كەراميكالىق كىرپىشتىڭ كەلەشەگى بار ما؟

زاماناۋي ءومىر اعىمى كوپقاباتتى تۇرعىن ۇيلەر مەن اكىمشىلىك عيماراتتار قۇرىلىسىندا جاڭا باعىتتار مەن ءتيىمدى ءادىس-تاسىلدەردى قولدانۋعا جول اشۋدا. وسىعان وراي بۇگىندە قۇرىلىس سالۋ كەزىندە ءمونوليتتى بەتون كەڭىنەن پايدالانىلۋدا. بۇل تەحنولوگيانىڭ باستى ارتىقشىلىعى – ۋاقىتتى ۇنەمدەيدى جانە شىعىن از جۇمسالادى.

دەسە دە سۋىققا توزىمدىلىگى مەن دىبىس وتكىزگىشتىگى تۇرعىسىنان كىرپىش قۇرىلىس جۇمىستارىندا ءالى دە بولسىن ۇلكەن سۇرانىسقا يە. ماسەلەن, 2020 جىلى تۇرعىن ءۇي قۇرىلىسىنىڭ 52 پايىزىندا كىرپىش پايدالانىلعان. ءمونوليتتى بەتون كەڭىنەن قولدانىلاتىن ءىرى قالالاردىڭ وزىندە كىرپىشتەن سالىنعان ۇيلەردىڭ ۇلەس سالماعى 40 پايىزدى قۇرايدى.

2021 جىلى سيليكاتتى كىرپىش ءوندىرۋ 2020 جىلعا قاراعاندا 7,2 پايىزعا ءوسىپ, جالپى كولەمى 1,2 ملن توننانى قۇرادى. وتاندىق كاسىپورىندار اتالعان ونىمگە دەگەن ىشكى سۇرانىستى 98-99 پايىزعا قامتىدى.

ال كەراميكالىق كىرپىش ءوندىرىسى سالاسىندا قالىپ­تاسقان جاعداي كوڭىل كونشىتەرلىكتەي ەمەس. بۇگىندە اتال­عان ءونىمدى ءوندىرۋ قۋاتى ىشكى نارىقتى تولىققاندى قامتي الماي وتىر. قازاقستاندا كەراميكالىق كىرپىش وندىرەتىن 290 كاسىپورىن بار. ولاردىڭ 2-ءى – ءىرى, 7-ءى – ورتا جانە 281-ءى – شاعىن ءوندىرىس وشاقتارى. اتالعان كاسىپورىندار ءونىم ءوندىرۋ قۋاتىن 2020 جىلعا قاراعاندا 27 پايىزعا ارتتىر­عانىمەن ىشكى نارىقتى قامتۋ ۇلەسى بار بولعانى 44 پايىزدى قۇرادى. شىعارىلعان ءونىم كولەمى – 4,3 ملن تەكشە مەتر. ىشكى نارىققا قاجەتتىلىكتىڭ باسىم بولىگى رەسەي جانە وزبەكستاننان جەتكىزىلگەن يمپورت ەسەبىنەن قامتاماسىز ەتىلگەن.

وسى رەتتە ايتا كەتەيىك, قازاقستاندا كەراميكالىق كىرپىش وندىرۋگە قاجەتتى شيكىزاتتىڭ بارلىق ءتۇرى بار. بۇل ءونىمدى ءوندىرۋ ءۇشىن ساز بەن جابىسقاق بالشىق جانە قۇم­نىڭ بىرنەشە ءتۇرى كەرەك.

قابىرعا ماتەريالدارىنا يمپورتتىق تاۋەلدىلىكتى ازايتۋ ءۇشىن 2025 جىلعا دەيىن يندۋستريالاندىرۋ كارتا­سىنا كەراميكالىق كىرپىش ءوندىرۋ بويىنشا 20 ينۆەس­تيتسيالىق جوبا ەنگىزىلدى. ونىڭ ىشىندە الماتى وبلىسىندا D&J GROUP زاۋىتىن سالۋ, كوكشەتاۋ قالاسىنداعى ENKI كاسىپورنىنىڭ وندىرىستىك قۋاتىن ارتتىرۋ سياقتى ءىرى جوبالار بار. اتالعان جوبالار وتاندىق ءوندىرىس كو­لە­مىن ارتتىرىپ, يمپورتتىق تاۋەلدىلىكتى ازايتۋعا ىقپال ەتپەك.

بۇگىندە قۇرىلىستا كىرپىشكە بالاما رەتىندە بلوك-ءمودۋلدى تەحنولوگيالار كەڭىنەن قولدانىلۋدا. مۇندا عيماراتتىڭ ارنايى بولشەكتەرى زاۋىتتار مەن قۇرىلىس الاڭدارىندا جيناقتالادى. بۇل تەحنولوگيا قۇرىلىس جۇمىستارىن قولجەتىمدى, جىلدام ءارى ەكولوگيالىق تۇرعىدان ءتيىمدى ەتە تۇسەدى.

2020 جىلدان بەرى ەلوردادا ModeX Astana كولەمدى-بلوكتى ءۇي قۇرىلىسى زاۋىتىنىڭ العاشقى كەزەگى تابىستى جۇمىس ىستەۋدە. كاسىپورىنداعى 10 قالىپتاۋ ماشيناسى جى­لىنا 7,5 مىڭ كولەمدى بلوك وندىرەدى. بيىلعى جىلى اۋقىمدى جوبانىڭ ەكىنشى كەزەگىن ىسكە قوسۋ جوسپارلانىپ وتىر.

«نۇرلى جول» مەملەكەتتىك باعدارلاماسى وتاندىق قۇرىلىس ماتەريالدار ءوندىرىسىن وركەندەتۋگە تىڭ سەرپىن بەردى. اتالعان باعدارلاما اياسىندا 2025 جىلعا دەيىن 100 ملن شارشى مەتر تۇرعىن ءۇي سالىنباق. بۇل ءۇشىن 5,6 ملن دانا سيليكاتتى جانە كەراميكالىق كىرپىش پەن 15,3 ملن تەكشە مەتر قابىرعالىق بلوكتار قاجەتتىگى ايقىندالدى. مەملەكەتتىك باعدارلاما شارتىنا وراي, قۇرىلىس جۇمىس­تارىندا تەك قانا وتاندىق ونىمدەر قولدانىلۋعا ءتيىس.

وتاندىق وندىرۋشىلەرگە جان-جاقتى قولداۋ كورسەتۋ ماقساتىندا يندۋستريا جانە ينفراقۇرىلىمدىق دامۋ مينيسترلىگى www.material.kz ونلاين ساۋدا سورەسىن ىسكە قوستى. ينتەرنەت-رەسۋرستا قۇرىلىس ماتەريالدارىن وندىرەتىن كاسىپورىندار مەن قۇرىلىس كومپانيالارى ءوز ونىمدەرى مەن قىزمەتتەرىن جانە ۇسىنىستارىن بىلدىرە الادى. بۇل الاڭ قوس تاراپقا ەشقانداي دەلدالسىز ۇزاقمەرزىمدى ءتيىمدى كەلىسىمشارت جاساسۋعا مۇمكىندىك بەرىپ, جاڭا باستامالارعا جول اشادى.