بيىلعى ۇلتتىق بىرىڭعاي تەستىلەۋ اياقتالدى. تاپسىرۋشىلاردىڭ 51 مىڭعا جۋىعى (33%-ى) شەكتى بالل جيناي المادى. تۇلەكتەردىڭ 76%-عا جۋىعى قازاق تىلىندە, 24%-ى ورىس تىلىندە, 0,1%-ى (213 بالا) اعىلشىن تىلىندە تاپسىردى. ۇبت-نىڭ قورىتىندىسىنا قاتىستى وسى جانە وزگە جاڭالىقتار پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە ايتىلدى.
وسى جىلى تالاپكەرلەرگە نەگىزگى تەستىلەۋدى ەكى رەت تاپسىرۋعا مۇمكىندىك بەرىلدى. ولار ەڭ جاقسى ناتيجەسىن گرانت يەلەنۋ ءۇشىن كونكۋرسقا جولداي الادى. دەگەنمەن ۇمىتكەرلەر ەكى مۇمكىندىكتە دە ءبىر عانا بەيىندى ءپاندى تاڭداۋعا قۇقىلى. عىلىم جانە جوعارى ءبىلىم مينيسترلىگىنە قاراستى جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى گۇلجان جاراسوۆانىڭ ايتۋىنشا, 154 مىڭ تالاپكەر ەكى مۇمكىندىكتى ەسەپتەگەندە 276 مىڭ رەت تەست تاپسىرعان.
«نەگىزگى ۇبت-عا قاتىسۋعا 290 مىڭعا جۋىق ءوتىنىش كەلىپ ءتۇستى, ولاردىڭ ىشىندە 160 مىڭ ءوتىنىش ءبىرىنشى, 130 مىڭى ەكىنشى مۇمكىندىككە بەرىلگەن. ۇبت قورىتىندىسى بويىنشا 154 مىڭ تالاپكەر ەكى مۇمكىندىكتى ەسەپتەگەندە 276 مىڭ رەت تەست تاپسىردى. ەرەكشە ءبىلىم بەرۋ قاجەتتىلىكتەرى بار تالاپكەرلەردىڭ تەستىلەۋدى ىڭعايلى تاپسىرۋى ءۇشىن ۇبت تاپسىرۋ ۋاقىتى 40 مينۋتقا ۇزارتىلدى. سونىمەن قاتار ولار ءۇشىن سىزبا جانە دياگراممالارسىز سۇراقتار جاسالدى. قابىلدانعان شارالار ارقاسىندا ەرەكشە ءبىلىم بەرۋ قاجەتتىلىكتەرى بار تەستىلەنۋشىلەر سانى ارتىپ كەلەدى. ەگەر 2021 جىلى نەگىزگى ۇبت-عا 90 بالا قاتىسسا, بيىل ولاردىڭ سانى 10 ەسەگە جۋىق ارتىپ, ۇبت-عا ەرەكشە ءبىلىم بەرۋ قاجەتتىلىگى بار 811 بالا قاتىستى. تەست تاپسىرۋ تىلىنە كەلسەك, تۇلەكتەردىڭ 76%-عا جۋىعى قازاق تىلىندە, 24%-ى ورىس تىلىندە, 0,1%-ى (213 بالا) اعىلشىن تىلىندە تەستىلەۋدەن ءوتتى», دەدى گ.جاراسوۆا.
دەپارتامەنت ديرەكتورىنىڭ دەرەگىنە قاراعاندا, بيىل ۇبت سۇراقتارى تولىقتاي جاڭارتىلعان ءبىلىم بەرۋ باعدارلاماسى بويىنشا قۇراستىرىلدى. «قازاقستان تاريحى» ءپانى بويىنشا كونتەكستىك تەست تاپسىرمالارى ەنگىزىلدى. ياعني 15 سۇراقتىڭ 5 سۇراعى كونتەكستىك سۇراقتار, ءماتىندى وقىپ سۇراقتارعا جاۋاپ بەرۋ قاجەت. سونىمەن قاتار ەكى جىل قاتارىنان قازاقستان تاريحى جانە دۇنيەجۇزى تاريحى پاندەرى بويىنشا 100 داتا بەكىتىلدى. تەستىلەۋ بارىسىندا كەزدەسەتىن داتالار تەك وسى 100 داتادان بولدى. ولار جەلتوقسان ايىندا اشىق دەرەككوزدەرگە (ۇتو سايتى مەن الەۋمەتتىك جەلىلەرىندە) ىلىنگەن.
