الەمگە ايگىلى Apple كومپانياسى جىل سايىن وقىتۋشىلارعا ارنالعان Apple Certified Trainer كۋرستارىن وتكىزەدى. بيىل اتالعان كۋرستان وتكەندەر قاتارىندا گەرمانيا, يرلانديا, ءباا, مىسىر, ءۇندىستان سەكىلدى ەلدەردىڭ پەداگوگتەرىنەن بولەك قازاقستاندىق مۇعالىم دە بار.
نۇر-سۇلتان قالاسىنداعى رەسپۋبليكالىق فيزيكا-ماتەماتيكا مەكتەبىنىڭ ينفورماتيكا مۇعالىمى قۋانىش ماعاۋين Apple كومپانياسىنىڭ Swift باعدارلامالاۋ ءتىلى بويىنشا سەرتيفيكاتتالعان وقىتۋشىسى اتاندى. بۇل ءۇشىن ول Apple كۋرستارىنان ءوتىپ, ەمتيحانداردى ءساتتى تاپسىردى.
وسىلايشا, ق.ماعاۋين قازاقستاندىق مۇعالىمدەر اراسىندا العاش بولىپ تانىمال ءىت كومپانيانىڭ سەرتيفيكاتىن يەلەندى. ەندى ىزدەنىمپاز پەداگوگ الەمنىڭ ۇزدىك ازىرلەۋشىلەرى ءبىلىم سالاسىنداعى جاڭا جوبالارىن تانىستىراتىن Apple Education ەكسكليۋزيۆتى ءىس-شارالارىنا قاتىسا الادى.
«قازاقستاندا قازىر IT-يندۋستريا بارلىق باعىتتا, سونىڭ ىشىندە ءبىلىم بەرۋ سالاسىندا دا قارقىندى دامىپ كەلەدى. ءبىز ەلەكتروندى وقۋلىقتار مەن كۇندەلىكتەر قولداناتىن, سونداي-اق ەمتيحاندار مەن وليمپيادالاردى ونلاين فورماتتا وتكىزەتىن ساناۋلى ەلدەردىڭ قاتارىندامىز. Apple كۋرستارىندا Swift باعدارلامالاۋ ءتىلى ارقىلى ءموبيلدى قوسىمشالاردى ازىرلەۋدىڭ نەگىزدەرىن ۇيرەندىك. تالىمگەرلەر ءدارىستى اعىلشىن تىلىندە وتكىزدى. مەنىڭ توبىمدا نەگىزىنەن قوسىمشالاردى ازىرلەۋدە مول تاجىريبەسى بار IT-ماماندار وقىدى. ال مەن توپتاعى جالعىز مۇعالىم بولدىم. بارلىق ەمتيحاندى تاپسىرىپ, Apple وقىتۋشىسى مارتەبەسىن العانىما قۋانىشتىمىن! الداعى ۋاقىتتا وقۋشىلارعا ارنالعان ءموبيلدى قوسىمشالار ازىرلەۋ بويىنشا مەكتەپتە كۋرستار وتكىزىپ, ارىپتەستەرىممەن العان تاجىريبەمدى بولىسپەكپىن», دەيدى ينفورماتيكا ءپانىنىڭ مۇعالىمى ق.ماعاۋين.
پەداگوگ قۋانىش ماعاۋيننىڭ ارقاسىندا Apple Authorized Training Center for Education (AATCE) مارتەبەسى ءوزى جۇمىس ىستەيتىن مەكتەپكە دە اۆتوماتتى تۇردە بەرىلدى. ەندى قۋانىش ماعاۋين جۇمىس ىستەيتىن ەلورداداعى رەسپۋبليكالىق فيزيكا-ماتەماتيكا مەكتەبى Swift قوسىمشاسىن جاساۋ بويىنشا كۋرستار وتكىزىپ, وقۋشىلاردى سەرتيفيكاتتاپ, وقۋ ورنىندا Apple classroom زەرتحاناسىن اشۋ قۇقىعىنا يە.