سەناتورلار اسقار شاكىروۆ, عۇمار دۇيسەمباەۆ, دۇيسەنعازى مۋسين, ءماجىلىس دەپۋتاتتارى ايگۇل قۇسپان جانە ايدوس سارىم 2-6 شىلدەدە بيرمينگەم قالاسىندا ( ۇلىبريتانيا) وتكەن ەقىۇ پارلامەنتتىك اسسامبلەياسىنىڭ جازعى سەسسياسىنا قاتىستى, دەپ حابارلايدى Egemen.kz.
وندا قازىرگى حالىقارالىق جاعداي مەن قازىرگى زامانعى سىن-قاتەرلەر تۇرعىسىندا پارلامەنتارالىق ءوزارا ءىس-قيمىلدىڭ وزەكتى ماسەلەلەرى تالقىلاندى.
قازاقستاندىق پارلامەنتشىلەر ساياسي ماسەلەلەر جانە قاۋىپسىزدىك; ەكونوميكا, عىلىم, تەحنولوگيالار جانە قورشاعان ورتا; دەموكراتيا, ادام قۇقىقتارى جانە گۋمانيتارلىق ماسەلەلەر جونىندەگى جالپى ءۇش كوميتەتتەگى سەسسياعا قاتىسۋشىلاردى قازاقستانداعى قازىرگى زامانعى حالىقارالىق كۇن ءتارتىبىن جۇزەگە اسىرۋ, ونىڭ ىشىندە قوعامدى جان-جاقتى دەموكراتيالاندىرۋ, جاسىل ەكونوميكانى دامىتۋ جانە ەلدىڭ كومىرتەگىنەن بەيتاراپ بولۋىنا قول جەتكىزۋى سالاسىندا قابىلدانىپ جاتقان شارالاردى تانىستىردى. ارال تەڭىزىنىڭ پروبلەماسى دا حالىقارالىق قوعامداستىقتىڭ نازارىنا ۇسىنىلدى.
بۇدان بۇرىن حابارلانعانداي, سەسسيا اياسىندا «قۇبىلمالى الەم جانە قازىرگى زامانعى سىن-قاتەرلەر جاعدايىندا جاڭا قازاقستاندى قۇرۋ» سايد-يۆەنتى ءوتتى. قازاقستاندىق دەلەگاتسيا شارا بارىسىندا پرەزيدەنت قاسىم-جومارت توقاەۆتىڭ باستاماسىمەن قولعا الىنعان ەكىنشى رەسپۋبليكانى قۇرۋ ماقساتىنداعى ساياسي جانە الەۋمەتتىك-ەكونوميكالىق رەفورمالاردىڭ اۋقىمدى باعدارلاماسىن ەقىۇ پارلامەنتشىلەرىنە تانىستىردى.
سەسسيا اياسىندا پارلامەنتتىك اسسامبلەيا توراعاسىنىڭ ورىنباسارى, ورنىقتى دامۋ ماقساتتارى جونىندەگى ارناۋلى وكىلى اسقار شاكىروۆ دايىنداعان «بۇۇ-نىڭ ەقىۇ ايماعىندا ورنىقتى دامۋ سالاسىنداعى ماقساتتارىن جۇزەگە اسىرۋ» قارارى قابىلداندى. «بيرمينگەم دەكلاراتسياسى» سەسسياسىنىڭ قورىتىندى قۇجاتىنا ەنگەن بۇل ءىس-قيمىل باعدارلاماسىندا ەقىۇ-عا قاتىسۋشى مەملەكەتتەردىڭ پارلامەنتتەرىنە ودم-دى مەملەكەتتەردىڭ قىزمەتىنە كىرىكتىرۋ, ۇلتتىق دامۋ جوسپارلارىن جاساۋدا ولاردىڭ تيىمدىلىگى مەن سىندارلى بولۋىن ارتتىرۋ جانە ورىندالۋىن باقىلاۋعا باعىتتالعان كۇش-جىگەرگە قارقىن بەرۋگە شاقىرۋ قامتىلعان.
ۇلىبريتانيا, اقش, تۇركيا, پولشا, اۋستريا, ازەربايجاننىڭ پارلامەنتتىك دەلەگاتسيالارىمەن ەكىجاقتى كەلىسسوزدەر جۇرگىزىلىپ, وندا پارلامەنتارالىق ءوزارا ءىس-قيمىلدى ۇلعايتۋ جانە ونى ءىس جۇزىندەگى مازمۇنمەن تولىقتىرۋ تۋرالى ۋاعدالاستىقتارعا قول جەتكىزىلدى.
وتكەن كەزدەسۋلەر شەتەلدىك ارىپتەستەردىڭ قازاقستاندا بولعان وقيعالارعا ەرەكشە نازار اۋدارىپ وتىرعانىن جانە قازاقستاننىڭ مەملەكەت باسشىسى جۇرگىزىپ جاتقان جان-جاقتى رەفورمالاردى قولدايتىنىن كورسەتىپ وتىر.
قازاقستان مەن ەقىۇ اراسىنداعى ديالوگتى ودان ءارى دامىتۋ تۇرعىسىندا وسى ۇيىمنىڭ باس حاتشىسى حەلگا ماريا شميد قازاقستانعا كەلۋ نيەتى تۋرالى حابارلادى.
سەسسياعا قاتىسۋشىلار الەمدىك ساياساتتا پارلامەنتتەردىڭ ءرولى ءوسىپ كەلە جاتقانى, پارلامەنتارالىق ىنتىماقتاستىقتى دامىتۋ جانە نىعايتۋ قاجەتتىگى تۋرالى ورتاق پىكىر ءبىلدىردى.
سەسسيا سوڭىندا ەقىۇ پارلامەنتتىك اسسامبلەياسى توراعاسىنىڭ سايلاۋى بولدى, ونىڭ قورىتىندىسى بويىنشا مارگارەت سەدەرفەلت ءبىر جىل مەرزىمگە قايتا سايلاندى.