2030 جىلى قازاقستانداعى جۇمىسقا جارامدى تۇرعىنداردىڭ 80%-ى – 30-عا تولماعان جاستار بولادى. بۇل تۋرالى پرەمەر-مينيستر ءاليحان سمايىلوۆ سەنات دەپۋتاتىنىڭ ساۋالىنا بەرگەن جاۋابىندا ايتتى, دەپ حابارلايدى Egemen.kz.
«قازىر جاستاردى جۇمىسقا تارتۋ ۇكىمەتتىڭ باستى نازارىندا. وزىڭىزگە ءمالىم, 2000 جىلدان باستاپ 300-400 مىڭ بالا دۇنيەگە كەلىپ, ەل دەموگرافياسى وڭالدى. قازىر ولاردىڭ الدى ەڭبەككە جارامدى جاسقا جەتتى – جۇمىس كۇشىنىڭ 60%-ى, ال 2030 جىلى ولاردىڭ ۇلەسى 80%-عا جەتەدى. جاستار ءۇشىن جىل سايىن 1 ميلليونعا جۋىق جۇمىس ورنى اشىلۋى ءتيىس», دەلىنگەن جاۋاپتا.
ۇكىمەت باسشىسىنىڭ ايتۋىنشا, ازاماتتاردى تابىستى جۇمىسپەن قامتۋ ءۇشىن باستاپقى تەڭ جاعدايلار جاسالادى. اسىرەسە, جاستار ءۇشىن ءتۇرلى تەتىكتەر قاراستىرىلىپ جاتىر. ولار:
1) جىل سايىن 100 مىڭعا جۋىق جاستى ءوندىرىس ورىندارىنا جۇمىسقا ورنالاستىرۋ;
2) جامبىل وبلىسىنداعى پيلوتتىق جوبانىڭ نەگىزىندە اۋىل جاستارىن كووپەراتيۆتەر ارقىلى تۇرعىلىقتى مەكەنىندە جاپپاي جۇمىسقا تارتۋ;
3) «ديپلوممەن اۋىلعا» جانە «جاستار پراكتيكاسى» باعدارلامالارىن قايتا قاراۋ ارقىلى وڭىرلەرگە جۇمىسقا تارتىلعان جاستارعا ەڭبەكاقىمەن بىرگە ۇستەماقى جانە ديففەرەنتسيالانعان الەۋمەتتىك پاكەت ۇسىنۋ;
4) جاستاردىڭ كاسىپكەرلىك باستامالارىن قولداۋ ءۇشىن گرانتتار ءبولۋ. بيىل جاستارعا ارنالعان 10 مىڭ گرانت قارالىپ وتىر, ال ونىڭ سوماسى 1,2 ملن تەڭگەگە جەتكىزىلدى.
5) «العاشقى جۇمىس ورنى» باعدارلاماسى اياسىندا جۇمىس بەرۋشىلەرمەن بىرگە مەكتەپ تۇلەكتەرىن جانە ۇبت تاپسىرماعانداردى جۇمىسپەن قامتۋ.
«قارالىپ وتىرعان شارالار جاستاردى جۇمىسپەن قامتۋ جانە جۇمىسقا ورنالاستىرۋ پروبلەمالارىن شەشۋگە ىقپال ەتەدى», دەلىنگەن ءاليحان سمايىلوۆتىڭ جاۋابىندا.