بقو-دا جول اپاتىنان ەكى ءسابي زارداپ شەكتى

بقو پوليتسيا دەپارتامەنتىنىڭ مالىمەتىنشە, وقيعا 26 ماۋسىم كۇنى شامامەن 22.00-دەن كەيىن اقجايىق اۋدانى اۋماعىندا, اتىراۋ-ورال جولىنىڭ 351-شاقىرىمىندا بولعان. «چەرري» اۆتوكولىگىنىڭ 1979 جىلعى جۇرگىزۋشى «زيل» اۆتوكولىگىن اينالىپ وتەمىن دەپ اۋدارىلىپ كەتكەن. اۆتوكولىكتە 6 جولاۋشى بولعان. 19 جاستاعى ايەل جابىق باس-مي جاراقاتىن الىپ, ميى شايقالعان. سونداي-اق ومىرتقاسى, قابىرعالارى سىنعان. باسى مەن يىق تۇسى كوگەرگەن ەكى ايلىق ءسابي وبلىستىق كوپبەيىندى بالالار اۋرۋحاناسىنا جەتكىزىلدى. ءبىر جاسار بالانىڭ دا ساماي تۇسى كوگەرگەن. مەديتسينالىق كۋالاندىرۋعا سايكەس جۇرگىزۋشى ىشىمدىك ىشپەگەن.

تاعى ءبىر وقيعا ورال قالاسىندا م.شولوحوۆ پەن ع.قۇرمانعاليەۆ كوشەلەرىنىڭ قيىلىسىندا بولعان. «تويوتا» شاعىن اۆتوبۋسى توقتاپ تۇرعان سكۋتەر مەن «ۆاز-2110» اۆتوكولىگىمەن تۇيىسكەن. سالدارىنان 5 ادام اۋرۋحاناعا جەتكىزىلىپ, سكۋتەردە وتىرعان 17 جاسار ءجاسوسپىرىم جانساقتاۋ بولىمىندە كوز جۇمدى.

سكۋتەردىڭ جۇرگىزۋشىسى كوپتەگەن دەنە جاراقاتتارىمەن اۋرۋحاناعا جاتقىزىلدى. جەڭىل كولىكتە بولعان ءۇش جولاۋشى دارىگەرلەر قاراعاننان كەيىن ۇيىنە جىبەرىلگەن. 

الدىن الا بولجام بويىنشا جۇرگىزۋشى ۇيالى تەلەفونعا الاڭداعان. بۇل وقيعا بويىنشا قر قك 345-بابى 3-بولىگىنە سايكەس سوتقا دەيىنگى تەرگەۋ امالدارى جۇرگىزىلۋدە. 

ايانا توعانبەك