ەڭبەك مينيسترلىگىنىڭ مالىمەتىنشە, 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا اياسىندا 2,2 مىڭنان استام مۇگەدەك تۇراقتى جۇمىس ورىندارىنا جانە 5 مىڭنان استام ادام ۋاقىتشا جۇمىسقا ورنالاستىرىلدى, دەپ حابارلايدى Egemen.kz.
سونىمەن قاتار وسى جىلدىڭ ءى توقسانىندا حالىقتى جۇمىسپەن قامتۋ ورتالىقتارىنىڭ جولداماسى بويىنشا جۇمىس بەرۋشىلەر مۇگەدەكتىگى بار 348 ادامدى جۇمىسقا قابىلدادى.
«بيىل كورۋ, ەستۋ جانە تىرەك-قيمىل اپپاراتى بۇزىلعان ادامدار ءۇشىن 71 ارنايى جۇمىس ورنىن قۇرۋ قاراستىرىلعان, جۇمىس بەرۋشىلەردىڭ جابدىقتالۋىنا بايلانىستى شىعىندارىن سۋبسيديالاۋ قاراستىرىلعان», دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاماسىندا.
سونىمەن قاتار قر كاسىپوداقتار فەدەراتسياسىمەن بىرلەسكەن «حالىقتىق باقىلاۋ» الەۋمەتتىك ماڭىزى بار جوباسى مۇگەدەك ادامداردى «حالىقتىق باقىلاۋشىلار» رەتىندە تارتۋدى كوزدەيدى. بۇگىندە جوباعا 164 كاسىپورىن جۇمىلدىرىلىپ, 521 قىزمەتكەر جۇمىسقا ورنالاستىرىلدى.
ۆەدومستۆودا اتاپ وتكەندەي, مۇمكىندىگى شەكتەۋلى ادامدار بەينەباقىلاۋ وپەراتورلارى رەتىندە جۇمىسقا قابىلدانادى, ولار جۇمىس ورىندارىندا ەڭبەك قاۋىپسىزدىگى مەن ەڭبەكتى قورعاۋ تالاپتارىنىڭ ساقتالۋىن قاداعالايدى.
جوباعا قاتىسۋ ءۇشىن كادرلاردى ىرىكتەۋ كەزىندە مۇگەدەكتىكتى (وندىرىستىك جاراقات, كاسىپتىك اۋرۋ, جالپى اۋرۋ) بەلگىلەۋ سەبەبى بويىنشا كاسىپورىندا جۇمىسىن تاستاپ كەتكەن قىزمەتكەرلەرگە ارتىقشىلىق بەرىلەدى.