«شەكتى بالدارعا توقتالساق, «قۇقىق» ءبىلىم بەرۋ سالاسى بويىنشا شەكتى بالل وزگەرىپ, 75 بالدى قۇرادى. ءبىلىم بەرۋدىڭ باسقا سالالارى بويىنشا وزگەرىستەر جوق. ياعني «پەداگوگيكالىق عىلىمدار» ءبىلىم بەرۋ سالاسى بويىنشا – كەمىندە 75 بالل, «دەنساۋلىق ساقتاۋ (مەديتسينا)» ءبىلىم بەرۋ سالاسى بويىنشا – كەمىندە 70 بالل, «اۋىل شارۋاشىلىعى جانە بيورەسۋرستار», «ۆەتەريناريا» ءبىلىم بەرۋ سالالارى بويىنشا – كەمىندە 60 بالل. ۇلتتىق جوو-عا – كەمىندە 65 بالل, ال باسقا جوو-عا كەمىندە 50 بالل. ەرەجەلەرگە سايكەس بارلىق بەينەجازبا جىل اياعىنا دەيىن تالدانىپ, تىيىم سالىنعان زاتتاردى پايدالانۋ انىقتالعان جاعدايدا, تەستىلەۋشىنىڭ بالدارىمەن قوسا ءبىلىم بەرۋ گرانتىن تاعايىنداۋ كونكۋرسىنىڭ ناتيجەسى دە جويىلادى», دەدى گ.جاراسوۆا.
ال ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆتىڭ مالىمدەۋىنشە, تەستىلەۋ قورىتىندىسى بويىنشا 103 مىڭنان اسا تالاپكەر شەكتى بالل جينادى, بۇل قاتىسۋشىلاردىڭ جالپى سانىنىڭ 67%-ىن قۇرايدى. اتالعان كورسەتكىش وتكەن جىلمەن سالىستىرعاندا 7%-عا جوعارىلادى. تەستىلەنۋشىلەردىڭ 51 مىڭعا جۋىعى (33%-ى) شەكتى بالل جيناي المادى. بيىلعى ۇبت-نىڭ ورتاشا بالى 66 بالدى, ەڭ جوعارى بالل 139-دى قۇرادى. 3 179 وقۋعا ءتۇسۋشى 120 بالدان جوعارى جينادى.
«ۇبت-عا تىيىم سالىنعان زاتتاردى كىرگىزۋ ارەكەتتەرى مەن ۇبت ەرەجەلەرىن بۇزۋ سانى ءبىرشاما ازايعانىن ەرەكشە اتاپ وتكىم كەلەدى. ماسەلەن, بىلتىر 756 تۇلەك ۇبت-عا تىيىم سالىنعان زاتتاردى الىپ وتۋگە تىرىسسا, بيىل مۇنداي 327 جاعداي تىركەلدى. بۇل 2020 جىلى ەرەجە بۇزۋعا تىرىسقان قاتىسۋشىلاردى تەستىلەۋگە جىبەرمەۋ تۋرالى نورمانىڭ ەنگىزىلۋى مەن ءاربىر تەستىلەنۋشى ءۇشىن فرونتالدى كامەرالارىن ورناتۋمەن بايلانىستى (نورما ەنگىزىلگەنگە دەيىن 2019 جىلى تەستىلەۋگە كىرگىزۋدە 128 مىڭ, 2020 جىلى 2 522 تىيىم سالىنعان زات تابىلعان ەدى. ياعني 2019 جىلمەن سالىستىرعاندا شپارگالكالار مەن سمارتفونداردى الىپ كىرگىزۋگە تالپىنۋشىلار سانى 400 ەسەگە ازايدى). تەستىلەۋ كەزىندە ەرەجەلەردى بۇزعانى ءۇشىن 322 ادام اۋديتوريادان شىعارىلىپ, ناتيجەلەرى جويىلدى. كورسەتكىشتەر ءتورت ەسەگە تومەندەگەن, سەبەبى 2021 جىلى اۋديتوريادان 1 305 ادام شىعارىلعان ەدى», دەدى ر.ەمەلباەۆ.
ۇلتتىق تەستىلەۋ ورتالىعى ديرەكتورىنىڭ حابارلاۋىنشا, بارلىق بەينەجازباعا 31 جەلتوقسانعا دەيىن تالداۋ جاسالادى. ەگەر تىيىم سالىنعان زاتتاردى پايدالانۋ فاكتىلەرى انىقتالسا, تالاپكەر ءبىلىم بەرۋ گرانتىنان ايىرىلادى. ەستەرىڭىزدە بولسا, بۇل نورما 2020 جىلى العاش رەت قولدانىلعان ەدى. 2020 جىلى بەينەجازبالاردى قايتا قاراۋ ناتيجەسىندە 152 تەستىلەنۋشىنىڭ, 2021 جىلى 52 ادامنىڭ ناتيجەسى جويىلعان بولاتىن. پوستپروكتورينگ ناتيجەسى بويىنشا قازىرگى تاڭدا 15 ادامنىڭ ناتيجەسى جويىلدى. 200-دەن اسا تالاپكەردىڭ ناتيجەلەرى تەكسەرىلىپ جاتىر. ۇبت-نىڭ ءۇشىنشى اپتاسىندا قاتىسۋشى ءوزىنىڭ ورنىنا باسقا تۇلعانى (اعاسىن) جىبەرگەن. ۇبت-عا كىرگىزۋ بارىسىندا Face-ID جەكە باسىن سايكەستەندىرۋ جۇيەسى بوگدە ادامدى انىقتادى. ءتيىستى ءىس-شارالار قابىلداندى. بىلتىر مۇنداي 18 جاعداي انىقتالعان ەدى. نەگىزگى ۇبت-2022 بارىسىندا 50 مىڭنان اسا ادام اپپەلياتسياعا ءوتىنىش بەرگەن, ونىڭ 318-ءى ءوتىنىش قاناعاتتاندىرىلدى.