نۇر-سۇلتاندا مەملەكەتتەن بەرىلەتىن جالدامالى پاتەر يەلەرىنىڭ ءتىزىمى جاريالاندى, دەپ حابارلايدى Egemen.kz.
18-24 ماۋسىم ارالىعىندا ءۇي كەزەگىندە تۇرعان وسال توپتاعى ازاماتتارعا ارنالعان 117 پاتەردىڭ (1,2,3 بولمەلى پاتەرلەر) يەلەرى انىقتالدى.
بۇل - ساتىپ الۋ قۇقىعىنسىز جالعا بەرىلەتىن تۇرعىن ءۇي باعدارلاماسى. ونىڭ ناتيجەسىن جانە باسپانالى بولعانداردىڭ ءتىزىمىن zhilfond.kz سايتىنان كورۋگە بولادى.
الەۋمەتتىك جاعىنان وسال توپتار ساناتى بويىنشا 1 بولمەلى پاتەرگە - 2009 جىلدىڭ 11 اقپانىنا دەيىن, 2 بولمەلى پاتەرگە - 2010 جىلدىڭ 5 اقپانىنا دەيىن, 3 بولمەلى پاتەرگە - 2008 جىلدىڭ 18 تامىزىنا دەيىن كەزەكتە تۇرعاندار يە بولدى.
جەتىم بالالار ساناتى بويىنشا 1 بولمەلى پاتەرگە - 2010 جىلدىڭ 21 مامىرىنا دەيىن, 2 بولمەلى پاتەرگە - 2012 جىلدىڭ 8 تامىزىنا دەيىن, 3 بولمەلى پاتەرگە - 2012 جىلدىڭ 13 شىلدەسىنە دەيىن كەزەكتە تۇرعاندار ءوتتى.