فۋتبولدان قازاقستان چەمپيوناتىنىڭ 15-تۋرى اياسىندا جەتى كەزدەسۋ ءوتىپ, سونىڭ ۇشەۋىندە قوناقتار جەڭىسكە جەتسە, ۇشەۋى تەڭ اياقتالدى. تاعى ءبىر باسەكەدە الاڭ يەلەرىنىڭ مەرەيى ۇستەم بولدى.
سەنبىدە ەكى ويىندى تاماشالادىق. «اقجايىق» ورالدا شىمكەنتتىڭ «ورداباسى» كلۋبىنا ەسە جىبەردى – 0:1. بۇل ماتچتاعى جالعىز گولدى 77-مينۋتتا وديلبەك ءابدۋماجيتوۆ سوقتى. پاۆلوداردا «اقسۋ» مەن قاراعاندىنىڭ «شاحتەرى» تەڭ تاراستى – 1:1. جەكسەنبىدە تاعى بەس باسەكەنىڭ كۋاسى بولدىق. «اقتوبە» «استانانى» 4:1 ەسەبىمەن ويسىراتا ۇتتى. «توبىل» پەتروپاۆلوۆسكىدە جەرگىلىكتى «قىزىلجاردى» 3:1 ەسەبىمەن ەڭسەردى. وسى جەڭىسىنىڭ ارقاسىندا قوستانايلىقتار كوش باسىنداعى «استانانى» قۋىپ جەتتى. «كاسپي» اقتاۋدا تۇركىستاننىڭ «تۇرانىنا» جول بەردى – 0:2. «تاراز» بەن «قايرات» جانە «ماقتاارال» مەن «اتىراۋ» اراسىنداعى كەزدەسۋلەردە 1:1 ەسەبى تىركەلدى.
15-تۋردان كەيىن «استانا» مەن «توبىل» كوش باسىندا ۇزەڭگى قاعىستىرىپ كەلەدى. ەكەۋىندە دە 24 ۇپايدان بار. ولاردان ءبىر ۇپاي كەم جيعان «اقتوبە» ۇزدىك ۇشتىكتى تۇيىندەۋدە. ال كوش سوڭىنداعى «ماقتاارال» نەبارى
10 ۇپايدى قاناعات تۇتۋدا.