قۇبىرمەن بىرگە ۇزىلگەن قوس تاعدىر

جاقىندا «تەڭىز» كەن ور­نىن­­داعى جارىلىس بارشانى الاڭ­داتتى. وبلىستىق توتەنشە جاع­دايلار دەپارتامەنتى قوعاممەن باي­لانىس توبىنىڭ مالىمەتىنە سۇيەنسەك, كەن ورنىنداعى 3-بۋىن زاۋىتىنىڭ 42-ۋچاسكەسىندە گيدروتەست جۇرگىزىلگەن. جەرگىلىكتى ۋاقىتپەن ساعات 9:55-تە قۇبىردىڭ ف­لانەتستى قوسىندىسى ۇزىلگەن. سو­نىڭ سالدارىنان ەكى ادامنىڭ ولى­مىنە سوقتىرعان جارىلىس بولعان.

اتالعان جوبانى ىسكە اسىراتىن مەردىگەر كومپانيا – «سەن­ىم­­دى قۇرىلىس» جشس-دە جۇ­مىس ىستەيتىن 1985 جىلعى ەر ادام وقيعا ورنىندا قازا تاپتى. كەيىن «تەڭىزشەۆرويل» جشس-نە قاراستى مەديتسينالىق كلينيكادا «اگروپروم تەحنيكا» جشس-ءنىڭ ءبىر جۇمىسشىسى قايتىس بولدى. جارىلىستان ءجانتاسىلىم ەتكەن ەكى جۇمىسشى 37 جاستا ەكەن.

وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنشا, جارا­قات العانداردىڭ ءبىرى – 1996 جىلعى جىگىت ەكى ساعاتتىڭ ىشىندە وبلىستىق اۋرۋحاناعا جەتكىزىلدى. ونىڭ ىشكى اعزاسى زاقىمدانعان. دارىگەرلەر ناۋقاستىڭ باۋىرى مەن بۇيرەگىنە تىگۋ ارقىلى قالپىنا كەلتىرۋ وتاسىن جۇرگىزدى. سونداي-اق ناۋقاستىڭ ءوت جولى ۇزىلگەنى بەلگىلى بولدى. ومىرتقاسى مەن بىرنەشە قابىرعاسى سىنعان. قازىر ناۋقاستىڭ جاعدايى اۋىر. دارىگەرلەر ناۋقاستىڭ جاعدايىن ۇنەمى باقىلاۋدا ۇستاپ وتىر,  دەيدى ا.بايدۋاليەۆ.

ونىڭ ايتۋىنا قاراعاندا, جاراقات العاننىڭ ەكىنشىسى – 1998 جىلعى جۇمىسشى. وعان العاشقى پسيحولوگيالىق كومەك كورسەتىلگەن. كەيىن زارداپ شەككەن جۇمىسشى ەسىن جيىپ, ءوز-وزىنە كەلە باستاعان. ال ءۇشىنشى جۇمىسشى جىلىوي اۋداندىق ورتالىق اۋرۋحاناسىنا جەتكىزىلگەن. ول ءوزىنىڭ قولحاتىنىڭ نەگىزىندە ۇيىنە جىبەرىلگەن. «زارداپ شەككەن جۇمىسشى كومپيۋتەرلىك توموگرافياعا, رەنتگەنگە ءتۇسىرىلدى. ونىڭ ازداعان جاراقاتى بولعان. قازىر جاعدايى قاناعاتتانارلىق دەپ باعالانىپ وتىر», دەپ ءمالىم ەتتى ا.بايدۋاليەۆ.

«سەنىمدى قۇرىلىس» جشس-نىڭ وندىرىستىك قاتىناستار جونىن­دەگى مەنەدجەرى گۇلميرا باپا­نوۆانىڭ مالىمەتىنشە, جارىلىستان كەيىن وندىرىستىك نىسانداعى جۇمىس ءىشىنارا توقتاتىلعان. قاي­عىلى وقيعا ۆاحتالىق اۋىسىمنىڭ اياق­­تا­لۋىنا ەكى كۇن قالعاندا بولعان.

– جارىلىس بولعاننان كەيىن 4 مىڭعا جۋىق جۇمىسشى دەمالىسقا جىبەرىلدى. جۇمىسشىلارعا زاڭ­دىلىققا سايكەس جالاقى تولە­نەد­ى. ءوندىرىس الاڭىنداعى جارى­لىستىڭ سەبەبىن انىقتاۋ ءۇشىن «تەڭىزشەۆرويل» جشس مەن وب­لىس­تىق مەملەكەتتىك ەڭبەك ينس­پەكتسياسى باسقارماسىنىڭ قىز­مەتكەرلەرى كىرگەن بىرلەسكەن كوميسسيا قۇرىلدى. تەكسەرۋ كوميسسياسىنا قاجەتتى قۇجاتتاردىڭ ءبارىن بەردىك. سوندىقتان جارى­لىستىڭ سەبەبى تەكسەرۋدەن سوڭ انىق­تالادى, – دەيدى گ.با­پانوۆا.

مەنەدجەردىڭ تۇسىندىرۋىنشە, جارىلىستان كوز جۇمعان ەكى جۇمىسشىنىڭ وتباسىنا ماتە­ريالدىق قولداۋ كورسەتىلگەلى وتىر. كومپانيا مارقۇمداردى سوڭعى ساپارعا شىعارىپ سالۋعا جۇمسالاتىن بارلىق ماتەريالدىق شىعىندى ءوز موينىنا الىپ, ءىرى قارا ساتىپ الۋعا 500 مىڭ تەڭگەدەن قارجى بەرگەن.

– ءبىزدىڭ كومپانيانىڭ باس­شىلىعى مارقۇمداردىڭ بارلىق قارىزى مەن نەسيەسىن جاۋىپ بەرۋ, بالالارىنىڭ وقۋ اقىسىن تولەۋ تۋرالى شەشىم قابىلدادى. الداعى ۋاقىتتا بۇل وتباسىلارعا ۇدايى كومەكتەسۋدى مىندەتىمىزگە الامىز, – دەپ ءمالىم ەتتى كومپانيا مەنەدجەرى.

اتىراۋ وبلىسى