بۇعان دەيىن كاسىپتىك-تەحنيكالىق ءبىلىم بەرۋ ۇيىمدارىنىڭ ىزدەنۋشىلەرىنە قاتىستى جاڭا زاڭنامالىق وزگەرىس ەنگىزىلگەنىن حابارلاعانبىز. بۇل وزگەرىس مەملەكەتتىك كوللەدجدەردىڭ ستۋدەنتتەرىنە وقۋىن توقتاتپاي-اق جۇمىس ىستەپ, ەڭبەكاقى الۋعا مۇمكىندىك بەردى. وقۋ-اعارتۋ مينيسترلىگىنىڭ مالىمدەۋىنشە, 2021-2022 وقۋ جىلىندا قابىلدانعان زاڭنامالىق نورمالاردىڭ ارقاسىندا مىڭداعان ستۋدەنت تابىس تاۋىپتى.
جاڭا زاڭنامالىق تۇزەتۋلەر كوللەدج ستۋدەنتتەرىنە وقۋ-وندىرىستىك تسەحتار مەن وقۋ شارۋاشىلىقتارىندا وزدەرى وندىرگەن ونىمدەردى ساتۋعا جاعداي جاسايدى. وزگەرىستەردى ازىرلەۋشىلەر مۇنداي شارا ستۋدەنتتەردىڭ وقۋعا دەگەن قىزىعۋشىلىعىن ارتتىرىپ, ىنتالاندىراتىنىن اتاپ ءوتتى.
جاۋاپتى ۆەدومستۆو جانىنداعى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا ستۋدەنتتەردىڭ كوبىنە نان جانە كونديتەرلىك ونىمدەرى ساتىلاتىنىن جەتكىزدى.
«قازىرگى تاڭدا 444 مەملەكەتتىك كوللەدجدىڭ 97-ىندە ستۋدەنتتەر ءوز ونىمدەرى مەن قىزمەتتەرىن ساتىپ جاتىر. مىسالى, ولار كوللەدج قابىرعاسىندا دايىندالعان تاتتىلەردى, نان-توقاش جانە كونديتەرلىك ونىمدەردى ساتادى. سونداي-اق «دانەكەرلەۋ ءىسى» ماماندىعى بويىنشا وقيتىن ستۋدەنتتەر وندىرىستىك تاجىريبە كەزىندە تەمىردەن كونسترۋكتسيالار جاساپ, ەڭبەك نارىعىنا شىعارادى. ءبىز بۇل جەردە تولىق كاسىپكەرلىك قىزمەت تۋرالى ەمەس, تەك وندىرىستىك وقۋ مەن تاجىريبە كەزىندە وندىرىلگەن ونىمدەردىڭ ساتىلىپ, كوللەدج بيۋدجەتىن تولىقتىرۋعا بولاتىنىن عانا ايتىپ وتىرمىز. بۇل قاراجاتتى وندىرىستىك وقىتۋعا ارنالعان ەلەكترودتاردى نەمەسە مەتالدى ساتىپ الۋعا پايدالانۋعا بولادى. مۇنداي جۇمىستار ەلىمىزدىڭ باسقا كوللەدجدەرىندە دە جالعاسىن تابادى», دەيدى ن.وسپانوۆا.