1998 جىلى اسكەري قورعانىس كۇشتەرىنىڭ اسكەري-اۋە كۇشتەرىن قۇرۋ تۋرالى ديرەكتيۆاعا قول قويىلدى, دەپ حابارلايدى Egemen.kz.
«قازاقستاننىڭ اسكەري-اۋە كۇشتەرى – ماڭىزدى باعىتتاردى, اۋداندار مەن وبەكتىلەردى اۋە قارسىلاستارىنىڭ سوققىلارىنان قورعاۋعا ارنالعان نەگىزگى مانەۆرلىك اتىس اسكەرى. ولار اۋە كەمەلەرىنىڭ زاماناۋي تۇرلەرىمەن, سونىڭ ىشىندە كوپ فۋنكتسيالى جويعىشتارمەن جانە سوققى بەرۋشى تىكۇشاقتارىمەن جابدىقتالعان. ۇشقىشتاردىڭ جاۋىنگەرلىك دايارلىق جۇيەسى دە ۇدايى جەتىلدىرىلىپ وتىرادى. سونىمەن قاتار, قازىرگى زامانعى قارۋلى قاقتىعىستاردىڭ تاجىريبەسى دە ەسكەرىلىپ, تالدانادى. مۇنىڭ ءبارى ءىس جۇزىندە جەكە قۇرامدى اۋەدە سوعىس جۇرگىزۋدىڭ جاڭا ءادىس-تاسىلدەرىن ۇيرەنۋىنە مۇمكىندىك بەرەدى», دەلىنگەن قر قورعانىس مينيسترلىگى ءباسپاسوز قىزمەتىنىڭ مالىمدەمەسىندە.
ۆەدومستۆو اسكەري-اۋە كۇشتەرىنىڭ ەپتىلىگى «جۋسان» گۋمانيتارلىق اكتسياسى كەزىندە كورىنگەنىنە نازار اۋدارادى. ۇشقىشتاردىڭ سيرياعا رەيستەر جاساپ, ازاماتتاردى ەلگە جەتكىزگەنىنە توقتالادى.
«2021 جىلدىڭ تامىزىندا اسا كۇردەلى ءارى قاۋىپتى جاعدايلاردا اسكەري-كولىك اۆياتسياسىنىڭ ەكيپاجدارى كابۋلدان كەلگەن وتانداستاردى ەۆاكۋاتسيالاۋ وپەراتسياسىن جۇزەگە اسىردى. سونداي-اق, قازاقستان رەسپۋبليكاسىنىڭ ەلشىلىگىنە كومەك سۇراپ كەلگەن قىرعىزستان, رەسەي جانە ليتۆا ازاماتتارى دا اۋعانستاننان گۋمانيتارلىق وپەراتسيا كەزىندە شىعارىلدى», دەپ تولىقتىرادى ءباسپاسوز قىزمەتىنەن.