13 شىلدە ساعات 14:30 شاماسىندا جاڭاجول كەنتى مەن مۇعالجار اۋدانىنىڭ سەۆەرنايا ترۋبا كەن ورنى اراسىندا جول-كولىك وقيعاسى بولدى, دەپ حابارلايدى Egemen.kz Polisia.kz سايتىنا سىلتەمە جاساپ.
25 جاستاعى ۋاز اۆتوكولىگىنىڭ جۇرگىزۋشىسى وندىرىستىك اۋماقتا جاڭاجول كەنتى باعىتىندا قارسى باعىتقا شىعىپ كەتىپ, Shacman جۇك كولىگىمەن سوقتىعىسقان.
وقيعا سالدارىنان ۋاز اۆتوكولىگىنىڭ جۇرگىزۋشىسى مەن جولاۋشىسى كەڭقياق كەنتىنىڭ اۋرۋحاناسىنا جاتقىزىلدى. سونداي-اق وسى كولىكتىڭ ەكى جولاۋشىسى العان جاراقاتتارىنان وقيعا ورنىندا كوز جۇمعان.
قر قك-ءنىڭ 345-بابى 4-بولىگى (كولiك قۇرالدارىن باسقاراتىن ادامداردىڭ جول ءجۇرىسى نەمەسە كولiك قۇرالدارىن پايدالانۋ قاعيدالارىن بۇزۋى) بويىنشا سوتقا دەيىنگى تەرگەۋ باستالدى.