ەلىمىزدەگى بالالاردى 1-سىنىپقا قابىلداۋ جۇرگىزىلىپ جاتىر. وقۋ-اعارتۋ مينيسترلىگىنىڭ مالىمدەۋىنشە, ءۇش ايدىڭ ىشىندە بالالاردى 1-سىنىپقا قابىلداۋعا 320 مىڭعا جۋىق ءوتىنىش ءتۇسىپ ۇلگەرگەن. ونىڭ ىشىندە بالالاردىڭ 70%-عا جۋىعى مەملەكەتتىك تىلدە وقۋدى تاڭدادى.
بالدىرعانداردى مەكتەپكە قابىلداۋ 1 ساۋىردە باستالعان بولاتىن. ال قۇجات قابىلداۋ مەرزىمى 2022 جىلعى 1 تامىزدا اياقتالادى. بىراق جاۋاپتى ۆەدومستۆو اتا-انالارعا قۇجاتتى تەزدەتىپ تاپسىرۋعا كەڭەس بەرەدى.
مەكتەپكە دەيىنگى جانە ورتا ءبىلىم كوميتەتىنىڭ توراعاسى گۇلميرا كارىموۆا: «اتا-انالارعا قۇجاتتاردى تەزىرەك تاپسىرۋعا كەڭەس بەرەمىز, ويتكەنى قابىلداۋ 1 تامىزدا اياقتالادى. ال 1 تامىزدان باستاپ مەكتەپتەردە وقۋ-تاربيە ءۇردىسىن ساپالى جوسپارلاۋ مەن ۇيىمداستىرۋ, وقۋلىقتاردى تاراتۋ, سىنىپتاردى قالىپتاستىرۋ جانە باسقا دا ۇيىمداستىرۋ جۇمىستارى باستالادى. قۇجات قابىلداۋ باستالعانىنا ءۇش اي ءوتتى جانە وسى ۋاقىت ىشىندە 320 مىڭعا جۋىق ءوتىنىش ءتۇستى. ونىڭ 82%-ى ەلەكتروندى فورماتتا قابىلداندى. سونىمەن قاتار مەملەكەتتىك تىلدە ءبىلىم العىسى كەلەتىندەردىڭ ۇلەسى بۇگىندە 70%-عا جۋىقتادى. قازاق تىلىندە وقىتاتىن سىنىپتارعا قابىلداۋ بويىنشا ەڭ جوعارى كورسەتكىشتەر قىزىلوردا (92,4%), تۇركىستان (89%) جانە ماڭعىستاۋ (87,1%) وبلىستارىندا تىركەلدى», دەدى.
وقۋ-اعارتۋ مينيسترلىگى ازاماتتارعا ىڭعايلى بولۋ ءۇشىن قىزمەتتى اۆتوماتتاندىرعان ەدى, وسىعان وراي اتا-انالار قۇجاتتى egov.kz ۆەب-پورتالى ارقىلى تاپسىرا الادى. سونداي-اق ولار قۇجاتتى ءداستۇرلى قاعاز فورماتىندا دا وتكىزۋگە قۇقىلى. جاڭا وقۋ جىلىندا 400 مىڭنان اسا بالا 1-سىنىپقا بارادى دەپ كۇتىلىپ وتىر.