اتىراۋ-ورال تاس جولىنىڭ 41-ءشى شاقىرىمىندا ۇلكەن شاعان اۋىلىنىڭ ماڭىندا ءىرى جول اپاتى بولدى, دەپ حابارلايدى Egemen.kz.
اپات سالدارىنان ۆاز تىزگىنىندەگى 1988 جىلعى جۇرگىزۋشى قازا تاپتى. Daewoo Nexia جۇرگىزۋشىسى وزبەكستان ازاماتى ەكەنى بەلگىلى بولدى.
بقو پد ءباسپاسوز قىزمەتى ونىڭ رولگە يە بولا الماي, جولدىڭ قارسى قوزعالىس جولاعىنا شىعىپ كەتكەنىن ايتتى.
«23 جاستاعى Daewoo Nexia جۇرگىزۋشىسى ۆاز كولىگىنە كەلىپ سوقتىعىسقان. جول اپاتى سالدارىنان ول اۋىر جاراقات الىپ, وبلىستىق كوپبەيىندى اۋرۋحانانىڭ جانساقتاۋ بولىمىنە جەتكىزىلدى. ۆاز جۇرگىزۋشىسىنىڭ دەنەسى مايىتحاناعا ساراپتاماعا جىبەرىلدى. سونىمەن قاتار, ۆاز-داعى 44 جاستاعى جولاۋشى زارداپ شەكتى. ول وبلىستىق كوپبەيىندى اۋرۋحانانىڭ تراۆماتولوگيا بولىمىنە جەتكىزىلدى», دەلىنگەن بقو پد ءباسپاسوز قىزمەتىنىڭ حابارلاماسىندا.
ەكى كولىك تە ايىپپۇل تۇراعىنا قويىلدى.
ايانا توعانبەك