىمىنىڭ قاتارىنا كىرەتىن ميچيگان ۋنيۆەرسيتەتى سەرىكتەس بولىپ وتىر. بۇل شەتەلدىك جوو نەگىزىنەن ءبىلىم بەرۋ, قۇرىلىس جانە ساۋلەت سالالارىندا حالىقارالىق دەڭگەيدەگى جوعارى بىلىكتى كادرلاردى دايىندايدى. جاڭا ۋنيۆەرسيتەت جەكە ينۆەس­تيتسيا ەسەبىنەن سالىنادى.

«بيىل قاڭتار ايىندا پرە­زيدەنت قاسىم-جومارت توقاەۆ قازاقستاندا الدىڭعى قاتارلى شەتەلدىك جوعارى وقۋ ورىندارىنىڭ فيليالدارىن اشۋدى تاپسىردى. بۇل جۇمىس قازىرگى كادرلاردى نىعايتۋ جانە بىلىكتى قىزمەتكەرلەردىڭ تاپشىلىعىن جويۋ, ءبىلىم ساپاسى مەن ادامي كاپيتالدى ارتتىرۋ ءۇشىن قاجەت. مۇنداي جاھاندىق ماقساتقا قول جەتكىزۋ باستاماسىن ءبىلىم سالاسىنداعى تابىس­تى جوبالار قورجىنى بار BI Group حولدينگى كوتەردى», دەدى ءىس-شارادا ءسوز العان ۆيتسە-پرەمەر ەرالى توعجانوۆ.

ال BI Group ديرەكتورلار كەڭەسىنىڭ توراعاسى ايدىن راحىمباەۆ ءوز كەزەگىندە جوباعا قاتىستى ويىن:

ء«بىز ءۇشىن وتە جوعارى حالىقارالىق رەيتينگى بار, ءبىلىم بەرۋ جانە قۇرىلىس سياقتى ماڭىزدى سالالاردى دامىتۋعا ەلەۋلى ۇلەس قوسا الاتىن سەرىكتەس تابۋ ماڭىزدى بولدى. وتكەن ناۋ­رىز ايىندا ميچيگان مەم­لە­كەتتىك ۋنيۆەرسيتەتىمەن ىنتى­ماق­تاستىق تۋرالى كەلىسىمگە قول قويدىق. بۇگىندە ولار ەلوردا مەكتەپتەرىنىڭ ديرەكتورلارى مەن وقۋ ءىسىنىڭ مەڭگەرۋشىلەرى ءۇشىن ارنايى بىلىكتىلىكتى ارتتىرۋ كۋرستارىن ازىرلەپ, سول وقۋدى 2022 جىلدىڭ 16 مامىرى مەن 15 شىلدەسى ارالىعىندا وتكىزدى. ەندى نۇر-سۇلتانداعى جاڭا ۋنيۆەرسيتەتتىڭ ادىستەمەسى مەن وقىتۋ باعدارلاماسى جاسالادى. مۇنداي حالىقارالىق جوبانى دامىتۋدىڭ ۇزاق مەرزىمدى پەرس­پەكتيۆاسى بار», دەپ جەتكىزدى.

جوبانى ۇيلەستىرۋشىلەردىڭ ايتۋىنشا, جاڭا ۋنيۆەرسيتەت بىلىكتى كادرلارعا دەگەن جوعارى سۇرانىستى ەسكەرە وتىرىپ, باكالاۆريات, ماگيستراتۋرا جانە دوكتورانتۋرادان باسقا قىسقا مەرزىمدى ۇزدىكسىز ءبىلىم بەرۋ كۋرس­تارىن ۇسىنباق. مۇنداي كۋرستار ماماندارعا جاڭا باعىتتار بويىنشا سەرتيفيكاتتار مەن ءبىلىم الۋعا نەمەسە بىلىكتىلىگىن ارتتىرۋعا مۇمكىندىك بەرەدى. سونىمەن قاتار ۋنيۆەرسيتەت ءبىلىم ساپاسى, جاڭا تەحنولوگيالار, قۇرىلىس جانە ساۋلەت سالالارىندا عىلىمي-زەرتتەۋ قىزمەتىمەن اينالىسادى.

ۋنيۆەرسيتەت قالاشىعى ەسىل اۋدانىندا, تۇران داڭعىلىنىڭ بويىندا ورنالاسادى. جوبانىڭ ءبىرىنشى كەزەڭى اياسىندا 2 مىڭ ورىندىق اكادەميالىق بلوك پەن 500 ورىندىق جاتاقحانا سالىنادى. ۇزاق مەرزىمدى پەرس­پەكتيۆادا بارلىق قاجەتتى ينفرا­قۇرىلىمى بار 20 مىڭ ستۋ­دەنتكە ارنالعان تولىققان­دى كامپۋس, سونىڭ ىشىندە سايا­باق­تار, سپورتتىق-ساۋىقتىرۋ كەشەن­دەرى, زەرتحانالار, تەحنوپارك, بيز­نەس-ينكۋباتور جانە ت.ب. سالۋ جوسپارلانىپ وتىر. ءبىرىنشى كە­زەڭ­نىڭ اياقتالۋى 2024 جىلدىڭ ەكىنشى توقسانىنا جوسپارلانعان.

سالتاناتتى راسىمدە قالانعان كاپسۋلانىڭ ىشىندە بولاشاققا جازىلعان حات بار. حاتتى كەلەشەك ۇرپاق 2050 جىلى, ياعني شامامەن 30 جىلدان كەيىن اشىپ وقي الادى.